ຕອນບ່າຍ ເວລາ 14:00ມ ຂອງວັນທີ 30 ພຶດສະພາ 2019, ທີ່ຫ້ອງປະຊຸມໃຫຍ່ຊັ້ນ 1 ຂອງກະຊວງອຸດສາຫະກຳ ແລະ ການຄ້າ; ທ່ານ ນາງ ເຂັມມະນີ ພົນເສນາ, ລັດຖະມົນຕີ ກະຊວງ ອຄ ໄດ້ເປັນປະທານເປີດພິທີມອບ-ຮັບ ຂັນລາງວັນກຽດຕິຍົດ ການແຂ່ງຂັນ Rally ເຊື່ອມສາຍພົວພັນລາວ-ໄທ ຄັ້ງທີ 01; ຊຶ່ງນໍາພາຄະນະໂດຍທ່ານ ຈາຕຸລົງ ບຸນນາກ ປະທານສະພາທຸລະກິດໄທ-ລາວ, ທ່ານ ນາງ ປະວິດຕາ ມ່ວງສະກຸນ ຮອງ ຜູ້ຊ່ວຍທູດຝ່າຍພານິດໄທ ສະຖານເອກອັກຄະລັດຖະທູດໄທ ປະຈຳ ສປປ ລາວ, ຄະນະກໍາມະການບໍລິຫານສະພາທຸລະກິດໄທ-ລາວ ພ້ອມດ້ວຍຄະນະ ຈາກຝ່າຍໄທ ຂຶ້ນຮັບຂັນລາງວັນກຽດຕິຍົດຈາກ ທ່ານ ນາງ ເຂັມມະນີ ພົນເສນາ, ລັດຖະມົນຕີ ກະຊວງ ອຄ ; ພ້ອມດຽວກັນນີ້, ມີຜູ້ຕາງໜ້າຈາກຫ້ອງການ ສໍານັກງານນາຍົກລັດຖະມົນຕີ, ຜູ້ຕາງໜ້າຈາກສະພາການຄ້າ ແລະ ອຸດສາຫະກຳ ແຫ່ງຊາດລາວ, ບັນດາທ່ານ ຫົວໜ້າ-ຮອງ ຫົວໜ້າກົມ, ວິຊາການ ອ້ອມຂ້າງກະຊວງ ອຄ ເຂົ້າຮ່ວມພິທີໃນຄັ້ງນີ້ປະມານ 25 ທ່ານ.
ຈຸດປະສົງ ຂອງການຈັດພິທີຄັ້ງນີ້ ແມ່ນເພື່ອເປັນການສົ່ງເສີມ ແລະ ສະໜັບສະໜູນ ປີທ່ອງທ່ຽວລາວ ປີ 2018 ແລະ ເຫັນວ່າ ມີຫຼາຍພາກສ່ວນເຂົ້າຮ່ວມ ແລະ ກໍ່ໄດ້ສຳເລັດໄປດ້ວຍດີ, ເປັນຂະບວນຟົດຟື້ນ ແລະ ມີຄວາມໝາຍ ສຳຄັນຕໍ່ສາຍພົວພັນ ຂອງສອງປະເທດ ລາວ -ໄທ.
ທ່ານລັດຖະມົນຕີ ກະຊວງ ອຄ ໄດ້ກ່າວວ່າ: ຂ້າພະເຈົ້າ ໂດຍໄດ້ຮັບກຽດ ຈາກຫ້ອງວ່າການສຳນັກງານ ນາຍົກລັດຖະມົນຕີ ໃຫ້ຕາງໜ້າລັດຖະບານ ແຫ່ງ ສປປ ລາວ, ຈັດພິທີມອບ-ຮັບ ຂັນລາງວັນກຽດຕິຍົດ ໃນນາມລັດຖະມົນຕີ ກະຊວງອຸດສາຫະກຳ ແລະ ການຄ້າ ມອບໃຫ້ແກ່ນັກແຂ່ງຂັນລົດ Rally ເຊື່ອມສາຍພົວພັນໄທ-ລາວ ຄັ້ງທີ 01 ນີ້, ຫວັງຢ່າງຍິ່ງ ວ່າຈະມີກິດຈະກຳດີໆແບບນີ້ອີກ ໃນອະນາຄົດ. ທ້າຍສຸດນີ້, ໃນນາມລັດຖະບານ, ຂ້າພະເຈົ້າ ຂໍຖືໂອກາດນີ້ ຊົມເຊີຍໝາກຜົນ ຂອງກິດຈະກຳຄັ້ງນີ້ ແລະ ຂໍຖືໂອກາດນີ້ ກ່າວສະແດງຄວາມຂອບໃຈ ມາຍັງສະຖານເອກອັກຄະລັດຖະທູດໄທ ປະຈຳ ສປປ ລາວ, ສະພາທຸລະກິດໄທ-ລາວ, ສະມາຄົມນັກທຸລະກິດໄທ ໃນ ສປປ ລາວ ແລະ ນັກແຂ່ງຂັນ ຈາກປະເທດໄທ ທີ່ເຂົ້າຮ່ວມງານ.
