ຕອນເຊົ້າ ເວລາ 9: 00 ໂມງ ຂອງວັນທີ 14 ມິຖຸນາ 2019 ທີ່ຫ້ອງປະຊຸມຊັ້ນ 4 ກະຊວງອຸດຫະກໍາ ແລະ ການຄ້າ; ທ່ານ ສີລິສຳພັນ ວໍຣະຈິດ ຫົວໜ້າກົມແຜນການ ແລະ ການຮ່ວມມື ກະຊວງ ອຄ ໄດ້ໃຫ້ກຽດຕ້ອນຮັບການເຂົ້າພົບປະ ຂອງທ່ານ ປາແວນ ໂອສະໂຕຣເວຣໂຮບ, ປະທານສະມາຄົມ ຊີບີຮີ ພ້ອມດ້ວຍຄະນະ ຊຶ່ງທ່ານໄດ້ນຳພານັກທຸລະກິດລັດເຊຍ ເຂົ້າ ພົບປະແລກປ່ຽນບົດຮຽນ ລະຫວ່າງ ຕາງໜ້າລັດຖະບານລາວ ກັບນັກທຸລະກິດລັດເຊຍ, ໂດຍມີຜູ້ຕາງໜ້າທັງສອງຝ່າຍເຂົ້າຮ່ວມ ປະມານ 15 ກວ່າທ່ານ.
ໂອກາດນີ້ ທ່ານ ສີລິສຳພັນ ວໍຣະຈິດ ຫົວໜ້າກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຊົມເຊີຍ ຕໍ່ ທ່ານ ປາແວນ ໂອສະໂຕຣເວຣໂຮບ, ທີ່ເຮັດໃຫ້ສາຍພົວພັນຮ່ວມມືທາງດ້ານ ການຄ້າ ແລະ ການລົງທຶນຂອງສອງປະເທດນັບມື້ນັບເພີ່ມຂຶ້ນ ໂດຍການນໍາພາ ນັກທຸລະກິດລັດເຊຍມາແລກປ່ຽນບົດຮຽນເຊິ່ງກັນ ແລະ ກັນ ເພື່ອສຶກສາຄວາມເປັນໄປໄດ້ທີ່ຈະມາລົງທຶນຢູ່ ສປປ ລາວ ດ້ານອຸດສາຫະກຳ, ຂະແໜງກະສິກຳ,ສິ່ງແວດລ້ອມ, ຄວາມປອດໄຟ, ຄວາມສະອາດເປັນທິດສີຂຽວ ແລະ ຄວາມເປັນລະບຽບຮຽບຮ້ອຍໃນຕົວເມືອງ ເປັນຕົ້ນ ໂດຍມີເຈດຈໍານົງ ຈະມາຕັ້ງໂຮງງານອຸປະກອນເຄື່ອງຈັກທີ່ທັນສະໄໝທຳລາຍຂີ້ເຫຍື້ອສິ່ງເສດເຫຼືອ ຢູ່ ສປປ ລາວ; ນອກຈາກນັ້ນຍັງຈະສຶກສາຂໍ້ມູນສິນຄ້ານຳເຂົ້າ-ສົ່ງອອກ ລະຫວ່າງ ສປປ ລາວ-ລັດເຊຍ ຊຶ່ງເປັນຕົວເລກສິນຄ້າຂ້ອນຂ້າງຕ່ຳ. ສະນັ້ນຕ້ອງໄດ້ສຶກສາໂຄງການທີ່ຈະມາລົງທຶນຢູ່ ສປປ ລາວ ໃຫ້ຫຼາຍຂຶ້ນ, ພ້ອມທັງຍັງເປັນຄູ່ຮ່ວມມືທີ່ດີ. ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ການຮ່ວມມືທີ່ເປັນມູນເຊື້ອອັນດີງາມ ແລະ ສືບຕໍ່ຮ່ວມພັດທະນາເສດຖະກິດ-ສັງຄົມ ແລະ ວຽກງານອື່ນໃນຕໍ່ໜ້າ ທີ່ຕ່າງຝ່າຍຕ່າງມີຜົນປະໂຫຍດຮ່ວມກັນ.
ທ່ານ ປາແວນ ໂອສະໂຕຣເວຣໂຮບ, ໄດ້ກ່າວວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ນຳພານັກທຸລະກິດເພື່ອສຶກສາແລກປ່ຽນບົດຮຽນ ,ເກັບກຳຂໍ້ມູນຄວາມເປັນໄປໄດ້ທີ່ຈະມາລົງທຶນຢູ່ ສປປ ລາວ ໃນຕໍ່ໜ້າ ທ່ານ ຍັງສະເໜີໃຫ້ເຈົ້າໜ້າທີ່ຝ່າຍລັດຂອງລາວ ຈົ່ງອຳນວຍຄວາມສະດວກໃຫ້ແກ່ນັກທຸລະກິດລັດເຊຍທີ່ຢາກມາລົງທຶນຢູ່ ສປປ ລາວ ໃນຕໍ່ໜ້າອີກດ້ວຍ .
ຂ່າວໂດຍ: ໄພຄໍອີ ວິໄລຄໍາ
