ຕອນບ່າຍ ເວລາ 15: 00 ໂມງ ຂອງວັນທີ 17 ກໍລະກົດ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ; ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ David Hugh Evans, ເອກອັກຄະລັດຖະທູດຜູ້ມີອໍານາດເຕັມແຫ່ງ ປະເທດ ອັງກິດ ມີສໍານັກງານສະຖານທູດທີ່ຕັ້ງຢູ່ ສປປ ລາວ ໃນໂອກາດການສໍາເລັດການປະຕິບັດໜ້າທີ່ທາງການທູດປະຈໍາຢູ່ ສປປ ລາວ; ການເຂົ້າຢ້ຽມຂໍ່ານັບຄັ້ງນີ້ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 8 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ David Hugh Evans, ໄດ້ເຮັດໃຫ້ສາຍພົວພັນຮ່ວມມື ລະຫວ່າງສອງປະເທດນັບມື້ແໜ້ນແຟ້ນຍິ່ງຂຶ້ນ ແລະ ຕີລາຄາສູງຕໍ່ການຊ່ວຍເຫຼືອຫຼາຍດ້ານໃຫ້ແກ່ລາວ ເປັນຕົ້ນການຮ່ວມມືທາງດ້ານການຄ້າ ການລົງທຶນໂຄງການໃຫຍ່ທີ່ປິ່ນອ້ອມໃຫ້ແກ່ເສດຖະກິດຂອງລາວ ແລະ ໂຄງການແລກປ່ຽນອື່ນໆ ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ; ນອກນັ້ນຍັງເປັນຄູ່ຮ່ວມມືທີ່ດີ. ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍການຮ່ວມພັດທະນາເສດຖະກິດ-ສັງຄົມ ແລະ ວຽກງານອື່ນໃນຕໍ່ໜ້າ ທີ່ຕ່າງຝ່າຍຕ່າງມີຜົນປະໂຫຍດຮ່ວມກັນ.
ທ່ານ David Hugh Evans, ໄດ້ກ່າວວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ດໍາລົງຕໍາແໜ່ງເປັນເອກອັກຄະລັດຖະທູດຜູ້ມີອໍານາດເຕັມແຫ່ງປະເທດ ອັງກິດ ປະຈໍາຢູ່ ສປປ ລາວ ແລະ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ໃນໄລຍະຜ່ານມາທີ່ອໍານວຍຄວາມສະດວກໃຫ້ແກ່ຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ໄດ້ອວຍພອນໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ຫວັງວ່າທ່ານຈະເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນເລື້ອຍໆ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
