ຕອນບ່າຍ ເວລາ 1: 30 ໂມງ ຂອງວັນທີ 13 ທັນວາ 2018 ທີ່ຫ້ອງປະຊຸມຊັ້ນ 4 ກະຊວງອຸດສາຫະກໍາ ແລະ ການຄ້າ ໄດ້ມີການຕ້ອນຮັບການເຂົ້າຢ້ຽມຂໍ່ານັບຂອງ ທ່ານ JiWan Kim, CEO ກຸ່ມບໍລິສັດ BNK Financial ພ້ອມດ້ວຍທ່ານ Doo Ho, Lee ປະທານ ແລະ ຊີອີໂອ ບໍລິສັດ BNK Capital ແລະ ຄະນະຜູ້ຕາງໜ້າ ບໍລິສັດ BNK Capital ສາຂາປະຈໍາ ລາວ ໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ພ້ອມດ້ວຍທ່ານຮອງຫົວໜ້າຫ້ອງການ, ຫົວໜ້າພະແນກ ແລະ ວິຊາການກ່ຽວຂ້ອງຈໍານວນໜຶ່ງຊຶ່ງການເຂົ້າຢ້ຽມຂໍ່ານັບຄັ້ງນີ້ມີຜູ້ຕາງໜ້າຈາກທັງສອງຝ່າຍເຂົ້າຮ່ວມຈໍານວນ 15 ທ່ານ.
ໃນໂອກາດພົບປະຄັ້ງນີ້ ທ່ານ JiWan Kim, CEO ກຸ່ມບໍລິສັດ BNK Financial ໄດ້ແນະນຳຫຍໍ້ກ່ຽວກັບບັນດາວຽກງານຂອງກຸ່ມບໍລິສັດ BNK Financial ທີ່ຕັ້ງຂອງບໍລິສັດແມ່ນຢູ່ເມືອງປູ່ຊ່ານ ຖືເປັນກຸ່ມບໍລິສັດໃຫຍ່ອັນທີ 2 ຂອງ ສ ເກົາຫຼີ ແລະ ມີບໍລິສັດໃນເຄືອຄ່າຍ 8 ແຫ່ງ ມີພະນັກງານທັງໝົດ 8.200 ຄົນ; ມີຊັບສິນ 110 ລ້ານໂດລາສະຫະລັດ, ປະກອບມີທະນາຄານ 2 ແຫ່ງ (BNK Busan Bank & BNK Kyongnam Bank), ບໍລິສັດ BNK Capital, BNK Securties, BNK Savings Bank, BNK Asset Management, BNK Credit Information, BNK System; ຊຶ່ງບໍລິສັດ BNK Capital ໃຫຍ່ອັນດັບທີ 3 ແລະ ເຮັດວຽກງານປ່ອຍສິນເຊື່ອ ທີ່ໃຫຍ່ຕິດອັນດັບໃນ 70 ກວ່າແຫ່ງຂອງ ສ ເກົາຫຼີ ຊຶ່ງໃນປີ 2015 ໄດ້ເປີດສາຂາຢູ່ ບ້ານສີເມືອງ, ເມືອງສີສັດຕະນາກ, ນະຄອນຫລວງວຽງຈັນ ແລະ ແຜນການຕໍ່ໜ້າຈະຂະຫຍາຍສາຂາໄປທາງພາກໃຕ້ຂອງລາວ; ບໍລິສັດດັ່ງກ່າວແມ່ນມີປະສົບການໃນການບໍລິຫານດ້ານການເງິນ ແລະ ມີຄວາມຮູ້ກ່ຽວກັບການເງິນຈຸນລະພາກ ໃຫ້ເຊົ່າສິນເຊື່ອ ອະສັງຫາລິມະຊັບຕ່າງໆ; ວຽກງານການປ່ອຍສິນເຊື່ອຫຼັກແມ່ນຢູ່ໃນຂະແໜງອຸດສາຫະກໍາ ຕໍ່ໜ້າເຂົາຈະສະໜອງດ້ານກະສິກໍາຕື່ມອີກ ແລະ ຫວັງວ່າວຽກງານການດໍາເນີນທຸລະກິດຂອງ ບໍລິສັດ BNK Capital ຈະປະກອບສ່ວນໃນການພັດທະນາເສດຖະກິດຂອງ ສປປ ລາວ; ພ້ອມທັງສະເໜີຂໍການສະໜັບສະໜູນຈາກກະຊວງ ອຄ ໃນເວລາທີ່ທາງບໍລິສັດຈະມາຈົດທະບຽນ ການສ້າງຕັ້ງສາຂາບໍລິສັດ BNK Capital ຢູ່ພາກໃຕ້ຂອງລາວ. ນອກນັ້ນຍັງໄດ້ປຶກສາຫາລືກັນໃນວຽກງານການຈົດທະບຽນວິສາຫະກິດ, ບັນຫາຄວາມຫຍຸ້ງຍາກໃນການດຳເນີນທຸລະກິດ, ການສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ໃຫ້ມີການລົງທຶນໃນລາວເພີ່ມຂຶ້ນ.
ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີ ຕໍ່ ທ່ານ JiWan Kim, CEO ກຸ່ມບໍລິສັດ BNK Financial ໄດ້ໃຫ້ຄວາມເຊື່ອໝັ້ນ ແລະ ການຮ່ວມມືເປັນຢ່າງດີ, ພອ້ມດຽວກັນນັ້ນ, ທ່ານ JiWan Kim, ສະແດງຄວາມຂອບໃຈມາຍັງ ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ໃຫ້ການຕ້ອນຮັບຢ່າງອົບອຸ່ນ ແລະ ມອບເຄື່ອງທີ່ລະນຶກ ທີ່ເປັນເອກກະລັກຂອງເມືອງປຸ່ຊ່ານໃຫ້ແກ່ທ່ານ ລັດຖະມົນຕີ.
ຂ່າວໂດຍ: ໄພຄໍາອີ ວິໄລຄໍາ:
