ໃນຕອນບ່າຍ ຂອງວັນທີ 12 ມີນາ 2018, ທ່ານລັດຖະມົນຕີ, ຮອງລັດຖະມົນຕີ, ບັນດາຫົວໜ້າກົມ-ຮອງກົມ, ຫົວໜ້າ-ຮອງສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ພ້ອມດ້ວຍພະນັກງານຫຼັກແຫຼ່ງຂອງກະຊວງ ອຸດສາຫະກໍາ ແລະ ການຄ້າ ໄດ້ພົບປະ ແລະ ຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ເຂົ້າຮ່ວມຫລາຍກວ່າ 90 ທ່ານ ຊຶ່ງຄະນະປະທານນຳໂດຍ ທ່ານ ສາຍທອງ ແກ້ວດວງດີ ຄະນະປະຈຳສະພາແຫ່ງຊາດ, ປະທານກຳມາທິການກົດໝາຍສະພາແຫ່ງຊາດ, ພ້ອມດ້ວຍ ທ່ານ ນາງ ຄຳຟອງ ພູມວົງໄຊ ຮອງປະທານສະມາຊິກສະພາແຫ່ງຊາດປະຈຳເຂດເລືອກຕັ້ງທີ 1, ທ່ານ ຄຳເຜີຍ ຮອງປະທານສະພາປະຊາຊົນນະຄອນຫຼວງວຽງຈັນ.
ທ່ານ ນ ເຂັມມະນີ ພົນເສນາ ໄດ້ລາຍງານຫຍໍ້ ກ່ຽວກັບ ການເຄື່ອນໄຫວວຽກງານ ໃນໄລຍະ 1 ປີຜ່ານມາ ຂອງ ກະຊວງ ອຄ ພ້ອມທັງຫວັງຢ່າງແຮງກ້າ ຜົນສໍາເລັດວຽກງານຂອງຂະແໜງການ ອຄ ຈະປະກອບສ່ວນໃນການສ້າງສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ.
ພ້ອມດຽວກັນນີ້, ທ່ານ ສາຍທອງ ແກ້ວດວງດີ ກໍໄດ້ກ່າວວ່າ: ການມາພົບປະໃນຄັ້ງນີ້ ຖືວ່າປະຕິບັດຕາມກົດໝາຍວ່າດ້ວຍສະພາແຫ່ງຊາດ ແລະ ສະພາປະຊາຊົນທ້ອງຖິ່ນ, ໂດຍກອງປະຊຸມສະພາແຫ່ງຊາດ ແລະ ສະພາທ້ອງຖິ່ນໄດ້ສຳເລັດລົງ, ສະພາແຫ່ງຊາດກໍໄດ້ນໍາເອົາຈິດໃຈດັ່ງກ່າວລົງລາຍງານຕໍ່ປະຊາຊົນ ແລະ ຜູ້ທີ່ມີສິດເລືອກຕັ້ງໃຫ້ເຂົ້າໃຈ, ນອກຈາກລາຍງານຜົນສຳເລັດແລ້ວ ຈະຕ້ອງໄດ້ນຳເອົາຄຳຄິດຄໍາເຫັນ ແລະ ຄຳສະເໜີ ຫຼື ບັນຫາຕ່າງໆ ກັບໄປຄົ້ນຄວ້າ ແລະ ນໍາສະເໜີຕໍ່ກອງປະຊຸມໃນຄັ້ງຕໍ່ໄປ.
ນອກຈາກນັ້ນ, ກອງປະຊຸມຍັງໄດ້ຮັບຟັງການເຜີຍແຜ່ຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ແລະ ຮັບຟັງຄໍາຄິດເຫັນ, ຄໍາສະເໜີ ຂອງຜູ້ມີສິດເລືອກຕັ້ງຕໍ່ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ, ແຜນງົບປະມານແຫ່ງລັດ, ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ຮັບຟັງບັນຫາຫາງສຽງຂອງສັງຄົມ ເພື່ອເປັນຂໍ້ມູນແກ່ສະມາຊິກສະພາແຫ່ງຊາດໄດ້ນຳໄປຄົ້ນຄວ້າພິຈາລະນາໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ຊຶ່ງຈະໄຂຂຶ້ນໃນເດືອນ 5 ນີ້.
[ຂ່າວໂດຍ: ນ ຖື]
