ໃນວັນທີ 15 ມີນາ(03) 2018 ທີ່ຜ່ານ ສະພາການຄ້າ ແລະ ອຸດສາຫະກໍາ ແຂວງຫຼວງພະບາງໄດ້ຈັດກອງປະຊຸມພົບປະທຸລະກິດລະຫວ່າງ ນັກທຸລະກິດ ແຂວງຫຼວງພະບາງ ແລະ ບັນດານັກທຸລະກິດຈາກແຂວງຕອນລ່າງ1 ຂອງປະເທດໄທຂຶ້ນຢູ່ທີ່ ຫ້ອງປະຊຸມ ພະແນກ ກະສິກໍາ ແລະ ປ່າໄມ້ແຂວງ ພາຍໃຕ້ການເປັນປະທານຮ່ວມຂອງ ທ່ານ ບຸນທ່ຽງ ສຸລິວັນ ປະທານ ສະພາການຄ້າ ແລະ ອຸດສາຫະກໍາ ແຂວງຫຼວງພະບາງ ແລະ ທ່ານ ສິງ ພົງສຸດ ປະທານສະພາອຸດສາຫະກໍາກຸ່ມແຂວງຕອນລ່າງ1, ຝ່າຍລາວມີຜູ້ຕາງໜ້າຈາກ ພະແນກ ການເສດຖະກິດ ແລະ ນັກທຸລະກິດເຂົ້າຮ່ວມຢ່າງພ້ອມພຽງ, ສ່ວນຝ່າຍໄທ ແມ່ນປະກອບມີບັນດານັກທຸລະກິດ, ຜູ້ປະກອບການຫຼາກຫຼາຍສາຂາອາຊີບຈາກ 5 ແຂວງພາກເໜືອຕອນລ່າງ1 ຂອງໄທເຂົ້າຮ່ວມຄື: ແຂວງ ອຸຕະລະດິດ, ສຸໂຂໄທ, ພິດສະນຸໂລກ, ເພັດສະບູນ ແລະ ແຂວງ ຕາກ, ເຊິ່ງນີ້ເປັນກິດຈະກໍາໃນສ່ວນໜຶ່ງຂອງການກະກຽມກອງປະຊຸມ ແລວເສດຖະກິດ ຫຼວງພະບາງ-ອິນໂດຈີນ ເງາະລໍາໄຍ ຄັ້ງທີ IV ເຊິ່ງຈະໄດ້ຈັດຂຶ້ນທີ່ ແຂວງ ພິດສະນຸໂລກປະເທດໄທ ໃນເດືອນ ມິຖຸນາ(06) 2018 ນີ້.
ກອງປະຊຸມໃນຄັ້ງນີ້ ໄດ້ເປີດໂອກາດໃຫ້ກັບບັນດານັກທຸລະກິດ, ຜູ້ປະກອບການໄດ້ມີການມາພົບປະເຈລະຈາ-ຕໍ່ລອງທຸລະກິດ ແລະ ສ້າງຄູ່ຮ່ວມທຸລະກິດຮ່ວມກັນໃນອະນາຄົດ ໂດຍມີການນໍາສະເໜີ-ແລກປ່ຽນຊື້ຂາຍຜະລິດຕະພັນທີ່ຕົນເອງມີ ແລະ ສິ່ງທີ່ຕ້ອງການຊື້ຮ່ວມກັນ, ພ້ອມດຽວກັນນີ້ກໍ່ຍັງໄດ້ມີການປຶກສາຫາລືກະກຽມຜູ້ປະກອບການທາງດ້ານ ການຄ້າ-ການລົງທຶນ, ການສຶກສາ, ການທ່ອງທ່ຽວ, ສຸຂະ ພາບ ແລະ ໂລຈິດສ໌ຕິກ ເພື່ອເຂົ້າຮ່ວມກອງປະຊຸມ LIMEC IV ທີ່ຈະຈັດຂື້ນຢູ່ແຂວງ ພິດສະນຸໂລກ ປະເທດໄທ ໃນເດືອນ ພຶດສະພາ(05) ແລະ ມິຖຸນາ(06) ທີ່ຈະມາເຖິງນີ້ ໂດຍຈະມີນັກທຸລະກິດຈາກ 3 ປະເທດຄື: ລາວ, ໄທ ແລະ ມຽນມ້າເຂົ້າຮ່ວມ ພ້ອມດຽວກັນນັ້ນກໍ່ຈະມີການຈັດງານວາງສະແດງສິນຄ້ານາໆຊາດໃນຊ່ວງການປະຊຸມດັ່ງກ່າວອີກດ້ວຍ.
ໝາຍເຫດ: ສໍາລັບຜູ້ທີ່ສົນໃຈເຂົ້າຮ່ວມກອງປະຊຸມພົບປະ, ຈັບຄູ່ທຸລະກິດ ແລະ ງານວາງສະແດງສິນຄ້າ LIMEC Expo ທີ່ ແຂວງພິສະນຸໂລກ ປະເທດໄທ ສາມາດຕິດຕໍ່ສອບຖາມຂໍ້ມູນມາໄດ້ທີ່: ສະພາການຄ້າ ແລະ ອຸດສາຫະກໍາ ແຂວງຫຼວງພະບາງ, ໂທ 071 252 383/ 020 2213 2686, 020 23506610
ແຫຼ່ງຂ່າວໂດຍ: ສະພາການຄ້າ ແຂວງຫລວງພະບາງ
ຮຽບຮຽງໂດຍ: ພູຄໍາ ຫລວງສຸພົນ
