ໃນວັນທີ 17 ພຶດສະພາ 2018 ທີ່ກະຊວງ ອຄ, ທ່ານ ຈັນສີ ໂພສີຄຳ ຫົວໜ້າຄະນະຈັດຕັ້ງສູນກາງພັກ ໄດ້ໂອ້ລົມຕໍ່ກອງປະຊຸມວຽກງານການຈັດຕັ້ງ, ກໍ່ສ້າງພັກ – ພະນັກງານ ແລະ ວຽກງານກວດກາຂອງກະຊວງອຸດສາຫະກຳ ແລະ ການຄ້າ (ອຄ) ປະຈໍາປີ 2017 ວ່າ: “ໃນໜື່ງປີຜ່ານມາ ຄະນະພັກ, ຄະນະນຳກໍ່ຄືຄະນະກວດກາ ແລະ ຄະນະຈັດຕັ້ງ, ກໍ່ສ້າງພັກ-ພະນັກງານບັນດາກະຊວງ, ອົງການ ແລະ ທ້ອງຖິ່ນໄດ້ເອົາໃຈໃສ່ຢ່າງຕັ້ງໜ້າຕໍ່ວຽກງານ ບັນຈຸຊັບຊ້ອນ, ປັບປຸງກົງຈັກການຈັດຕັ້ງ, ຄຸ້ມຄອງ, ບຳລຸງ, ກໍ່ສ້າງ-ພະນັກງານຢ່າງເປັນລະບົບປົກກະຕິ ແລະ ຕໍ່ເນື່ອງ, ເອົາໃຈໃສ່ຕິດຕາມ, ກວດກາພາຍໃນພັກ, ກວດກາຄຸ້ມຄອງການບໍລິຫານລັດ, ການສະກັດກັ້ນ ແລະ ຕ້ານການສໍ້ລາດບັງຫຼວງ, ຄົ້ນຄວ້າແກ້ໄຂຄຳຮ້ອງ-ຄຳສະເໜີຂອງສະມາຊິກພັກ – ພະນັກງານ ແລະ ພົນລະເມືອງມີອັນພົ້ນເດັ່ນ. ສິ່ງທີ່ກ່າວມາຂ້າງເທິງນີ້ໄດ້ສະແດງໃຫ້ເຫັນເຖິງຄວາມຮັບຜິດຊອບໃນການຊີ້ນຳ – ນຳພາ ແລະ ຄວາມເອົາໃຈໃສ່ຂອງຄະນະພັກ, ຄະນະນຳ ກໍ່ຄືຄະນະກວດກາ ແລະ ຄະນະກະຊວງ ອຄ ຂອງພວກເຮົາ ໃນການຈັດຕັ້ງ ປະຕິບັດໜ້າທີ່ວຽກງານຕາມເຂດຄວາມຮັບຜິດຊອບຂອງຕົນ ຂ້າພະເຈົ້າຂໍສະແດງຄວາມຍ້ອງຍໍ ແລະ ຊົມເຊີຍຢ່າງສຸດອົກສຸດໃຈມາໃນໂອກາດນີ້”.
ເຖິງຢ່າງໃດກໍ່ຕາມ, ຍັງມີດ້ານອ່ອນ ແລະ ຂໍ້ຄົງຄ້າງຈຳນວນໜື່ງທີ່ຈະຕ້ອງໄດ້ບຸກບືນສູ້ຊົນ ໂດຍສະເພາະຄະນະກວດກາແຕ່ລະຂັ້ນເຖິງແມ່ນວ່າໄດ້ມີຄວາມພະຍາຍາມໃນການເຄື່ອນໄຫວ ແຕ່ການເຄື່ອນໄຫວຜ່ານມາຍັງລັກສະນະລໍຖ້າແຕ່ຄຳສັ່ງຫຼາຍກວ່າ ບໍ່ທັນເປັນເຈົ້າການເຄື່ອນໄຫວກວດກາເປັນປົກກະຕິຕາມພາລະບົດບາດຂອງຕົນ, ການກວດກາຂອງບັນດາກົມ ແລະ ທ້ອງຖີ່ນຕ່າງໆ ບໍ່ທັນດຳເນີນເປັນລະບົບຕໍ່ເນື່ອງ, ບັນຫາເກີດຂື້ນຢູ່ບ່ອນໃດຈຶ່ງໄປກວດກາບ່ອນນັ້ນ, ການເກັບກຳສະພາບການຈັດຕັ້ງ ແລະ ການເຄື່ອນໄຫວຂອງບຸກຄົນບໍ່ທັນໄດ້ດີ, ການໂຄສະນາຊວນເຊື່ອໃຫ້ມະຫາຊົນເຂົ້າຮ່ວມວຽກງານຈັດຕັ້ງ, ກໍ່ສ້າງພັກ – ພະນັກງານວຽກງານກວດກາບໍ່ທັນກວ້າງຂວາງ.
