ຕອນເຊົ້າ ວັນທີ 14 ມີນາ 2018, ກະຊວງອຸດສາຫະກໍາ ແລະ ການຄ້າ ໄດ້ຈັດພິທີສະເຫຼີມສະຫຼອງວັນແມ່ຍິງສາກົນ 8 ມີນາ ຄົບຮອບ 108 ປີ ພາຍໃຕ້ຄຳຂວັນ: “ເຖິງເວລາຮ່ວມໃຈປັບປຸງຊີວິດ ການເປັນຢູ່ຂອງແມ່ຍິງໃນຕົວເມືອງ ແລະ ຊົນນະບົດ” ແລະ ສຳມະນາຫົວຂໍ້ກ່ຽວກັບ: “ພະຍາດຕິດຕໍ່ທາງເພດສໍາພັນ(HIV)” ໂດຍການເປັນປະທານຮ່ວມ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ນ ຈັນສຸກ ແສງພະຈັນ ປະທານຄະນະບໍລິຫານງານ ສູນກາງສະຫະພັນແມ່ຍິງ ກະຊວງ ອຄ, ພ້ອມທັງ ທ່ານຫົວໜ້າຫ້ອງການ, ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ, ບັນດາເອື້ອຍ ນ້ອງແມ່ຍິງຈາກບັນດາ ກົມ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ບັນດາລັດວິສາຫະກິດທີ່ຂຶ້ນກະຊວງ, ສະພາການຄ້າ ແລະ ອຸດສາຫະກຳແຫ່ງຊາດ ແລະ ບັນດາທ່ານຫົວໜ້າ-ຮອງຫົວໜ້າກົມທ່ານຊາຍ ເຂົ້າຮ່ວມ ຫຼາຍກວ່າ 90 ທ່ານ.
ທ່ານ ນ ຈັນສຸກ ແສງພະຈັນ ປະທານຄະນະບໍລິຫານງານ ສູນກາງສະຫະພັນແມ່ຍິງ ກະຊວງ ອຄ ໄດ້ກ່າວຈຸດປະສົງ , ຫວນຄືນປະຫວັດຄວາມເປັນມາ ຂອງວັນທີ 8 ມີນາ 1910- 8 ມີນາ 2018 ຄົບຮອບ 108 ປີ ແລະ ລາຍງານສະພາບການຈັດຕັ້ງປະຕິບັດໃນໄລຍະ 1 ປີຜ່ານມາຂອງສະມາຊິກແມ່ຍິງ ອຄ ໂດຍໄດ້ຖືສໍາຄັນຕໍ່ວຽກງານສຶກສາອົບຮົບການເມືອງ-ແນວຄິດ ຊຶ່ງມັນໄດ້ສະແດງອອກໃນການເອົາໃຈໃສ່ເຂົ້າຮ່ວມເຊື່ອມຊຶມແນວທາງນະໂຍບາຍ, ມະຕິຄໍາສັ່ງ ແລະ ນິຕິກໍາຕ່າງໆຂອງພັກ-ລັດ. ພ້ອມດຽວກັນນີ້, ທ່ານ ນ ເຂັມມະນີ ພົນເສນາ ໄດ້ໃຫ້ການໂອ້ລົມຕໍ່ເອື້ອຍນ້ອງແມ່ຍິງ ໂດຍເນັ້ນໃສ່ ສະມາຊິກແມ່ຍິງພັດທະນາຕົນເອງຢ່າງຮອບດ້ານ, ການຈັດຕັ້ງປະຕິບັດວຽກງານຂອງແມ່ຍິງໃນຂະແໜງອຸດສາຫະກໍາ ແລະ ການຄ້າ ແມ່ນໃຫ້ສອດຄ່ອງກັບ 8 ແຜນງານ 34 ໂຄງການ ທີ່ຖືກຮັບຮອງຢູ່ກອງປະຊຸມ ສະພາແຫ່ງຊາດ ໃນວຽກງານຂອງສູນກາງສະຫະພັນແມ່ຍິງລາວ ແລະ ຮຽກຮ້ອງໃຫ້ເອື້ອຍນ້ອງແມ່ຍິງທັງໝົດທົ່ວກະຊວງ ອຄ ຈົ່ງເອົາໃຈໃສ່ ແລະ ເປັນເຈົ້າການປະຕິບັດຂໍ້ແຂ່ງຂັນ 3 ດີ ໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ;
ທ່ານ ດຣ. ຂັນທະນູວຽງ ທີມງານແພດຊ່ຽວຊານຈາກສູນຕ້ານເອສ ແລະ ພະຍາດຕິດຕໍ່ທາງເພດສໍາພັນ ໄດ້ເຜີຍແຜ່: ຄວາມເປັນມາ ແລະ ສະພາບລວມ HIV/AIDs, ຢູ່ ສປປ ລາວ ວຽກງານດັ່ງກ່າວແມ່ນນອນໃນ ເປົ້າໝາຍສະຫັດສະວັດ SDG 3 ຊຶ່ງລັດຖະບານໄດ້ວາງເປົ້າໝາຍໃນປີ 2030 ຈະສິ້ນສຸດໂລກເອສ, ວັນນະໂລກ, ມາເລເລັຍ, ພະຍາດຕິດຕໍ່ຕ່າງໆ ອື່ນໆອີກ…ພ້ອມທັງສະເໜີວິທີການປ້ອງກັນການຕິດເຊື້ອ HIV/AIDs ສໍາລັບກຸ່ມສ່ຽງໂດຍສະເພາະພະນັກງານເຄື່ອນທີ່ ໂດຍການນໍາໃຊ້ຖົງຢາງອະນາໄມໃນເວລາມີເພດສໍາພັນ;
ນອກຈາກນີ້, ຍັງມີກິດຈະກໍາຂາຍເຄື່ອງ, ຂາຍອາຫານ, ເຄື່ອງດື່ມ ແລະ ເຄື່ອງຫັດຖະກຳລາວ ທີ່ເອື້ອຍນ້ອງແມ່ຍິງກະຊວງໄດ້ວາງສະແດງຂາຍ ຢູ່ດ້ານໜ້າກະຊວງອຸດສາຫະກໍາ ແລະ ການຄ້າ.
[ຂ່າວໂດຍ: ນ ຖື]
