ຕອນເຊົ້າ ເວລາ 9: 00 ໂມງ ຂອງວັນທີ 3 ກໍລະກົດ 2018 ທີ່ຫ້ອງຮັບແຂກຊັ້ນ 4 ຂອງກະຊວງອຸດສາຫະກໍາ ແລະ ການຄ້າ ທ່ານ ພັນທອງ ພິດທຸມມາ  ຮອງລັດຖະມົນຕີ​ ກະ​ຊວງ​ ອຄ ໄດ້​ຕ້ອນຮັບ​​ການເຂົ້າພົບປະ​ ​  ຂອງ  Doctor PhD, Sergey Kraevoy, ຮອງລັດຖະມົນຕີ ກະຊວງ ສາທາລະນະສຸກ ແຫ່ງສະຫະພັນລັດເຊຍ ພ້ອມດ້ວຍຄະນະ ໃນການເດີນທາງ ແລະ ພົບປະຄັ້ງນີ້ ເພື່ອມາແຈ້ງເຂົ້າຮ່ວມກອງປະຊຸມ ປຶກສາຫາລື ແລະ ເຜີຍແຜ່ຂໍ້ມູນຂ່າວສານ ກ່ຽວກັບຄວາມ ປອດໄພໃນການຜະລິດ ແລະ ນໍາໃຊ້ທາດໄຍຫີນຂາວ ທີ່ໄດ້ຈັດຂຶ້ນໃນຕອນບ່າຍ ເວລາ 1 : 30 ນາທີ ຂອງວັນທີ 3 ກໍລະກົດ 2018 ທີ່ໂຮງແຮມລາວພລາຊາ, ນະຄອນຫຼວງວຽງຈັນ. ໃນນີ້ມີຜູ້ຕາງໜ້າ​ຈາກທັງສອງຝ່າຍເຂົ້າຮ່ວມຈໍານວນ 12 ກວ່າທ່ານ.

         ການ​ເຂົ້າຢ້ຽມ​ພົບປະທັງສອງຝ່າຍຍັງໄດ້ຍົກບັນຫາປຶກສາຫາລື ກ່ຽວກັບຂີດໝາຍອັນສໍາຄັນຂອງສອງຝ່າຍໃນການເສີມຂະຫຍາຍສາຍພົວພັນຮ່ວມມືໃນໄລຍະຜ່ານມາ ພ້ອມທັງຕີລາຄາສູງຕໍ່ການພົວພັນຮ່ວມມືທີ່ດີ ຂອງ ສປປ ລາວ ກັບສະຫະພັນລັດເຊຍ, ນອກຈາກນີ້ທັງສອງຝ່າຍຍັງໄດ້ຍົກໃຫ້ເຫັນ ຂະແໜງອຸດສາຫະກໍາ, ກະສິກໍາ, ສາທາລະນະສຸກ ແລະ ຂະແໜງການອື່ນ ເພື່ອເຮັດໃຫ້ການຄຸ້ມຄອງເຄມີໃຫ້ມີຄວາມປອດໄພ, ຮັບປະກັນຫຼຸດຜ່ອນຜົນກະທົບຕໍ່ຊີວິດຊັບສິນ  ສິ່ງແວດລ້ອມ ເພື່ອແນໃສ່ເຮັດໃຫ້ການດໍາເນີນທຸລະກິດກ່ຽວກັບເຄມີ ມີຄວາມຍືນຍົງ ແລະ ໄປຕາມທິດພັດທະນາສີຂຽວ ຂອງ ສປປ ລາວ.

        ໃນຕອນທ້າຍ ທ່ານ ພັນທອງ ພິດທຸມມາ  ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ  ສະແດງຄວາມຍິນດີຕ້ອນຮັບ ແລະ ການໃຫ້ຄວາມຮ່ວມມືເປັນຢ່າງດີ ຂອງ, Doctor PhD, Sergey Kraevoy ຮອງລັດຖະມົນຕີກະຊວງສາທາລະນະສຸກ ແຫ່ງສະຫະພັນລັດເຊຍ; ພ້ອມກັນນີ້ ທ່ານຮອງລັດຖະມົນຕີ ກະຊວງສາທາລະນະສຸກ ແຫ່ງສະຫະພັນລັດເຊຍ ກໍ່ສະແດງຄວາມຂອບໃຈມາຍັງທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າລາວ ທີ່ໃຫ້ການຕ້ອນຮັບຢ່າງອົບອຸ່ນ ດ້ວຍໄມຕີຈິດມິດຕະພາບທີ່ດີຕໍ່ກັນ.

 ໂດຍ: ໄພຄໍາອີ ວິໄລຄໍາ