ໃນລະຫວ່າງວັນທີ 25 ກຸມພາ – 01 ມີນາ 2019 ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຮ່ວມກັບ ພະແນກອຸດສາຫະກຳ ແລະ ການຄ້າແຂວງວຽງຈັນ ໄດ້ຈັດກອງປະຊຸມຝຶກອົບຮົມຫົວຂໍ້: ‘’ການສົ່ງເສີມການຮ່ວມກຸ່ມທຸລະກິດ Cluster’’ ພາຍໃຕ້ໂຄງການສົ່ງເສີມຜະລິດເປັນສິນຄ້າ ແລະ ຄ້ຳປະກັນສະບຽງອາຫານ ທີ່ຫ້ອງປະ ຊຸມ ລີສອດແຫຼວຄຳປະເສີດ, ແຂວງວຽງຈັນ, ໂດຍໃຫ້ກຽດເປັນປະທານທ່ານ ວຽງສະຫວັນ ທອງເພັງບັນທະວົງ ຮອງຫົວໜ້າພະແນກ ອຄ ແຂວງວຽງຈັນ. ມີນັກສໍາມະນາກອນ ຈໍານວນ 36 ທ່ານ, ຍິງ 11 ທ່ານ ມາຈາກ 2 ເມືອງຄື: ເມືອງທຸລະຄົມ ແລະ ເມືອງໂພນໂຮງ.
ແຂວງວຽງຈັນເປັນແຂວງທີ່ໄດ້ຈັດຕັ້ງປະຕິບັດໂຄງການເພື່ອເຮັດໃຫ້ບັນດາພາກທຸລະກິດ ແລະ ພາກລັດ ມີຄວາມເຂົ້າໃຈເຖິງຄວາມສຳຄັນຂອງການສ້າງຕັ້ງກຸ່ມຮ່ວມທຸລະກິດຮ່ວມກັນ ເພື່ອການຕອບສະໜອງໃຫ້ມີການຜະລິດເປັນສິນຄ້າ.
ແລະໃນລະຫວ່າງວັນທີ 04 – 08 ມີນາ 2019 ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກໍ່ໄດ້ຮ່ວມກັບພະແນກອຸດສາຫະກຳ ແລະ ການຄ້າແຂວງໄຊຍະບູລີ ໃນຫົວຂໍ້ດຽວກັນກັບແຂວງວຽງຈັນ ທີ່ຫ້ອງການກະສິກຳ ແລະ ປ່າໄມ້, ເມືອງພຽງ, ແຂວງໄຊຍະບູລີ, ໂດຍໃຫ້ກຽດເປັນປະທານ ທ່ານ ສຸວັນທອງ ພູມມະວົງ ຮອງເຈົ້າເມືອງ ເມືອງພຽງ, ແຂວງໄຊຍະບູລີ ແລະ ກ່າວຈຸດປະສົງຂອງໂຄງການແມ່ນ ທ່ານ ສາ ສີລິພົງ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ. ມີນັກສຳມະນາກອນ ຈຳນວນ 32 ທ່ານ, ຍິງ 5 ທ່ານ ມາຈາກເມືອງພຽງ ແລະ ຜູ້ສັງເກດການທີ່ມາຈາກເມືອງອ້ອມຂ້າງ.
