ໃນລະຫວ່າງວັນທີ 31 ພຶດສະພາ 02 ມີຖຸນາ 2018 ທີ່ ໂຮງແຮມລາວພຣາຊາ, ນະຄອນຫຼວງວຽງຈັນໄດ້ໄຂກອງປະຊຸມຄະນະຈັດຕັ້ງປະສານງານການຄ້າດ້ານສິນຄ້າອາຊຽນ ຄັ້ງທີ 27 (27^th Coordinating Committee on Implementation of the ATIGA-CCA), ໂດຍມີຜູ້ເຂົ້າຮ່ວມທັງໝົດຈໍານວນ 70 ທ່ານ ຈາກປະເທດສະມາຊິກອາຊຽນດ້ວຍກັນ.

ກອງປະຊຸມໃນຄັ້ງນີ້ ຈຸດປະສົງຫຼັກກໍໍ່ເພື່ອສືບຕໍ່ປຶກສາຫາລືຜົນຂອງກອງປະຊຸມຄັ້ງທີ່ຜ່ານມາ ໂດຍແນໃສ່ສົ່ງເສີມການຂະຫຍາຍການເປີດຕະຫຼາດໃນແກ່ກັນ ແລະ ກັນລະຫວ່າງປະເທດສະມາຊິກອາຊຽນ. ເຮັດໃຫ້ການໄຫຼວຽນຂອງສິນຄ້າຢູ່ພາຍໃນອາຊຽນໄດ້ມີການຊື້້ຂາຍຮ່ວມກັນເພີ່ມສູງຂຶ້ນ, ຫຼຸດຜ່ອນບັນດາຂອດຂັ້້ນຕ່າງຯທີ່ບໍ່ຈຳເປັນ ຊຶ່ງຈະເປັນອຸປະສັກຕໍ່ການຄ້າ.

     ປະເດັນທີ່ພົ້ນເດັ່ນທີ່ຈະປຶກສາຫາລື ແລະ ສະຫຼຸບຮ່ວມກັນ ລວມມີ: ວຽກງານການໂອນຖ່າຍສາລະບານອັດຕາພາສີສະບັບ AHTN 2012 ເປັນ AHTN 2017, ການທົບທວນການປະຕິບັດຫຼັກການ MFN ແບບອັດຕະໂນມັດ, ບັນຫາການສົ່ງອອກສາລີຂອງລາວ, ໄທ ແລະ ພະມ້າ ໄປໄທ, ການລົບລ້າງອັດຕາພາສີໂຄຕາ (Tariff Rate Quota “TRQ”), ການຈັດຕັ້ງປະຕິບັດການອອກໃບຢັ້ງຢືນດ້ວຍຕົວເອງຂອງອາຊຽນ, ການຈັດຕັ້ງປະຕິບັດການນຳໃຊ້ E-Form D ຜ່ານລະບົບລະບົບປະຕູດຽວອາຊຽນ (ASW), ການປະກອບຖານສະຖິຕິຕົວເລກການຄ້າອາຊຽນ, ຖານຂໍ້ມູນທາງດ້ານການຄ້າອາຊຽນ (NTR/ATR) ຜ່ານໂຄງການຊ່ວຍເຫຼືອຈາກ EU ARISE, ແລະ Non-paper ຂອງ ສປປ ລາວ ກ່ຽວກັບການສົ່ງເສີມການສົ່ງອອກຂອງປະເທດ CLMV.

                                                           ແຫຼ່ງຂ່າວໄດ້ຈາກກົມນະໂຍບາຍການຄ້າຕ່າງປະເທດ ກະຊວງ ອຄ

ຮຽບຮຽງໂດຍ: ໄພຄໍາອີ ວິໄລຄໍາ