ຕອນເຊົ້າ ເວລາ 9: 30 ໂມງ ວັນທີ 14 ພຶດສະພາ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ໄດ້ມີການຕ້ອນຮັບການເຂົ້າຢ້ຽມຂໍ່ານັບພົບປະຂອງທ່ານ Ms. Eteri Kvintradze, Mission Chief Lao PDR(IMF) ຫົວໜ້າຄະນະປະເມີນເສດຖະກິດມະຫາພາກ ສໍາລັບ ສປປ ລາວ ປະຈໍາປີ 2019 ໂດຍທາງຄະນະທີມງານຂອງ IMF ກໍ່ຖືໂອກາດນີ້ ປຶກສາຫາລື ດ້ານເສດຖະກິດມະຫາພາກໂດຍສະເພາະຂະແໜງອຸດສາຫະກໍາ ແລະ ການຄ້າກັບຝ່າຍລາວ ຊຶ່ງເປັນການແລກປ່ຽນບົດຮຽນທີ່ດີໃຫ້ແກ່ລາວ. ການເຂົ້າຢ້ຽມຂໍ່ານັບຄັ້ງນີ້ ມີຜູ້ຕາງໜ້າ​ຈາກທັງສອງຝ່າຍເຂົ້າຮ່ວມຈໍານວນ 20 ກວ່າ​ທ່ານ.

     ໃນໂອກາດພົບປະຄັ້ງນີ້ ທັງສອງຝ່າຍໄດ້ປຶກສາຫາລືດ້ານການພັດທະນາສະພາບແວດລ້ອມ ໃນການດໍາເນີນທຸລະກິດຄວາມເຂົ້າໃຈຮ່ວມກັນຫຼາຍດ້ານເປັນຕົ້ນສະພາບຂະແໜງອຸດສາຫະກໍາ ແລະ ການຄ້າ, ການສົ່ງ ເສີມ SME, ການ​ເພີ່ມ​ຄວາມ​ຫຼາກ​ຫຼາຍ​ໃຫ້​ແກ່​ກິດຈະການ​ດ້ານ​ເສດຖະກິດ​ມະຫາ​ພາກ ​ແລະ  ກອງ​ທຶນ​ການ​ສົ່ງ​ເສີມ SME; ການ​ພັດທະນາ​ການ​ຄ້າ ​ແລະ ​ນະ​ໂຍບາຍ​ການ​ຄ້າ; ຂໍ້​ມູນ​ທາງ​ດ້ານ​ການ​ຄ້າ; ຜົນ​ກະທົບ​ຂອງ AEC; ການ​ຢຸດຕິ​ການ​ສົ່ງ​ອອກ​ໄມ້​ທ່ອນ ​ແລະ ລະບຽບ​ໃນ​ການ​ຄຸ້ມ​ຄອງ​ໄມ້​ແປ​ຮູບ​, ພ້ອມ​ທັງ​ຜົນ​ກະທົບ​ຕໍ່​ເສດຖະກິດການ​ພັດທະນາ​ຊາຍ​ແດນ ​ຂອງລັດຖະບານ ທີ່ໄດ້ຜັນຂະ ຫຍາຍເນື້ອໃນບັນຫາຂໍ້ຫຍຸ້ງຍາກຕ່າງໆ  ແລະ ເປັນຂໍ້ຈໍາກັດ ຕໍ່ການພັດທະນາເສດຖະກິດ ພ້ອມທັງຊອກທາງອອກດ້ານທຸລະກິດໃຫ້ແກ່ສປປ ລາວ ແລະ ບັນດາໂຄງການອື່ນໆ. ນອກນັ້ນຍັງໄດ້ປຶກສາຫາລືວຽກງານຫຼາຍດ້ານທີ່ປິ່ນອ້ອມເປັນພື້ນຖານໂຄງລ່າງໃຫ້ແກ່ລາວ. ໃນນີ້ ທ່ານ Ms. Eteri Kvintradze, ຫົວໜ້າຄະນະປະເມີນເສດຖະກິດມະຫາພາກ ສປປ ລາວ ໄດ້ສະ

ເໜີໃນຕໍ່ໜ້າຈະໃຫ້ການປຶກສາຫາລື ແລະ ແກ້ໄຂບັນຫາຮ່ວມກັນໃນວຽກງານຫຼາຍດ້ານແກ່ ສປປ ລາວ.

          ໃນຕອນທ້າຍ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ  ສະແດງຄວາມຍິນດີ ຕໍ່ ທ່ານ Ms. Eteri Kvintradze, ຫົວໜ້າຄະນະປະເມີນເສດຖະກິດມະຫາພາກ ທີ່ໃຫ້ຄວາມຮ່ວມມືເປັນຢ່າງດີ ແລະ ທ່ານ Ms. Eteri Kvintradze, ກໍ່ສະແດງຄວາມຂອບໃຈມາຍັງ ທ່ານຮອງລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບທີ່ດີ.

ຂ່າວໂດຍ: ໄພຄໍາອີ ວິໄລຄໍາ