ຕອນບ່າຍ ເວລາ 13:30 ໂມງ ຂອງວັນທີ 23 ກໍລະກົດ 2019 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ມີພິທີເປີດ ໂຄງການທຶນສົມທົບເພື່ອສົ່ງເສີມທຸລະກິດ ໄລຍະ 2 ຂຶ້ນ ໂດຍເນື້ອໃນເປົ້າໝາຍ ເພື່ອເປີດທຶນສົມທົບຂອງພາກລັດສົ່ງເສີມຫົວໜ່ວຍທຸລະກິດໃນການສ້າງຍຸດທະສາດ ຫຼື ແຜນຂະຫຍາຍທຸລະກິດ ໄລຍະ 2 ພາຍໃຕ້ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ; ພິທີດັ່ງກ່າວມີຜູ້ເຂົ້າຮ່ວມທັງພາກລັດ ແລະ ທຸລະກິດປະມານ 150 ກວ່າທ່ານ.
ພິທີເປີດ ໃຫ້ກຽດເປັນປະທານ ໂດຍທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ທ່ານໄດ້ກ່າວເປີດພິທີ ແລະ ຈຸດປະສົງຕົ້ນຕໍຂອງໂຄງການທຶນສົມທົບເພື່ອສົ່ງເສີມທຸລະກິດໄລຍະ 2 ພາຍໃຕ້ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ ແລະ ການເປັນປະທານຮ່ວມ ຂອງ ທ່ານ Jean Bernard Carrasco, ເອກອັກຄະລັດຖະທູດ ອົສຕຣາລີ ປະຈຳລາວ ພ້ອມດ້ວຍ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ. ຂຶ້ນສະເໜີບົດໂຄງການ ໂດຍທ່ານ Henri Stetter ຫົວໜ້າທີມໂຄງການ BAF ໄດ້ກ່າວວ່າ: ຮູບແບບການຊ່ວຍເຫຼືອບັນດາບໍລິສັດ ເພື່ອຂະຫຍາຍທຸລະກິດສົ່ງເສີມໂຄງການພາກເອກະຊົນພັດທະນາທຸລະກິດ ແລະ ເປັນການຊຸກຍູ້ກະຕຸ້ນໃຫ້ບໍລິສັດ ຫັນມາສົນໃຈການບໍລິການທຸລະກິດຂອງຕົນດີຂຶ້ນ. ການສົ່ງເສີມໂຄງການນີ້ ມີ 2 ຮູບແບບ ຄື: 1. ການບໍລິການໃຫ້ຄຳປຶກສາ ໂດຍບໍ່ຄິດໄລ່ຄ່າ ບໍລິການ ເພື່ອຊ່ວຍໃຫ້ຄຳແນະນຳແກ່ບັນດາບໍລິສັດ ໃນການປັບປຸງດຳເນີນທຸລະກິດ, ສ້າງຜະລິດຕະພັນ ແລະ ການບໍລິການທີ່ດີກວ່າເກົ່າ ແລະ ສ້າງຄວາມອາດສາມາດໃນການແຂ່ງຂັນໃຫ້ມີຄວາມເຂັ້ມແຂງ ແລະ 2. ທຶນສົມທົບ 50% ສຳລັບຄ່າໃຊ້ຈ່າຍໃນການຈັດຊື້ຈັດຈ້າງ ວິຊາການ ໂດຍທຶນຊ່ວຍເຫຼືອສູງສຸດຕໍ່ 01 ບໍລິສັດ 200.000 ໂດລາສະຫະລັດ ຕະຫຼອດໄລຍະໂຄງການ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
