ເວລາ15:00ໂມງ ຂອງວັນທີ 14 ມີນາ 2018 ທີ່ສູນການຄ້າລາວ-ໄອເຕັກ ໄດ້ມີພິທີເປີດງານວາງສະແດງຜະລິດຕະພັນລາວ ຄັ້ງທີ 5 ຢ່າງເປັນທາງການ ໂດຍການເປັນປະທານຮ່ວມຕັດແຖບຜ້າ ໂດຍ: ທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ນາງ ເຂັມມະນີ ພົນເສນາ ລັດ  ຖະມົນຕີ ກະຊວງອຸດສາຫະກໍາ ແລະ ການຄ້າ, ມີບັນດາທ່ານຮອງລັດຖະມົນຕີ, ບັນດາ ທ່ານ ເອກອັກຄະລັດຖະທູດ, ທຸຕານຸທູດ,  ບັນດາທ່ານ ຫົວຫນ້າກົມ, ທ່ານຮອງຫົວຫນ້າກົມ ກະຊວງອຸດສາຫະກໍາ ແລະ ການຄ້າ ແລະ ຜູ້ປະກອບການທາງທຸລະກິດທັງພາຍໃນ ແລະ ຕ່າງປະເທດ ກໍ່ໃຫ້ກຽດເຂົ້າຮ່ວມ.

         ໂດຍການກ່າວເປີດຂອງທ່ານ ນາງ ຈັນທະຈອນ ວົງໄຊ  ຮອງປະທານ ສະພາການຄ້າ ແລະ ອຸດສາຫະກໍາ ແຫ່ງຊາດ ແລະ ທ່ານ ໄດ້ກ່າວວ່າ: ຈຸດປະສົງຂອງການເປີດງານໃນຄັ້ງນີ້ແມ່ນເພື່ອຊຸກຍູ້ສົ່ງເສີມສ້າງຄວາມເຂັ້ມແຂງຜູ້ປະກອບການພາຍໃນ, ເຕົ້າໂຮມເອົາຜະລິດຕະພັນທີ່ມີການປະດິດຄິດສ້າງ, ໂດດເດັ່ນ, ເປັນເອກະລັກ, ມີຄຸນນະພາບ ໂດຍຫົວຄິດປະດິດສ້າງຂອງຜູ້ປະກອບການພາຍໃນ ສປປ ລາວ ຫຼື ນັກລົງທຶນຕ່າງປະເທດທີ່ນຳໃຊ້ວັດຖຸດິບພາຍໃນ ຫຼື ນຳເຂົ້າຈາກຕ່າງປະເທດເປັນສິນຄ້າລາວເຂົ້າຮ່ວມວາງສະແດງໃຫ້ສັງຄົມໄດ້ຮັບຊົມ ແລະ ຊື້ໄປຊົມໃຊ້.

          ງານຄັ້ງນີ້ມີຜູ້ປະກອບການເຂົ້າຮ່ວມວາງສະແດງຢ່າງຫລວງຫລາຍ. ພ້ອມນັ້ນ, ຍັງເປັນເວທີໃຫ້ຜູ້ປະກອບການຈັບຄູ່ທຸລະກິດນຳກັນ, ການບໍລິການຄຸນນະພາບມາດຕະຖານ ແລະ ກ້າວເຂົ້າສູ່ອາຊຽນ ແລະ ສາກົນເປັນກາສ້າງຄວາມພາກພູມໃຈຢ່າງຍິ່ງທີ່ໄດ້ເຕົ້າໂຮມເອົາບັນດາຜະລິດຕະພັນ ແລະ ສິນຄ້າທີ່ໄດ້ຜະລິດໃນປະເທດເຮົາມາເຕົ້າໂຮມກັນ ເພືື່ອໂຄສະນາຕໍ່ສາຍຕາຊາວລາວ ແລະ ຕ່າງປະເທດໃຫ້ຮັບຮູ້ເຖິງຄວາມພ້ອມຂອງຜະລິດຕະພັນລາວໃນການເຊື່ອມໂຍງກັບສາກົນ.

