ໃນວັນທີ 9 ກໍລະກົດ 2019 ທີ່ຫ້ອງການອຸດສາຫະກຳ ແລະ ການຄ້າເມືອງນາໝໍ້ ໄດ້ເປີດກອງປະຊຸມພົບປະລະຫວ່າງອົງການປົກຄອງເມືອງ ແລະ ພາກທຸລະກິດ, ຜູ້ປະກອບການ ຄັ້ງທີ I ທົ່ວເມືອງຂຶ້ນ ໂດຍການເປັນປະທານຂອງທ່ານ ໃຈເພັດ ຄຳມະລີ ເລຂາພັກເມືອງ, ເຈົ້າເມືອງນາໝໍ້ເປັນກຽດເປັນປະທານຮ່ວມໂດຍທ່ານ ຄຳເພົ້າ ສິລິສຸກ ກຳມະການພັກແຂວງ, ຫົວໜ້າພະແນກອຸດສາຫະກຳ ແລະ ການຄ້າແຂວງອຸດົມໄຊ, ມີຄະນະປະຈຳພັກເມືອງ, ຫົວໜ້າ, ຮອງຫົວໜ້າຫ້ອງການທີ່ກ່ຽວຂ້ອງຂັ້ນແຂວງ, ເມືອງ, ສະພາການຄ້າ ແລະ ອຸດສາຫະກຳແຂວງ ແລະ ຜູ້ປະກອບການທຸລະກິດພາຍໃນເມືອງເຂົ້າຮ່ວມ.

        ຈຸດປະສົງຂອງກອງປະຊຸມແມ່ນເພື່ອສະຫລຸບ ຕີລາຄາຂໍ້ສະດວກ, ຂໍ້ຫຍຸ້ງຍາກ, ຖອດຖອນບົດຮຽນ, ແລກປ່ຽນຄຳຄິດຄຳເຫັນ ສະພາບຂໍ້ຫຍຸ້ງຍາກ ແລະ ສົ່ງເສີມອໍານວຍຄວາມສະດວກ ລະຫວ່າງພາກລັດ ແລະ ທຸລະກິດໃນການຄຸ້ມຄອງ ແລະ ການດຳເນີນທຸລະກິດ ໃນໄລຍະຜ່ານມາ; ທີ່ປະຊຸມໄດ້ມີການຖາມ ແລະ ຊີ້ແຈງບັນຫາຕ່າງໆ ໃຫ້ມີຄວາມຮັບຮູ້ເຂົ້າໃຈ, ພ້ອມນີ້ກໍ່ຍັງມີຄຳສະເໜີ ຂອງທຸລະກິດຕໍ່ພາກລັດນຳໄປພິຈາລະແກ້ໄຂໃນຕໍ່ໜ້າ.

                    ກອງປະຊຸມໄດ້ດຳເນີນໄປເວລາ 01 ວັນ ແລະ ປິດລົງດ້ວຍຜົນສຳເລັດຕາມລະດັບຄາດໝາຍ.

ແຫຼ່ງຂ່າວ ແລະ ພາບໂດຍ: ບຸນທະວີ ພະແນກ ອຄ ແຂວງອຸດົມໄຊ

ຮຽບຮຽງໂດຍ: ພູຄໍາ ຫລວງສຸພົນ ສູນສະຖິຕິ ແລະ ຂໍ້ມູນຂ່າວສານ