ຕອນບ່າຍ ເວລາ 3: 10 ໂມງ ຂອງວັນທີ 26 ທັນວາ 2018 ທີ່ຫ້ອງຮັບແຂກຊັ້ນ 4 ກະຊວງອຸດສາຫະກໍາ ແລະ ການຄ້າ ໄດ້ມີການຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Yu Bingrui, ຮອງປະທານ ຄະນະກໍາມະການສະພາ ສົ່ງເສີມການຄ້າສາກົນສາຂາ ແຂວງ Hu nan ແຫ່ງ ສປ ຈີນ (CCPIT Hunan Sub-Council), ສະພາການຄ້າລະຫວ່າງປະເທດ ຂອງແຂວງຫູໜານ ພ້ອມດ້ວຍ ທ່ານ WenYa ເລຂາທິການໃຫຍ່ ສະພາການຄ້າຫູໜານ ປະຈໍາ ສປປ ລາວ ແລະ ຄະນະ ເຂົ້າຢ້ຽມຂໍ່ານັບ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ຊຶ່ງມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 13 ທ່ານ.
ຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ແມ່ນເພື່ອຜັນຂະຫຍາຍເນື້ອໃນຈິດໃຈ ຂອງທ່ານເລຂາພັກແຂວງ ໆຫູໜານ ທີ່ມີຄວາມເຂົ້າໃຈຮ່ວມກັນຫຼາຍດ້ານ ຄື: ດ້ານການຄ້າ, ການຮ່ວມມື, ການລົງທຶນ ແລະ ບັນດາໂຄງການທີ່ຢາກຈະມາລົງທຶນຢູ່ ສປປ ລາວ ແລະ ສ້າງຄວາມເຂົ້າໃຈ ລະຫ່ວາງ ສປປ ລາວ ກັບ ແຂວງ Hu nan, ພ້ອມທັງປຶກສາຫາລືແຜນການເບື້ອງຕົ້ນ ທີ່ທາງສະພາກການຄ້າລະຫວ່າງປະເທດ ຂອງແຂວງຫູໜານ ຢາກມາວາງສະແດງເຄື່ອງກົນຈັກຮັບໃຊ້ກະສິກໍາ ທີ່ເປັນຕ່ອງໂສ້ຄົບຊຸດ ຂອງແຂວງຫູໜານ ຢູ່ ນະຄອນຫລວງວຽງຈັນ ໂດຍສະເພາະການເລີ່ມຈາກການປູກເຂົ້າຈົນເຖິງໄລຍະເກັບກ່ຽວຜົນຜະລິດ, ເຜີຍແຜ່ເຕັກນິກວິທີການປູກ ການນໍາໃຊ້ເຄື່ອງກົນຈັກຮັບໃຊ້ການຜະລິດເຂົ້າ ແບບຄົບຊຸດ;
ພ້ອມດຽວກັນນີ້, ທ່ານ Yu Bingrui ພ້ອມຄະນະ ໄດ້ກ່າວຄຳຂອບໃຈມາຍັງທ່ານລັດຖະມົນຕີ ກະຊວງ ອຄ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ມອບເຄື່ອງທີ່ລະນຶກ ທີ່ເປັນເອກກະລັກຂອງແຂວງຫູໜານ ແລະ ຮູບພາບຕັ້ງໂຕະຂອງ ທ່ານ ສີ ຈິ້ນຜີງ ປະທານປະເທດແຫ່ງ ສປ ຈີນໃຫ້ແກ່ທ່ານລັດຖະມົນຕີ;
ຕອນທ້າຍ, ທ່ານ ລັດຖະມົນຕີກະຊວງ ອຄ ຍັງໄດ້ກ່າວຂອບໃຈ ຕໍ່ທ່ານ Yu Bingrui ພ້ອມຄະນະໃນການໃຫ້ຄວາມຮ່ວມມືເປັນຢ່າງດີ ພ້ອມທັງມອບໃຫ້ທ່ານຫົວໜ້າກົມສົ່ງເສີມການຄ້າ ກະຊວງ ອຄ ສືບຕໍ່ປຶກສາຫາລືໃນລາຍລະອຽດຂອງການຮ່ວມມືທີ່ຈະຮ່ວມເຮັດບົດບັນທຶກເຊັນກັນສອງຝ່າຍ ແລະ ການກະກຽມຈັດງານວາງສະແດງຮ່ວມກັນໃນອະນາຄົດ;
ຂ່າວໂດຍ: ນ ຖື ແຫວນວົງສົດ
ພາບໂດຍ: ທ. ອະພິຊິດ ແລະ ທ. ໄພຄຳອີ
