ໃນເວລາ 8:30ໂມງ ຂອງວັນທີ 24 ມິຖຸນາ 2019 ທີ່ຫ້ອງວ່າການປົກຄອງແຂວງ ຫລວງນໍ້າທາ ໄດ້ເປີດກອງປະຊຸມປຶກສາຫາລື ກ່ຽວກັບການສົ່ງອອກຜະລິດຕະພັນ ເປົ້າໝາຍຂອງໂຄງການ ສົ່ງເສີມໃນການແຂ່ງຂັນ ເພື່ອສົ່ງອອກຢູ່ 03 ແຂວງພາກເໜືອ ຂອງ ສປປ ລາວ ຫລື ໂຄງການ ECL  ພາຍໃຕ້ການເປັນປະທານ ຂອງທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໂດຍໃຫ້ກຽດເຂົ້າຮ່ວມມີ ທ່ານ ບູນຍີ່ ແກ້ວຄູນເມືອງ ຮອງເຈົ້າແຂວງ ແຂວງຫລວງນໍ້າທາ, ຕາງຫນ້າຈາກບັນດາກົມ ແລະ ຫ້ອງການກະຊວງ ອຄ, ໜ່ວຍງານປະສານງານປະຈໍາ 03 ແຂວງ ແລະ ພາກທຸລະກິດທັງ 03 ແຂວງ (ຜົ້ງສາລີ, ຫຼວງນໍ້າທາ ແລະ ອຸດົມໄຊ)

        ຈຸດປະສົງ ແລະ ເປົ້າໝາຍຂອງໂຄງການ ECL ແນໃສ່ການສົ່ງເສີມຄວາມສາມາດໃນການແຂ່ງຂັນ ເພື່ອສົ່ງອອກໂດຍປັບປຸງສະພາບແວດລ້ອມ ໃນການດໍາເນີນທຸລະກິດ ແລະ ສ້າງເວທີສົນທະນາ ລະຫວ່າງ ພາກລັດ ແລະ ພາກທຸລະກິດຂັ້ນແຂວງ ເຊິ່ງໄດ້ກໍານົດເອົາສິນຄ້າ ເຂົ້າ ຂອງແຂວງຫຼວງນໍ້າທາ, ສາລີ ຂອງແຂວງອຸດົມໄຊ, ຊາ ຂອງແຂວງຜົ້ງສາລີ ເປັນສິນຄ້າທ່າແຮງ ເພື່ອການສົ່ງອອກ.

      ນອກນີ້, ຍັງໄດ້ມອບ-ຮັບອຸປະກອນຮັບໃຊ້ຫ້ອງການ ແລະ ພາຫະນະ(ລົດຈັກ)ໃຫ້ໜ່ວຍງານປະສານງານໂຄງການ ECLປະຈໍາ 03 ແຂວງ ເພື່ອຮັບໃຊ້ເຂົ້າໃນກິດຈະກໍາຂອງໂຄງການ, ກອງປະຊຸມດັ່ງກ່າວໄດ້ດໍາເນີນເປັນເວລາ 02 ວັນເຕັມ (24-25/6/2019).

 ຂ່າວໂດຍ: ທ່ານ ບຸນທະວີ ພະແນກ ອຄ ແຂວງ ອຸດົມໄຊ

ຮຽບຮຽງໂດຍ: ພູຄໍາ ຫລວງສຸພົນ