ໃນຕອນບ່າຍຂອງວັນທີ 03 ມິຖຸນາ 2019 ເວລາ 1:30 ໂມງ ທີ່ຫ້ອງປະຊຸມໃຫຍ່ຊັ້ນ 1 ຂອງກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມ ກອງເລຂາຄະນະປະສານງານໂຄງການສົ່ງເສີມການຜະລິດເປັນສິນຄ້າ ແລະ ຄໍ້າປະກັນສະບຽງອາຫານ ລະຫວ່າງ ກະຊວງອຸດສາຫະກຳ ແລະ ການຄ້າ ແລະ ກະຊວງກະສິກຳ ແລະ ປ່າໄມ້ ເພື່ອປຶກສາຫາລືຊຸກຍູ້ສົ່ງເສີມສິນຄ້າກະສິກໍາສົ່ງອອກໄປ ສປ ຈີນ ຂຶ້ນ, ໂດຍການເປັນປະທານຂອງ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງ ອຸດສາຫະກຳ ແລະ ການຄ້າ ແລະ ປະທານຮ່ວມ ທ່ານ ປ.ອ ພວງປຣະລິສັກ ປຣະວົງວຽງຄໍາ ຮອງລັດຖະມົນຕີກະຊວງກະສິກຳ ແລະ ປ່າໄມ້, ພ້ອມທັງມີບັນດາຫົວຫນ້າ- ຮອງຫົວໜ້າກົມ, ຫົວຫນ້າ- ຮອງຫົວໜ້າພະແນກ ແລະ ວິຊາການທີ່ກ່ຽວຂ້ອງ ທັງສອງກະຊວງເຂົ້າຮ່ວມຈໍານວນ 33 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອປຶກສາຫາລື ກ່ຽວກັບການຊຸກຍູ້ສົ່ງເສີມສິນຄ້າກະສິກຳຂອງ ສປປ ລາວ ສົ່ງອອກໄປ ສປ ຈີນ, ພ້ອມທັງ ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ລະຫວ່າງສອງກະຊວງ ໃນລະດັບວິຊາການ ເພື່ອຈະມີກົນໄກ ແລະ ມາດຕະການໃນການຊຸກຍູ້ ສົ່ງເສີມສິນຄ້າກະສິກຳໃຫ້ສາມາດສົ່ງອອກໄປ ສປ ຈີນໄດ້.
ຫົວຂໍ້ທີ່ໄດ້ນຳສະເໜີປຶກສາຫາລືໃນກອງປະຊຸມໃນຄັ້ງນີ້ມີດັ່ງນີ້:
- ບົດບັນທຶກຄວາມເຂົ້າໃຈກ່ຽວກັບເພີ່ມທະວີການຮ່ວມມືດ້ານສິນຄ້າກະສິກຳ ລະຫວ່າງ ກະຊວງອຸດສາຫະກຳ ແລະ ການຄ້າ ສປປ ລາວ ແລະ ກະຊວງການຄ້າ ສປ ຈີນ;
- ສັນຍາວ່າດ້ວຍ ການເພີ່ມທະວີການຮ່ວມມືດ້ານເສດຖະກິດ ແລະ ການຄ້າຊາຍແດນ ລະຫວ່າງ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານແຫ່ງ ສາທາລະນະລັດປະຊາຊົນຈີນ;
- ບົດຮຽນການສົ່ງເສີມການສົ່ງອອກເຂົ້າ 20 ພັນໂຕນໄປ ສປ ຈີນທີ່ຜ່ານມາ ແລະ ແຜນການສົ່ງເສີມການສົ່ງອອກສິນຄ້າກະສິກໍາເຊັ່ນ: ເຂົ້າ, ສັດໃຫຍ່ ແລະ ຜະລິດຕະພັນ, ສິນຄ້າກະສິກຳອື່ນໆ;
- ສະເໜີຊ່ອງທາງການເຂົ້າເຖິງຕະຫລາດຂອງ ສປ ຈີນ:
- ການຫຼຸດອັດຕາພາສີຂອງຈີນ ທີ່ລາວໄດ້ຮັບໃນຂອບສັນຍາຕ່າງໆ;
- ແນະນໍາໂດຍຫຍໍ້ສັນຍາການຄ້າຊາຍແດນ ລາວ-ຈີນ.
5. ບົດສະເໜີ ກ່ຽວກັບ ບັນຫາ, ສິ່ງທ້າທາຍ ການສົ່ງອອກເຂົ້າ ໄປ ສປ ຈີນ ໃນໂກຕ້າ 50 ພັນໂຕນໃນແຜນການສົ່ງອອກ ປີ 2019-2020.
6. ບົດສະເໜີ ກ່ຽວກັບ ບັນຫາ, ສິ່ງທ້າທາຍ, ຄວາມສາມາດ ໃນການ ສົ່ງອອກ ສັດໃຫຍ່ (ງົວ) ຄາດຄະເນຈໍານວນ 500.000 ໂຕ ໄປຍັງ ສປ ຈີນ.
ພ້ອມດຽວກັນນີ້, ທັງສອງກະຊວງໄດ້ແລກປ່ຽນຄຳຄິດເຫັນດ້ານວິຊາການຢ່າງກົງໄປກົງມາ ແລະ ໃນຕອນທ້າຍທ່ານປະທານໄດ້ມອບໃຫ້ກົມປູກຝັງ ແລະ ກົມລ້ຽງສັດ ແລະ ການປະມົງ, ກະຊວງກະສິກໍາ ແລະ ປ່າໄມ້ ແລະ ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ ແລກປ່ຽນຂໍ້ມູນຂ່າວສານກັນຢ່າງສະໜິດແໜ້ນກວ່າເກົ່າ ແລະ ໃຫ້ມີກົນໄກການປະຊຸມປຶກສາຫາລືດ້ານວິຊາການຮ່ວມກັນ ເດືອນ/ຄັ້ງ.
ຂ່າວໂດຍ: ທ ພູຄຳ ຫຼວງສຸພົນ
ຮຽບຮຽງໂດຍ: ນ ຖື ແຫວນວົງສົດ
