ໃນຕອນເຊົ້າ ເວລາ 10:00ໂມງ ວັນທີ 8 ກຸມພາ ປີ 2019 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ທ່ານ ຈ໋ອງ-ເບີນາລ໌ ຄາຣາສ໌ໂກ ເອກອັກຄະລັດຖະທູດ ອົດສະຕຣາລີປະຈໍາ ສປປ ລາວ ໄດ້ປະກາດໃຫ້ທຶນຊ່ວຍເຫຼືອລ້າ ຈໍານວນ 4,5 ລ້ານໂດລາອົດສະຕຣາລີ ເພື່ອສະໜັບສະໜູນການປະຕິຮູບດ້ານການອຳນວຍຄວາມສະດວກໃນການດໍາເນີນທຸລະກິດ ແລະ ການຄ້າ ພ້ອມທັງການພັດທະນາພາກເອກະຊົນໃນ ສປປ ລາວ.
ໃນພິທີເຊັນສັນຍາໄດ້ຈັດຂຶ້ນທີ່ກະຊວງອຸດສະຫະກໍາ ແລະ ການຄ້າ ໂດຍທ່ານ ຈ໋ອງເບີນາລ໌ ຄາຣາສ໌ໂກ ໄດ້ກ່າວວ່າ: “ປະເທດອົດສະຕຣາລີ ມີຄວາມຍິນດີທີ່ໄດ້ເຮັດວຽກຮ່ວມກັບລັດຖະບານແຫ່ງ ສປປ ລາວ ແລະ ທະນາຄານໂລກ ເພື່ອປັບປຸງຄວາມສະດວກໃນການດໍາເນີນທຸລະກິດ, ການຄ້າ ແລະ ຄວາມສາມາດໃນການແຂ່ງຂັນ ຂອງບັນດາຫົວໜ່ວຍທຸລະກິດໃນລາວ. ການຊ່ວຍເຫຼືອຂອງພວກເຮົາ ຕໍ່ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ ຈະຊ່ວຍໃຫ້ ປະເທດລາວພັດທະນາພາກເອກະຊົນ, ເຊື່ອມໂຍງເສດຖະກິດເຂົ້າສູ່ພາກພື້ນ ແລະ ສາກົນພ້ອມທັງຈັດຕັ້ງປະຕິບັດຕາມກົດລະບຽບສາກົນ ທີ່ສົ່ງເສີມສະເຖຍລະພາບ ແລະ ຄວາມຈະເລີນຮຸ່ງເຮືອງໃນພາກພື້ນຂອງພວກເຮົາ.”
ທຶນຊ່ວຍເຫຼືອລ້າຖືກສະໜອງໃຫ້ ຜ່ານກອງທຶນຜູ້ໃຫ້ທຶນຫຼາຍຝ່າຍ ເປັນຕົ້ນໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງສປປ ລາວ ບໍລິຫານໂດຍທະນາຄານໂລກ ຈະເປັນການສືບຕໍ່ການຊ່ວຍເຫຼືອຂອງອົດສະຕຣາລີ ຕໍ່ບູລິມະສິດການປະຕິຮູບເສດຖະກິດຂອງລັດຖະບານແຫ່ງ ສປປ ລາວ ເຊິ່ງປະກອບດ້ວຍການຈັດຕັ້ງປະຕິບັດ ຄໍາສັ່ງຂອງທ່ານນາຍົກລັດຖະມົນຕີ ເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດ ຢູ່ ສປປ ລາວ. ການຊ່ວຍເຫຼືອຂອງອົດສະຕຣາລີຈະເປັນສ່ວນໜຶ່ງ ໃນການສ້າງວຽກເຮັດງານທໍາໃຫ້ເພີ່ມຂຶ້ນ ແລະ ສ້າງໂອກາດໃນການສ້າງລາຍຮັບໃຫ້ແກ່ຄົນລາວ.
