ໃນວັນທີ 11 ທັນວາ 2018 ເວລາ 9:00 ໂມງ, ທີ່ ໂຮງແຮມ ຊາລານາ, ນະຄອນຫຼວງວຽງຈັນ ໄດ້ມີພິທີມອບຮັບ – ປຶ້ມຄູ່ມືການຍ້ອມສີທໍາມະຊາດ, ໂດຍໃຫ້ກຽດເປັນປະທານທ່ານ ນາງ ບານສະຕິ ເທບພະວົງ ຫົວໜ້າຫ້ອງການ ກະຊວງອຸດສາຫະກໍາ ແລະ ການຄ້າ ແລະ ທ່ານ ນາງ ອາເລັກຊານເດຍ ຮູເອຕາ (Alexandria Huerta) ຜູ້ອຳນວຍ ການ ອົງການ USAID ປະຈຳ ສປປ ລາວ, ພ້ອມດ້ວຍທ່ານ ແດນຽວ ຟິດສ໌ແພັດທຼິກ (Daniel Fitzpatrick) ຫົວໜ້າໂຄງການ USAID LUNA II ແລະ ຕົວແທນຜູ້ປະກອບການຂອງແຂວງຊໍາເໜືອ, ແຂວງຊຽງຂວາງ, ບັນດາກົມອ້ອມຂ້າງກະຊວງ ແລະ ພະນັກງານຮັບຜິດຊອບໂຄງການ ກໍ່ໃຫ້ກຽດເຂົ້າຮ່ວມ.
ພິທີດັ່ງກ່າວ ແມ່ນ–ສະໄດ້ຫຼຸບຄືນຜົນສຳເລັດການຈັດຕັ້ງປະຕິບັດ ກິດຈະກຳຂອງໂຄງການສົ່ງເສີມຜູ້ປະກອບກິດຈະການເພດຍິງ ດ້ານຫັດຖະກຳແຜ່ນແພ, ໂດຍສະເພາະແມ່ນພາກເໜືອຂອງລາວ ໃຫ້ມີຄວາມສາມາດສົ່ງອອກ, ຊຶ່ງຜົນສຳເລັດນັ້ນມັນໄດ້ສະແດງໃຫ້ເຫັນເຖິງຕົວຊີ້ວັດ ທີ່ໄດ້ບັນລຸຄາດໝາຍຂອງໂຄງການ, ສະນັ້ນ ເພື່ອໃຫ້ບັນດາທ່ານໄດ້ຮັບຮູ້ຄວາມເປັນມາຂອງຜົນສຳເລັດນີ້, ຕົວແທນຂອງຜູ້ປະກອບການຈາກ ແຂວງຊຽງຂວາງ ແລະ ແຂວງຫົວພັນ ໄດ້ເຖິງຜົນໄດ້ຮັບຂອງການເຂົ້າຮ່ວມກິດຈະກຳການຝຶກອົບຮົມ “ການຍ້ອມສີທຳມະຊາດ ແລະ ການຕະຫຼາດອອນລາຍ” ຊຶ່ງໄດ້ຮັບການສະໜັບສະໜູນຈາກ ໂຄງການ USAID LUNA II.
ນອກນີ້ຄະນະຮັບຜິດຊອບໂຄງການຍັງໄດ້ສ້າງປຶ້ມຄູ່ມືການຍ້ອມສີທຳມະຊາດ ແລະ ຈັດພິມ ຈຳນວນ 1,500 ເຫຼັ້ມ ເພື່ອແຈກຢາຍໃຫ້ແກ່ກຸ່ມຜູ້ຜະລິດ. ສະນັ້ນ, ເຫັນວ່າກິດຈະກຳດັ່ງກ່າວມີປະສິດທິຜົນຫຼາຍໃນການສົ່ງເສີມການຜະລິດສິນຄ້າຫັດຖະກຳແຜ່ນແພ ໃຫ້ມີຄຸນນະພາບ ແລະ ສາມາດເຂົ້າຫາຕະຫຼາດໄດ້ຢ່າງກ້ວາງຂວາງ ເທື່ອລະກ້າວ.
ພິເສດ ທ່ານ ຫົວໜ້າຫ້ອງການ ໄດ້ກ່າວສະແດງຄວາມຂອບໃຈມາຍັງ ທ່ານ ແດນຽວ ຟິດສ໌ແພັດທຼິກ ຫົວໜ້າໂຄງການ ແລະ ທ່ານ ນາງ ອາເລັກຊານເດຍ ຮູເອຕາ (Alexandria Huerta) ຜູ້ອຳນວຍການອົງການ USAID ປະຈຳ ສປປ ລາວ, ທີ່ໄດ້ໃຫ້ການຮ່ວມມື, ໃຫ້ຄວາມຄິດເຫັນ, ຄຳປຶກສາຫາລືຢ່າງໃກ້ສິດກັບ ຫ້ອງການກະຊວງ ອຸດສາຫະກໍາ ແລະ ການຄ້າ ຈັດຕັ້ງປະຕິບັດກິດຈະກຳໂຄງການຈົນໄດ້ຮັບຜົນສຳເລັດ, ພ້ອມທັງໄປຍັງໂຄງການ USAID LUNA II ທີ່ໄດ້ໃຫ້ການສະໜັບສະໜູນ ແຕ່ເລີ້ມຕົ້ນຈົນສຳເລັດພາລະກິດ ແລະ ຫວັງຢ່າງຍິ່ງວ່າໃນຕໍ່ຫນ້າທາງກະຊວງອຸດສາຫະກໍາ ແລະ ການຄ້າ ຈະໄດ້ຮ່ວມມືກັບໂຄງການ USAID LUNA II ເພື່ອເຮັດໂຄງການທີ່ດີຕໍ່ສັງຄົມນີ່ອີກ.
ສຸດທ້າຍທ່ານ ນາງ ອາເລັກຊານເດຍ ຮູເອຕາ (Alexandria Huerta) ຜູ້ອຳນວຍ ການອົງການ USAID ປະຈຳ ສປປ ລາວ ໄດ້ກ່າວວ່າ ຜົນສຳເລັດດັ່ງກ່າວໃນຄັ້ງນີ້ ກໍ່ຄືປື້ມຄູມືການຍ້ອມສີທໍາມະຊາດ ຈະໄດ້ສະໜອງໃຫ້ທຸກພາກສ່ວນທີ່ກ່ຽວຂ້ອງ ທີ່ນຳໄປຈັດຕັ້ງຜັນຂະຫຍາຍໃຫ້ເກີດຜົນປະໂຫຍດສູງສຸດຕໍ່ສັງຄົມລາວ ແລະ ມີຄວາມຍືນຍົງໃນອະນາຄົດ.
ຂ່າວໂດຍ: ພູຄໍາ ຫລວງສຸພົນ
