ຕອນເຊົ້າເວລາ 9:00 ໂມງ ຂອງວັນທີ 22 ມັງກອນ 2019 ທີ່ຫ້ອງປະຊຸມໃຫຍ່ ກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມເຜີຍແຜ່ ແລະ ຄໍາແນະນໍາ ກ່ຽວກັບການອອກອະນຸຍາດດໍາເນີນທຸລະກິດ ຕາມຄໍາສັ່ງ ເລກທີ 02/ນຍ, ລົງວັນທີ 01 ກຸມພາ 2018, ເນື້ອໃນດໍາລັດ ເລກທີ 03/ນຍ, ລົງວັນທີ 10 ມັງກອນ 2019 ວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະ ກິດຈະການສໍາປະທານ ຂອງ ສປປ ລາວ ແລະ ບົດສະເໜີ ເນື້ອໃນຂໍ້ຕົກລົງວ່າດ້ວຍການຂຶ້ນທະບຽນວິສາຫະກິດ ສະບັບເລກທີ 0023/ອຄ.ກທຄວ, ລົງວັນທີ 09 ມັງກອນ 2019 ກອງປະຊຸມດັ່ງກ່າວ ມີຜູ້ຕາງໜ້າຈາກບັນດາກົມອ້ອມຂ້າງກະຊວງ ແລະ ຜູ້ຕາງໜ້າພະແນກອຸດສາຫະກໍາ ແລະ ການຄ້າແຂວງ ແລະ ນະຄອນຫລວງ ທົ່ວປະເທດເຂົ້າຮ່ວມປະມານ 200 ກວ່າທ່ານ.
ກອງປະຊຸມຄັ້ງນີ້ ໂດຍພາຍໃຕ້ການເປັນປະທານ ຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຂຶ້ນເຜີຍແຜ່ ເນື້ອໃນດໍາລັດ ເລກທີ 03/ນຍ, ລົງວັນທີ 10 ມັງກອນ 2019 ວ່າດ້ວຍການຮັບຮອງເອົາບັນຊີ ກິດຈະການຄວບຄຸມ ແລະ ກິດຈະການສໍາປະທານ ຂອງ ສປປ ລາວ ;ການແຈ້ງຂຶ້ນທະບຽນແມ່ນສະເໜີຕໍ່ຄະນະກໍາມະການການສົ່ງເສີມ ແລະ ການຄຸ້ມຄອງການລົງທຶນທີ່ມີກົດໝາຍ ແລະ ນິຕິກໍາດັ່ງກ່າວ ຕ້ອງສະເໜີຂໍໃບອະນຸຍາດທີ່ກໍານົດໄວ້. ທີ່ອອກໃບອະນຸຍາດວິສາຫະກິດສ່ວນບຸກຄົນ ຫຼື ນິຕິບຸກຄົນພາຍໃນ ແລະ ຕ່າງປະເທດ ທີ່ມີຈຸດປະສົງລົງທຶນໃນຮູບແບບກິດຈະການລົງທຶນສໍາປະທານ ຢູ່ ສປປ ລາວ ໃຫ້ຍື່ນຄໍາຮ້ອງຂໍລົງທຶນ ຕໍ່ຫ້ອງການ ບໍລິຫານການລົງທຶນປະຕູດຽວ ຂັ້ນສູນກາງ ຫຼື ຂັ້ນແຂວງ ເພື່ອຄົ້ນຄ້ວາ ແລະ ນໍາສະເໜີຄະນະກໍາມະການສົ່ງເສີມ ແລະ ຄຸ້ມຄອງການລົງທຶນຕາມການແບ່ງຂັ້ນການຄຸ້ມຄອງຂັ້ນສູນກາງ ແລະ ທ້ອງຖິ່ນ. ສ່ວນກິດຈະການໃນບັນຊີຄວບຄຸມ ແລະ ກິດຈະການສໍາປະທານແມ່ນປະຕິບັດຕາມຂັ້ນຕອນທີ່ກໍານົດໄວ້ໃນກົດໝາຍ ວ່າດ້ວຍການສົ່ງເສີມການລົງທຶນ. ສໍາລັບກິດຈະການທີ່ບໍ່ຢູ່ໃນບັນຊີຄວບຄຸມແມ່ນໃຫ້ປະຕິບັດຕາມຂັ້ນຕອນ ທີ່ບົ່ງໄວ້ໃນກົດໝາຍ ວ່າດ້ວຍວິສາຫະກິດ.
ດໍາລັດສະບັບນີ້ ມອບໃຫ້ບັນດາພະແນກອຸດສາຫະກໍາ ແລະ ການຄ້ານະຄອນຫຼວງ ແລະ ແຂວງ ຂອບເຂດທົ່ວປະເທດ ສົມທົບກັບບັນດາ ຫ້ອງການອຸດສາຫະກໍາ ແລະ ການຄ້າເມືອງ, ລົງເຜີຍແຜ່ ແລະ ແນະນໍາ ດໍາລັດສະບັບນີ້ໃຫ້ບັນດາຂະແໜງການທີ່ກ່ຽວຂ້ອງເຂົ້າໃຈຂັ້ນຕອນການອອກໃບອະນຸຍາດສ່ວນບຸກຄົນ ຫຼື ນິຕິບຸກຄົນ ທັງພາຍໃນ ແລະ ຕ່າງປະເທດ ໃນຂອບເຂດຄວາມຮັບຜິດຊອບຂອງຕົນ.
ຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງ ອຄ ໄດ້ໃຫ້ການໂອ້ລົມ ແລະ ທິດຊີ້ນໍາ ໃຫ້ແກ່ຜູ້ເຂົ້າຮ່ວມກອງປະຊຸມ ຈົ່ງນໍາເອົາເນື້ອໃນດໍາລັດສະບັບນີ້ ນໍາໄປເຜີຍແຜ່ ໃຫ້ແກ່ພາກສ່ວນທີ່ກ່ຽວຂ້ອງໃນຂອບເຂດຄວາມຮັບຜິດຊອບຂອງຕົນ ໃຫ້ມີຄວາມເຂົ້າໃຈ ແລະ ນໍາໄປຈັດຕັ້ງປະຕິບັດຢ່າງມີປະສິດທິຜົນ.
ຂ່າວໂດຍ: ໄພຄໍາອີ ວິໄລຄໍາ