ການປັບປຸງກົງຈັກການຈັດຕັ້ງ, ພາລະບົດບາດຂອງຄະນະກວດກາແຕ່ລະຂັ້ນ ແລະ ຄະນະຈັດຕັ້ງຈຳນວນໜື່ງຊັກຊ້າ, ຈໍານວນພະນັກງານກວດກາ ແລະ ຈັດຕັ້ງໂດຍລວມແລ້ວຍັງມີໜອ້ຍ ໂດຍສະເພາະຢູ່ຂະແໜງກວດກາລັດ ແລະ ພະນັກ ງານຮັບຜິດຊອບວຽກງານຈັດຕັ້ງຢູ່ບັນດາພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ບົດຮຽນ ແລະ ປະສົບການໃນການຕິດຕາມ, ກວດກາ, ອົບຮົມບຳລຸງ, ກໍ່ສ້າງພັກ – ພະນັກງານຍັງຈຳກັດ, ຄວາມຮູ້ – ຄວາມສາມາດຍັງບໍ່ທັນຕອບສະໜອງໄດ້ຕາມຄວາມຕ້ອງການຂອງວຽກງານຕົວຈິງ ເຊິ່ງທັງໜົດນີ້ແມ່ນບັນຫາຄົງຄ້າງທີ່ພວກເຮົາຈະຕ້ອງໄດ້ແກ້ໄຂ, ທ່ານ ຈັນສີ ໂພສີຄຳ ກ່າວ.
ດັ່ງນັ້ນ, ໃນຕໍ່ໜ້ານີ້ເພື່ອເປັນການສະກັດກັ້ນ ແລະ ແກ້ໄຂບັນຫາປະກົດການຫຍໍ້ທໍ້ຕ່າງໆ ຢູ່ພາຍໃນຂອງພວກເຮົາໃຫ້ໝົດໄປ ພວກເຮົາຕ້ອງໄດ້ເພີ່ມຄວາມເອົາໃຈໃສ່ບາງບັນຫາ ດັ່ງນີ້:
- ຄົ້ນຄວ້າ, ວາງລະບອບ, ລະບຽບ ແລະ ກົນໄກກ່ຽວກັບການຕິດຕາມ, ກວດກາລະຫວ່າງການຈັດຕັ້ງດ້ວຍກັນ, ການກວດກາຂອງການຈັດຕັ້ງຕໍ່ບຸກຄົນ ແລະ ກວດກາຂອງຂັ້ນເທິງຕໍ່ຂັ້ນລຸ່ມໃຫ້ດຳເນີນຢ່າງເປັນລະບົບປົກກະຕິ, ປະສານສົມທົບການກວດກາຂອງພັກກັບການກວດກາຂອງລັດ ແລະ ການກວດກາຂອງບັນດາອົງການຈັດຕັ້ງມະຫາຊົນໃຫ້ເໝາະສົມກົມກຽວ, ເພີ່ມທະວີລະບອບການກວດກາເພື່ອສະກັດກັ້ນດ້ານຫຍໍ້ທໍ້ຕິດພັນກັບການກວດກາ ເພື່ອເສີມຂະຫຍາຍດ້ານຕັ້ງໜ້າ ແລະ ປັດໄຈໃໝ່,ສ້າງເງື່ອນໄຂໃຫ້ມະຫາຊົນໄດ້ເຂົ້າຮ່ວມໃນການຕິດຕາມກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ແລະ ປັບປຸງກົງຈັກການຈັດຕັ້ງ, ບຳລຸງສ້າງພະນັກງານໄດ້ຢ່າງເປັນເຈົ້າການ;
- ຄະນະພັກທຸກຂັ້ນຕ້ອງຖືເອົາການຕິດຕາມ, ກວດກາ ແລະ ການຕິຊົມຕົນເອງ, ຕິຊົມກັນຢ່າງເປັນປະຈຳ ເປັນມາດຕະການສຳຄັນໃນການສະກັດກັ້ນສິ່ງຫຍໍ້ທໍ້ພາຍໃນພັກ, ຄະນະພັກຂັ້ນເທິງຕ້ອງເປັນແບບຢ່າງ ແລະ ຕິດຕາມ,ກວດກາສະມາຊິກພັກ, ພະນັກງານທີ່ຢູ່ໃນຂອບເຂດການນຳພາຄຸ້ມຄອງຂອງຕົນສະເໝີ. ພ້ອມກັນນັ້ນ,ກໍ່ຕ້ອງມີລະບົບເຮັດໃຫ້ຂັ້ນລຸ່ມສະແດງຄວາມຄິດເຫັນສົ່ງຂ່າວຕໍ່ການນຳພາຂອງຄະນະພັກຂັ້ນເທິງ ໂດຍຄະນະພັກຂັ້ນເທິງຕ້ອງເປັນເຈົ້າການສ້າງໂອກາດອຳນວຍໃຫ້.
ຂ່າວໂດຍ: ພູຄໍາ ຫລວງສຸພົນ
