ໃນເວລາ 2:00 ໂມງຂອງວັນທີ 28 ກຸມພາ 2018 ທີຫ້ອງຮັບແຂກ ກະຊວງອຸດສາຫະກໍາ ແລະ ການຄ້າ ໄດ້ຕ້ອນຮັບຄະນະເອກອັກຄະລັດຖະທູດສາທາລະນະລັດຂອງອາແຊກໄບຈານ ທີ່ເຂົ້າຢ້ຽມ ຂໍ່ານັບລັດຖະລັດມົນຕີກະຊວງອຸດສາຫະກໍາ ແລະ ການຄ້າ ໂດຍໄດ້ຮັບການຕ້ອນຮັບຈາກທ່ານ ພັນທອງ ພິດທຸມມາ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ພ້ອມດ້ວຍບັນດາຜູ້ຕາງໜ້າຈາກກົມທີ່ກ່ຽວຂ້ອງເຊັ່ນ: ກົມການຄ້າພາຍໃນ, ກົມການນໍາເຂົ້າ-ສົ່ງອອກ, ກົມສົ່ງເສີມ ການຄ້າ, ກົມແຜນການ ແລະ ການຮ່ວມມື ແລະ ຫ້ອງການກະຊວງ.
ຈຸດປະສົງຂອງການເຂົ້າຢ້ຽມຂ່ໍ່ານັບໃນຄັ້ງນີ້ແມ່ນເພື່ອ ເຊື້ອເຊີນ, ແນະນໍາ ແລະ ອະທິບາຍກ່ຽວກັບໂຄງການເອັກສະໂປ 2020 ໂດຍຕ້ອງການໃຫ້ທາງການລາວສະໜັບສະໜູນ ແລະ ສົ່ງເສີມໂຄງ ການດັ່ງກ່າວ.
ພ້ອມດຽວກັນນີ້, ທ່ານເອກອັກຄະລັດຖະທູດ ສາທາລະນະລັດຂອງອາແຊກໄບຈານຍັງໄດ້ກ່າວວ່າ: ລາວ ແລະ ອາແຊກໄບຈານ ແມ່ນເປັນປະເທດທີ່ກໍາລັງພັດທະນາ ແລະ ຫວັງວ່າຈະໄດ້ຮັບການຊ່ອຍເຫລືອເຊິ່ງກັນ ແລະ ກັນ, ໂດຍສະເພາະການມາຢ້ຽມຢາມໃນຄັ້ງນີ້ຈະບໍ່ແມ່ນຄັ້ງສຸດທ້າຍ ແລະ ທີ່ສໍາຄັນການພົວພັນຂອງທັງສອງປະເທດນັບມື້ນັບດີຂຶ້ນໄປເລື້ອຍໆ ແລະ ກ່າວຂອບໃຈ ທີ່ທາງການລາວໄດ້ຕ້ອນຮັບເປັນພິເສດ.
ນອກນີ້, ທ່ານ ຮອງລັດຖະມົນຕີກະຊວງ ອຄ ຍັງໄດ້ກ່າວ: ກ່ຽວກັບການສະໜັບສະໜູນ ແມ່ນທາງການລາວ ມີຄວາມຍິນດີ ແລະ ສະໜັບສະໜູນເຕັມທີ່ໃນການເຂົ້າຮ່ວມ ເອັກສະໂປ 2020 ພ້ອມທັງສະແດງຄວາມຍິນດີທີ່ນັກທຸລະກິດ ຂອງອາແຊກໄບຈານ ຈະມາລົງທຶນຢູ່ລາວໃນອະນາຄົດ.
ຂ່າວໂດຍ: ພູຄໍາ ຫລວງສຸພົນ
