ຕອນເຊົ້າ ເວລາ 9: 30 ໂມງ ຂອງວັນທີ 1 ສິງຫາ 2018 ກົມການຄ້າພາຍໃນ ກະຊວງອຸດສາຫະ ກໍາ ແລະ ການຄ້າ ນໍາໂດຍ ທ່ານ ບຸນທຽນ ແກ້ວສີພາ ຄະນະພັກກະຊວງ ຫົວໜ້າກົມການຄ້າພາຍໃນ ແລະ ຕາງໜ້າພະແນກອຸດສາຫະກໍາ ແລະ ການຄ້ານະຄອນຫຼວງ ພ້ອມຄະນະວິຊາການທີ່ກ່ຽວຂ້ອງ ໄດ້ລົງຕິດຕາມພົບປະເຮັດວຽກກັບບັນດາທ່ານປະທານ ບໍລິສັດ ວຽງຈັນການກະເສດການຄ້າ, ບໍລິສັດ ແຫຼມທອງການຄ້າ ແລະ ບໍລິສັດ ສົມຫວັງການຄ້າ ທີ່ເປັນຕົວແທນຈໍາໜ່າຍສິນຄ້ານໍາເຂົ້າຈາກໂຮງງານຕ່າໆ ພາຍໃນນະຄອນຫຼວງ.
ກ່ຽວກັບສິນຄ້າປະເພດເຄື່ອງອຸປະໂພກ-ບໍລິໂພກ ແລະ ສິນຄ້າທົ່ວໄປ ທີ່ນໍາເຂົ້າຈໍາໜ່າຍຕາມຕະຫຼາດ, ຫ້າງຮ້ານຕ່າງໆຕ້ອງຕິດສະຫຼາກເປັນພາສາລາວ ເພື່ອໃຫ້ຖືກຕ້ອງສອດຄ່ອງກັບລະບຽບກົດໝາຍ, ແລະ ນິຕິກໍາຕ່າງໆ ຂອງ ສປປ ລາວ.
ທ່ານ ບຸນທຽນ ແກ້ວສີພາ ຫົວໜ້າກົມການຄ້າພາຍໃນໄດ້ຊີ້ແຈງ ເພື່ອສ້າງຄວາມເຂົ້າໃຈລະຫວ່າງເບື້ອງລັດ ແລະ ບໍລິສັດຜູ້ນໍາເຂົ້າສິນຄ້າຈໍາໜ່າຍພາຍໃນປະເທດຢ່າງຖືກຕ້ອງເໝາະສົມ, ໂດຍສິນຄ້າທີ່ນຳເຂົ້າແມ່ນຕ້ອງຕິດສະຫຼາກສິນຄ້າເປັນພາສາລາວ ບໍ່ວ່າຈະຢູ່ໃນຂອດການ ຂາຍຍົກ – ຂາຍຍ່ອຍ ຫຼື ຂອດບໍລິການ ເພື່ອຫຼີກເວັ້ນປັດໄຈການສວຍໂອກາດສິນຄ້າທີ່ລົບຫຼີກການເສຍພາສີ.
ນອກຈາກນັ້ນຍັງໄດ້ສະເໜີໃຫ້ບັນດາ ບໍລິສັດ ເອົາໃຈໃສ່ສິນນຄ້າທີ່ໝົດອາຍຸການນໍາໃຊ້ໃຫ້ກວດກາຕິດຕາມ ແລະ ຊອກຫາວິທີແກ້ໄຂຢ່າງເໝາະສົມ ເພື່ອບໍ່ໃຫ້ເກີດມີ ສິ່ງທີ່ເປັນໄພຕໍ່ສຸຂະພາບຂອງຜູ້ບໍລິໂພກ.
ຂ່າວໂດຍ: ໄພຄໍາອີ ວິໄລຄໍາ