ໃນພິທີເຊັນສັນຍາ ທ່ານ ຈ໋ອງເບີນາລ໌ ຄາຣາສ໌ໂກ ຍັງໄດ້ກ່າວອີກວ່າ: “ອົດສະຕຣາລີ ມີຄວາມພາກພູມໃຈຕໍ່ການຊ່ວຍເຫຼືອໄລຍະຍາວ ຂອງພວກເຮົາໃຫ້ແກ່ການອໍານວຍຄວາມສະດວກດ້ານການຄ້າ, ການພັດທະນາພາກເອກະຊົນ ແລະ ການປະຕິຮູບເສດຖະກິດ. ໃນໄລຍະໜຶ່ງທົດສະວັດຜ່ານມາ ໂດຍຜ່ານໂຄງການພັດທະນາດ້ານການຄ້າ ໄລຍະ 1 ແລະ 2, ອົດສະຕຣາລີ ໄດ້ໃຫ້ທຶນຊ່ວຍເຫຼືອຫຼາຍກວ່າ 12 ລ້ານໂດລາອົດສະຕຣາລີ ເພື່ອສະໜັບສະໜູນວຽກງານອໍານວຍຄວາມສະດວກດ້ານການຄ້າ ແລະ ການພັດທະນາພາກ ເອກະຊົນໃນ ສປປ ລາວ ໃນນີ້ລວມທັງການສະໜັບສະໜູນໃຫ້ລາວເຂົ້າເປັນສະມາຊິກອົງການການຄ້າໂລກ ແລະ ປະຕິບັດຕາມພັນທະ ຂອງສະມາຊິກອົງການການຄ້າໂລກ” ໃນເດືອນ ກໍລະກົດ ປີ 2018 ອົດສະຕຣາລີໄດ້ຖືກເລືອກໃຫ້ເປັນປະທານຮ່ວມ ຂອງກອງປະຊຸມຂະແໜງການຄ້າ ແລະ ພາກເອກະຊົນ, ເຊິ່ງເປັນກົນໄກໃນການປະສານງານລະຫວ່າງຄູ່ຮ່ວມພັດທະນາ ແລະ ເປັນສ່ວນໜຶ່ງຂອງກອງປະຊຸມໂຕະມົນກ່ຽວກັບການພັດທະນາ.
ທ່ານ ນິໂກລາ ພົນທາຣາ, ຜູ້ຈັດການທະນາຄານໂລກປະຈໍາ ສປປ ລາວ ໄດ້ກ່າວວ່າ: “ການສ້າງຄວາມເຂັ້ມແຂງໃຫ້ພາກເອກະຊົນໃນ ສປປ ລາວ ເປັນບູລິມະສິດທີ່ສໍາຄັນ ຂອງການພັດທະນາເພາະເປັນຂະແໜງການທີ່ສາມາດສ້າງວຽກເຮັດງານທໍາ ແລະ ເຮັດໃຫ້ເສດຖະກິດເຕີບໃຫຍ່ຢ່າງຮອບດ້ານ. ໂຄງການນີ້ມີຈຸດປະສົງເພື່ອຮັບປະກັນວ່າ ບັນດາຫົວໜ່ວຍທຸລະກິດໂດຍສະເພາະແມ່ນທຸລະກິດຂະໜາດນ້ອຍ, ທຸລະກິດທີ່ບໍລິຫານໂດຍຜູ້ຍິງ ແລະ ບັນດາທຸລະກິດທີ່ຢູ່ນອກສູນກາງເສດຖະກິດຫຼັກ ສາມາດໄດ້ຮັບປະໂຫຍດຈາກການປະຕິຮູບຂອງພາກລັດ. ພວກເຮົາມີຄວາມຍິນດີສືບຕໍ່ການຮ່ວມມືທີ່ມີມານານ ກັບອົດສະຕຣາລີໃນວາລະທີ່ສໍາຄັນນີ້”
