ຕອນບ່າຍ ເວລາ 3: 30 ໂມງ ຂອງວັນທີ 10 ຕຸລາ 2018 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ   ອຸດສາຫະກໍາ ແລະ ການຄ້າ ໄດ້ມີການຕ້ອນຮັບພົບປະ ທ່ານ ນາງ ເຂັມມະນີ ພົນເສນາ  ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ນາງ ຟລໍຮ້ອງສ ຊ້ອງບລ້ອງ-ຣີສແລກ, ເອກອັກຄະລັດຖະທູດ ຝຣັ່ງ ປະຈໍາ ສປປ ລາວ ຄົນໃໝ່ ເນື່ອງໃນໂອກາດທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງເອກອັກຄະລັດຖະທູດຄົນໃໝ່ ປະຈໍາ ສປປ ລາວ,  ຊຶ່ງມີສໍານັກງານ ສະຖານທູດຕັ້ງຢູ່ ສປປ ລາວ. ການເຂົ້າຢ້ຽມຂໍ່ານັບພົບປະຄັ້ງນີ້ ມີຜູ້ຕາງໜ້າ​ຈາກທັງສອງຝ່າຍເຂົ້າຮ່ວມ ຈໍານວນ 8 ​ທ່ານ.

        ໃນໂອກາດນີ້ ສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນຫຼາຍດ້ານ ຄື: ດ້ານການຄ້າ, ການຮ່ວມມື, ການລົງທຶນ ແລະ ການຊ່ວຍເຫຼືອບັນດາໂຄງການອື່ນທີ່ຜ່ານມາ, ນອກນັ້ນຍັງໄດ້ປຶກສາຫາລືກັນໃນວຽກງານຫຼາຍດ້ານທີ່ປິ່ນອ້ອມເປັນຟື້ນຖານໂຄງລ່າງໃຫ້ແກ່ລາວ. ໃນນີ້ທ່ານ ເອກອັກຄະລັດຖະທູດ ໄດ້ນໍາສົ່ງຄວາມຢ້ຽມຢາມຖາມຂ່າວຈາກ ທ່ານ Pascal Lamy ອາດີດຜູ້ອໍານວຍການໃຫຍ່ ອົງການ ການຄ້າໂລກ (WTO) ໄດ້ຝາກຄວາມຢ້ຽມຢາມຖາມຂ່າວເຖີງ ທ່ານ ລັດມົນຕີ ກະຊວງ ອຄ ເຊິ່ງປັດຈຸບັນທ່ານໄດ້ກັບຄືນປະເທດ ນະຄອນຫຼວງປາຣີ (PARY).

        ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ  ສະແດງຄວາມຍີນດີຊົມເຊີຍຕ້ອນຮັບ ແລະ ການໃຫ້ຄວາມຮ່ວມມືເປັນຢ່າງດີ ທ່ານ ເອກອັກຄະລັດຖະທູດ ປະຈໍາ ສປປ ລາວ ຄົນໃໝ່ ແລະ ທ່ານ ເອກອັກຄະລັດຖະທູດ ກໍ່ສະແດງຄວາມຂອບໃຈ ມາຍັງທ່ານລັດຖະມົນຕີ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດ.

ຂ່າວໂດຍ: ໄພຄໍາອີ ວິໄລຄໍາ