ພ້ອມກັນນີ້, ບັນດາທ່ານທີ່ເຂົ້າຮ່ວມພິທີຄັ້ງນີ້ຍັງໄດ້ຮັບຊົມ VTR ຂອງກິດຈະກຳວັນຈັດງານ ແລະ ທ່ານ ຈາຕຸລົງ ບຸນນາກ ປະທານສະພາທຸລະກິດໄທ-ລາວ ຕາງໜ້າຝ່າຍໄທ ຂໍສະແດງຄວາມຊົມເຊີຍ ແລະ ມີຄວາມຍິນດີເປັນຢ່າງຍິ່ງ ທີ່ກິດຈະກຳດັ່ງກ່າວ ຍັງສາມາດລະດົມທຶນ ຊ່ວຍສົມທົບສ້າງເຕົາເຜົາສົບ ທີ່ວັດຕາດທອງ, ເມືອງສີໂຄດຕະບອງ, ນະຄອນຫຼວງວຽງຈັນ ລວມມູນຄ່າໄດ້ 266.666 ບາດ ຫຼື ປະມານ 74 ກວ່າລ້ານກີບ; ຊຶ່ງທາງສະຖານເອກອັກຄະລັດຖະທູດ ໄທ ປະຈຳ ສປປ ລາວ, ສະພາທຸລະກິດໄທ-ລາວ ແລະ ສະມາຄົມນັກທຸລະກິດໄທ ໃນ ສປປ ລາວ ໄດ້ຮ່ວມກັນຈັດງານ ແຂ່ງຂັນ Rally ເຊື່ອມສາຍພົວພັນ ໄທ-ລາວ ຄັ້ງທີ 01 ຂຶ້ນ, ທີ່ນະຄອນຫຼວງວຽງຈັນ ລະຫວ່າງວັນທີ 02-04 ພະຈິກ 2018 ຜ່ານມາ.
ການມອບ-ຮັບຂັນລາງວັນ ໃນຄັ້ງນີ້ຈະແບ່ງເປັນ 2 ປະເພດລາງວັນ ຄື: ລາງວັນທີມຊະນະເລີດ ມີ 2 ລາງວັນ ແລະ ລາງວັນທີມບູ້ບີ້ 2 ລາງວັນ ຊຶ່ງທີມທີ່ໄດ້ຮັບລາງວັນຊະນະເລີດໄດ້ແກ່ ທີມມະຫາວິທະຍາໄລສີປະທຸມ ໂດຍມີທ່ານ ຜູ້ຊ່ວຍສາດສະດາຈານ ດຣ ໄພຈິດ ຜາວັນ ແລະ ທ່ານ ຜູ້ຊ່ວຍສາດສະດາຈານ ດຣ ພອນໄຊ ຈູອະນຸວັດກຸນ ຂຶ້ນຮັບຂັນລາງວັນ; ແລະ ທີມທີ່ໄດ້ຮັບລາງວັນບູ້ບີ້ ຄື: ທີມຂອງ ທ່ານຈາຕຸລົງ ບຸນນາກ ແລະ ທ່ານ ວະລາວຸດ ມີສາຍຍາດ ຂຶ້ນຮັບລາງວັນ.
ແຫຼ່ງຂ່າວໂດຍ: ພະແນກຮ່ວມມືເສດຖະກິດການຄ້າ ກົມ ຜຮ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ
