ໂດຍປະຕິບັດເນື້ອໃນຈິດໃຈຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງລັດຖະບານ, ຂອງແຂວງ ແລະ ຂອງເມືອງ ເຂົ້າສູ່ຂົງເຂດວຽກງານຂອງຕົນຢ່າງເປັນຂະບວນຟົດຟື້ນ ກ້ວາງຂວາງເວົ້າລວມ, ເວົ້າສະເພາະ ກໍ່ຄືການຊຸກຍູ້ສົ່ງເສີມປະຊາຊົນຜະລິດເປັນສິນຄ້າ ເພື່ອນໍາໃຊ້ສີມືແຮງງານ, ພູມປັນຍາ, ຫົວຄິດປະດິດສ້າງທີ່ມີມູນເຊື້ອ ແລະ ເປັນມໍລະດົກຕົກທອດກັນມາ ແລະ ຊັບພະຍາກອນພາຍໃນທ້ອງຖິ່ນ ຕິດພັນກັບການຈັດສັນໃຫ້ປະຊາຊົນມີອາຊີບທີ່ໝັ້ນຄົງ ເຮັດໃຫ້ລາຍຮັບ GDP ຕໍ່ຄົນຕໍ່ຄອບຄົວເພີ່ມຂຶ້ນ ເພື່ອແກ້ໄຂຊີວິດການເປັນຢູ່ໃຫ້ດີຂຶ້ນເປັນກ້າວໆນັ້ນ; ໃນຕອນບ່າຍຂອງວັນທີ 11 ກໍລະກົດ 2019 ນີ້ ພະແນກອຸດສາຫະກໍາ ແລະ ການຄ້າແຂວງ ຮ່ວມກັບຜູ້ປະກອບການ ໄດ້ຈັດພິທີເປີດຮ້ານຂາຍຜະລິດຕະພັນ ແຂວງຜົ້ງສາລີ ຂຶ້ນຢ່າງເປັນທາງການ ນະທີ່ ບ້ານ ຮົ່ມສະຫວ່າງ, ເມືອງ ແລະ ແຂວງຜົ້ງສາລີ ໃຫ້ກຽດເປັນປະທານຂອງທ່ານ ຄໍາເຈນ ວົງໂພສີ ກໍາມະການສູນກາງພັກ, ເລຂາພັກແຂວງ-ເຈົ້າແຂວງໆຜົ້ງສາລີ, ມີບັນດາທ່ານ ກໍາມະການປະຈໍາພັກແຂວງ, ກໍາມະການພັກແຂວງ, ບັນດາທ່ານເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າພະແນກ, ນາຍບ້ານ ຕະຫຼອດຮອດພາກສ່ວນທຸລະກິດເຂົ້າຮ່ວມ.

      ໃນພິທີທ່ານ ທະນູຄໍາ ປິດຈະວົງ ເລຂາໜ່ວຍພັກ ຫົວໜ້າພະແນກອຸດສາຫະກໍາ ແລະ ການຄ້າແຂວງ ໄດ້ຂຶ້ນລາຍງານສະພາບຄວາມເປັນມາຂອງການຊຸກຍູ້ສົ່ງເສີມການຜະລິດເປັນສິນຄ້າ, ສິນຄ້າໂອດ໋ອບແຫ່ງຊາດໃນໄລຍະຜ່ານມາ ແລະ ທິດທາງແຜນການຊຸກຍູ້ສົ່ງເສີມໃນຕໍ່ໜ້າ ທັງນີ້ກໍ່ເພື່ອສົ່ງເສີມການຜະລິດສິນຄ້າທ່າແຮງຂອງແຕ່ລະເມືອງ ໂດຍສະເພາະສິນຄ້າໂອດ໋ອບຂອງແຂວງຜົ້ງສາລີ ໃຫ້ຂະຫຍາຍຕົວຢ່າງແຂງແຮງ, ໄດ້ມາດຕະຖານເທື່ອລະກ້າວ ແລະ ຕິດພັນກັບຕະຫຼາດແບບຍືນຍົງ, ທັງເປັນການຊຸກຍູ້ສົ່ງເສີມການຜະລິດປຸງແຕ່ງໃຫ້ມີການຂະຫຍາຍຕົວ ແລະ ມີຄຸນນະພາບຕາມຄວາມຕ້ອງການຂອງຕະຫຼາດເພື່ອພັດທະນາໃຫ້ກາຍເປັນສິນຄ້າໂອດ໋ອບ(ໜຶ່ງເມືອງໜຶ່ງຜະລິດຕະພັນແຫ່ງຊາດ) ເຊິ່ງປະຈຸບັນແຂວງຜົ້ງສາລີ ມີຜະລິດຕະພັນທີ່ໄດ້ຮັບກາໝາຍສິນຄ້າໂອດ໋ອບແຫ່ງຊາດ ລວມມີ 8 ກາໝາຍເຊັ່ນ: ຜະລິດຕະພັນ ຊາຂຽວ ຂອງຜົ້ງສາລີ, ຊາພຽງໂມຢາ ບ້ານບໍ່ກົ້ງ ຂອງເມືອງຜົ້ງສາລີ, ຊາບັ້ງ ບ້ານລຸງຈິ້ງ ຂອງເມືອງຜົ້ງສາລີ, ຊາພະຍາສີ ຂອງເມືອງຜົ້ງສາລີ, ຫັດຖະກໍາແຜ່ນແພ ບ້ານລ້ອງນາຍເກົ່າ ຂອງເມືອງບຸນໃຕ້, ຫັດຖະກໍາຕໍ່າຫູກທໍໄໝ( ໄໝມ້ອນ) ບ້ານຫ້ວຍດ້ອຍ ຂອງເມືອງໃໝ່, ນໍ້າເຜີ້ງທໍາມະຊາດ ບ້ານແສນລາດ ຂອງເມືອງຂວາ ແລະ ຫັດຖະກໍາໄມ້ປ່ອງ ບ້ານຕ້າງ ຂອງເມືອງຍອດອູ, ທັງເປັນການສົ່ງເສີມການຊື້-ການຂາຍ ເພື່ອສ້າງອາຊີບ, ສ້າງວຽກເຮັດງານທໍາ ແລະ ສ້າງລາຍໄດ້ໃຫ້ປະຊາຊົນບັນດາເຜົ່າເພື່ອຫຼຸດພົ້ນອອກຈາກຄວາມທຸກຍາກເທື່ອລະກ້າວ.

       ໂອກາດນີ້ຜູ້ເຂົ້າຮ່ວມຍັງໄດ້ທ່ຽວຊົມຜະລິດຕະພັນສິນຄ້າໂອດ໋ອບ, ຜະລິດຕະພັນທົ່ວໄປ, ຜະລິດຕະພັນກະສິກໍາ, ຫັດຖະກໍາ ແລະ ຊື້ສິນຄ້າ ຢ່າງເປັນຂະບວນການຟົດຟື້ນ.

ພາບ ແລະ ຂ່າວໂດຍ: ນາງ ວຽງສຸກ ໄຊຍະສິງ ພະແນກ ອຄ ແຂວງຜົ້ງສາລີ

ຮຽບຮຽງໂດຍ: ນາງ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