ຈຸດປະສົງການຈັດຕັ້ງປະຕິບັດໂຄງການຂອງສອງແຂວງ ເພື່ອສ້າງຄວາມເຂົ້າໃຈໃຫ້ແກ່ບັນດາພາກທຸລະກິດ ແລະ ພາກລັດເຫັນເຖິງຄວາມສຳຄັນຂອງການສ້າງຕັ້ງກຸ່ມຮ່ວມທຸລະກິດ ເພື່ອຕອບສະໜອງໃຫ້ມີການຜະລິດເປັນສິນຄ້າ, ສ້າງຄວາມເຂັ້ມແຂງ, ຄວາມອາດສາມາດໃນການແຂ່ງຂັນ ແລະ ການເຂົ້າເຖິງຕະຫຼາດ, ຂໍ້ມູນຂ່າວສານດ້ານຕ່າງໆໂດຍງ່າຍ. ອີກດ້ານໜຶ່ງກໍ່ເພື່ອເຮັດໃຫ້ປະຊາຊົນ ຫຼື ຈຸນລະວິສາຫະກິດທີ່ລວມຕົວເຂົ້າກັນແລ້ວມີໂອກາດໃນການສ້າງຄວາມເຂັ້ມແຂງແລກປ່ຽນບົດຮຽນໃໝ່ໆ, ມີການຂະຫຍາຍຕົວພາຍໃນກຸ່ມທຸລະກິດໃຫ້ມີການພັດທະນາແບບຍືນຍົງດ້ວຍຕົວເຂົາເຈົ້າເອງ.
ໂຄງການດັ່ງກ່າວໄດ້ລິ ເລີ່ມແຕ່ປີ 2015 ໂດຍກົມສົ່ງເສີມວິສາຫະກິດຂະໜາດນ້ອຍ ແລະ ກາງ ເປັນຜູ້ຈັດຕັ້ງປະຕິບັດ, ເບື້ອງຕົ້ນແມ່ນປະຕິບັດຢູ່ 3 ແຂວງ ເຊັ່ນ : ນະຄອນຫຼວງວຽງຈັນ, ແຂວງຄຳມ່ວນ ແລະ ແຂວງສະຫັວນນະເຂດ. ສຳລັບປີ 2019 ເຫັນວ່າແຂວງວຽງຈັນ ກໍ່ມີທ່າແຮງໃນການຜະລິດ ເຂົ້າເປັນສິນຄ້າ ໂດຍມີບັນດາກຸ່ມເປົ້າໝາຍເຂົ້າຮ່ວມເຊັ່ນ: ກຸ່ມໂຮງສີເຂົ້າ, ກຸ່ມຂາຍເຂົ້າ, ກຸ່ມເກັບຊື້ເຂົ້າ ແລະ ກຸ່ມຜະລິດແນວພັນເຂົ້າ. ທໍາອິດຈະໃຫ້ບັນດາກຸ່ມມີການຝຶກອົບຮົມ ກ່ຽວກັບວີທີການສ້າງຕັ້ງກຸ່ມ, ການບໍລິຫານກຸ່ມທຸລະກິດ, ລະບຽບຂໍ້ກໍານົດ ແລະ ນະໂຍບາຍຕ່າງໆ ພາຍໃນກຸ່ມ, ການປະເມີນຄວາມຈຳເປັນ, ຂໍ້ໄດ້ປຽບ ແລະ ຂໍ້ເສຍປຽບຂອງການເຮັດເປັນກຸ່ມທຸລະກິດ, ການກຳນົດການເຄື່ອນໄຫວກິດຈະກໍາ, ການເຮັດວຽກຮ່ວມກັນ, ການແກ້ໄຂບັນຫາ, ການສື່ສານ, ການບໍລິຫານດ້ານການເງິນຂອງທຸລະກິດ, ການຕະຫຼາດ, ແຜນດຳເນີນງານ ເພື່ອກ້າວເຂົ້າໄປຫາການໄດ້ຮັບໃບຢັ້ງຢືນເປັນກຸ່ມຂອງແຂວງໃຫ້ປະກົດຜົນເປັນຈິງໃນການສ້າງເປັນຕົວແບບຂອງການຮ່ວມກຸ່ມທຸລະກິດ Cluster.
ແຫຼ່ງຂ່່າວໂດຍ: ນາງ ພິມພອນ ສາຍສູນທອນ ວິຊາການ
ກົມສົ່ງເສີ່ມວິສາຫະກິດຂະໜາດນ້ອຍ ແລະ ກາງ
ຮຽບຮຽງໂດຍ: ພູຄໍາ ຫຼວງສຸພົນ
