ຕອນເຊົ້າ ເວລາ 10: 00 ໂມງ ຂອງວັນທີ 16 ສິງຫາ 2018 ທີ່ຫ້ອງສ່ອງແສງຊັ້ນ II ກະຊວງອຸດສາຫະກໍາ ແລະ ການຄ້າ ໄດ້ມີພິທີເຊັນມອບຮັບລົດ ຊ່ວຍເຫຼືອລ້າຈາກລັດຖະບານ ສປ ຈີນ ຊຶ່ງມອບໂດຍ ທ່ານ ຫວັງ ສີ ຮຸ້ຍ (wang gi hui) ທີ່ປຶກສາທູດເສດຖະກິດການຄ້າ ສປ ຈີນ ປະຈໍາລາວ ກ່າວຮັບ ຝ່າຍລາວນໍາໂດຍ ທ່ານ ບຸນມີ ມະນີວົງ ຮອງເລຂາພັກກະຊວງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ພ້ອມດ້ວຍຕາງໜ້າຂອງຝ່າຍລາວເຂົ້າຮ່ວມ ມີທ່ານຫົວໜ້າຫ້ອງການ, ຫົວໜ້າກົມ, ຫົວໜ້າພະແນກ ຮອງພະແນກ ແລະ ພາກສ່ວນທີ່ກ່ຽວຂ້ອງ ຂອງຝ່າຍຈີນ ເຂົ້າຮ່ວມປະມານ 15 ກວ່າ ທ່ານ.
ໃນການມອບຮັບລົດຊວ່ຍເຫຼືອ ລ້າ ໃນຄັ້ງນີ້ ຈັດຂຶ້ນພາຍໃຕ້ຊື່ໂຄງການ ການຊ່ວຍເຫຼືອລ້າ ຈາກລັດຖະບານ ສປ ຈີນທີ່ໃຫ້ການຊ່ວຍເຫຼືອດ້ານສິນຄ້າ ແລະ ວັດສະດຸ ແກ່ກະຊວງອຸດສາຫະກໍາ ແລະ ການຄ້າ ສປປ ລາວ ໃນນີ້ ມີພາຫະນະລົດ 7 ຄັນ ພ້ອມດ້ວຍ ອາໄຫຼ່ຈໍານວນໜຶ່ງ ລວມມີມູນຄ່າທັງໝົດ 3.300.000 ຢວນ ( 3 ລ້ານ 3 ແສນ ຢວນ) ໂດຍທາງລັດຖະບານ ສປ ຈີນມອບໃຫ້ ບໍລິສັດ ຊິງຕ໋າວ ເອົາເຄີມ໋າ ຂາອອກ-ຂາເຂົ້າ ຈໍາກັດ ເປັນຜູ້ຮັບຜິດຊອບ ຈັດຕັ້ງປະຕິບັດໂຄງການ, ລົດດັ່ງກ່າວຈະນໍາໃຊ້ເຂົ້າ ໃນວຽກງານຂົງເຂດຂະແໜງອຸດສາຫະກໍາ ແລະ ການຄ້າ.
ຕອນທ້າຍ ທ່ານ ບຸນມີ ມະນີວົງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຂອບໃຈມາຍັງ ລັດຖະບານ ສປ ຈີນ ທີ່ໃຫ້ການຊ່ວຍເຫຼືອລ້າ ກໍຄື ທ່ານ ຫວັງ ສີ ຮຸ້ຍ (wang gi hui) ຜູ້ຕາງໜ້າ ທີ່ປຶກສາທູດເສດຖະກິດການຄ້າ ສປ ຈີນ ປະຈໍາລາວ ພ້ອມທັງການໃຫ້ຄວາມຮ່ວມມືເປັນຢ່າງດີ ດ້ວຍໄມຕີຈິດ.
ຂ່າວໂດຍ: ໄພຄໍາອີ ວິໄລຄໍາ