ທ່ານນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສະກໍາ ແລະ ການຄ້າ ເຊິ່ງເປັນສັກຂີພະຍານໃນພິທີເຊັນສັນຍາການຊ່ວຍເຫຼືອ ໄດ້ກ່າວວ່າ: “ລັດຖະບານອົດສະຕຣາລີ ແມ່ນໜຶ່ງໃນຄູ່ຮ່ວມພັດທະນາຫຼັກ ທີ່ໃຫ້ການສະໜັບສະໜູນ ສປປ ລາວ ໃນໄລຍະຫຼາຍທົດສະວັດທີ່ຜ່ານມາ. ທຶນຊ່ວຍເຫຼືອດ້ານການພັດທະນາຈາກອົດສະຕຣາລີ ໄດ້ປະກອບສ່ວນອັນສຳຄັນໃນຂະແໜງການສຶກສາ, ການພັດທະນາເຂດຊົນນະບົດ ແລະ ການປັບປຸງການຄ້າ, ໂດຍສະເພາະແມ່ນທຶນຊ່ວຍເຫຼືອລ້າ ທີ່ລັດຖະບານອົດສະຕຣາລີໄດ້ມອບເຂົ້າໃນບ້ວງທຶນຊ່ວຍເຫຼືອລ້າຫຼາຍຝ່າຍ ທີ່ຫ້ອງການທະນາຄານໂລກເປັນຜູ້ບໍລິຫານ, ເຊິ່ງເປັນການສະໜັບສະໜູນຄວາມພະຍາຍາມຂອງລັດຖະບານ ສປປ ລາວ ໃນການເຊື່ອມໂຍງລະບົບການຄ້າເຂົ້າສູ່ພາກພື້ນ ແລະ ສາກົນ, ທັງເປັນການປັບປຸງຄວາມສາມາດໃນການແຂ່ງຂັນເພື່ອສົ່ງອອກ ຂອງຂະແໜງການທີ່ບໍ່ແມ່ນຊັບພະຍາກອນທຳມະຊາດອີກດ້ວຍ”. “ເນື່ອງຈາກໄດ້ຮັບທຶນສະໜັບສະໜູນຈາກທະນາຄານໂລກ, ອົດສະຕຣາລີ ແລະ ໄອແລນ, ພວກຂ້າພະເຈົ້າ ຈະໄດ້ຈັດກອງປະຊຸມເປີດໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ, ເຊິ່ງມີເປົ້າໝາຍປັບປຸງສະພາບແວດລ້ອມໃນການດຳເນີນທຸລະກິດໃຫ້ພາກເອກະຊົນໄດ້ເຕີບໃຫຍ່ຂະຫຍາຍຕົວຂຶ້ນ. ພວກຂ້າພະເຈົ້າຂໍສະແດງຄວາມຂອບໃຈເປັນຢ່າງສູງ ມາຍັງລັດຖະບານ ແລະ ປະຊາຊົນອົດສະຕຣາລີ ທີ່ໄດ້ໃຫ້ການສະໜັບສະໜູນເພື່ອພັດທະນາ ສປປ ລາວ ໃນໄລຍະຜ່ານມາຮອດປະຈຸບັນ ແລະ ພວກຂ້າພະເຈົ້າພ້ອມແລ້ວທີ່ຈະນໍາເອົາທຶນຊ່ວຍເຫຼືອດັ່ງກ່າວ ນໍາໃຊ້ເຂົ້າໃນການປະຕິຮູບດ້ານການອຳນວຍຄວາມສະດວກໃນການດໍາເນີນທຸລະກິດ ແລະ ການຄ້າ ພ້ອມທັງການພັດທະນາພາກເອກະຊົນໃນ ສປປ ລາວ ໃຫ້ປະກົດຜົນເປັນຈິງ.
ຂ່າວໂດຍ: ໄພຄໍາອີ ວິໄລຄໍາ