          ທ່ານກ່າວຕື່ມວ່າ: ເນື່ອງຈາກຄວາມພ້ອມຂອງຜູ້ປະກອບການບໍ່ຖ່ວງທັນ ຈຶ່ງເຮັດໃຫ້ຜູ້ປະກອບການນຳສິນຄ້າເຂົ້າຮ່ວມງານບໍ່ຫຼາກຫຼາຍເທົ່າທີ່ຄວນ ເຊິ່ງພາຍໃນງານມີພາກທຸລະກິດເຂົ້າຮ່ວມ 115 ຫົວໜ່ວຍ ລວມມີ 180 ຜະລິດຕະພັນທ້ອງຖິ່ນທັງ 18 ແຂວງ, ສິນຄ້າສ່ວນໃຫຍ່ແມ່ນຜະລິດຕະພັນອາຫານ, ເຄື່ອງດື່ມ, ຜະລິດຕະພັນປອດສານພິດ, ຜະລິດຕະພັນໄມ້ແປຮູບ, ເຟີນີເຈິ, ເຄື່ອງຕົບແຕ່ງຜະລິດຕະພັນໄມ້, ຜະລິດຕະພັນຕະຫຼາດຫຼັກຊັບ, ຜະລິດຕະພັນການທ່ອງທ່ຽວ, ຜະລິດຕະພັນເຄື່ອງໃຊ້ໄຟຟ້າ ແລະ ອື່ນໆ.

ໃນວາລະຂອງງານຍັງຈະມີກອງປະຊຸມສຳມະນາສົ່ງເສີມຄວາມສາມາດ ໃນການສ້າງກຳໄລລະດັບສູງສຳລັບການສົ່ງ ເສີມຜະລິດຕະພັນຊາ, ກອງປະຊຸມສຳມະນາສິ່ງທ້າທາຍ ແລະ ໂອກາດ ເອັສເອັມອີ ຈັດຂຶ້ນໃນວັນທີ 14-15 ມີນາ 2018, ກອງປະຊຸມສໍາມະນາລິເລີ່ມທຸລະກິດ ຈັດຂຶ້ນໃນວັນທີ 16 ມີນາ 2018, ງານແຂ່ງຂັນຊິງລາງວັນສັບປະດາການລິເລີ່ມທຸລະກິດ ກ່ຽວກັບນະວັດຕະກຳຜະລິດຕະພັນລາວ ແລະ ງານແຂ່ງຂັນການສະແດງສິລະປະຟ້ອນຂັ້ນປະ ຖົມ ແລະ ອື່ນໆ.

ງານວາງສະແດງດັ່ງກ່າວຄາດວ່າຈະມີປະຊາຊົນເຂົ້າຮ່ວມ 2 ພັນເທື່ອຄົນ ແລະ ຈະມີເງີນຫມູນວຽນ 1-2 ຕື້ກີບ, ທ່ານນາງ ຈັນທະຈອນ ວົງໄຊ ກ່າວ. ງານວາງສະແດງຜະລິດຕະພັນລາວຈັດຂຶ້ນທີ່ສູນການຄ້າລາວ-ໄອເຕັກ ທີ່ນະຄອນ ຫຼວງວຽງຈັນ ໃນລະຫວ່າງວັນທີ 14-18 ມີນາ 2018  ພ້ອມທັງ, ຊວນເຊີນບັນດາມວນຊົນຊາວນະຄອນຫລວງວຽງຈັນ ທີມີຄວາມສົນໃຈເຂົ້າຮ່ວມງານນີ້ດ້ວຍ.

ຂໍ້ມູນໂດຍ: ສະພາການຄ້າ ແລະ ອຸດສາຫະກໍາແຫ່ງຊາດລາວ

ຮຽບຮຽງໂດຍ: ພູຄໍາ ຫລວງສຸພົນ