ຕອນເຊົ້າ ເວລາ 10: 30 ໂມງ ຂອງວັນທີ 29 ສິງຫາ 2019 ໂດຍໄດ້ຮັບການແຈ້ງຈາກພົນລະເມືອງດີ ສະນັ້ນເຈົ້າໜ້າທີ່ກວດກາການຄ້າພາຍໃນ ຂອງກະຊວງອຸດສາຫະກໍາ ແລະ ການຄ້າ ໄດ້ສົມທົບກັບເຈົ້າໜ້າທີ່ກວດກາການຄ້ານະຄອນຫຼວງ, ໄດ້ລົງໄປກວດກາ ຮ້ານຂາຍເຄື່ອງຢູ່ຕາມນະຄອນຫຼວງ ໄດ້ພົບເຫັນສິນຄ້ານອກລະບົບອຸປະກອນຮັບສັນຍານໂທລະພາບຜ່ານດາວທຽມ ທີ່ລົບຫຼີກພາສີ ການນຳເຂົ້າ ຂອງ ສປປ ລາວ ສະນັ້ນເຈົ້າໜ້າທີ່ຂະແໜງການ ທີ່ກ່ຽວຂ້ອງ ໄດ້ລົງ ໄປຍຶດ ແລະທຳລາຍສິນຄ້ານຳເຂົ້າຜິດກົດໝາຍ ຢູ່ສະຖານທີ່ບຳບັດຂີ້ເຫຍື້ອຫຼັກ 32, ເມືອງໄຊທານີ ນະຄອນຫຼວງວຽງຈັນ, ການທຳລາຍຄັ້ງນີ້ ມູນຄ່າທັງໝົດ: 503.850.000 ກີບ ມີຜູ້ເຂົ້າຮ່ວມເປັນສັກຂີພິຍານຈາກເຈົ້າໜ້າທີ່ຂະແໜງການທີ່ກ່ຽວຂ້ອງ ປະມານ 30 ກວ່າທ່ານ.
ພິທີທໍາລາຍເຄື່ອງອຸປະກອນຮັບສັນຍານໂທລະພາບ ອິນຟໍແຊັດ ໂດຍການເປັນປະທານ ຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ມີຫົວໜ້າ -ຮອງຫົວໜ້າກົມ, ຫົວໜ້າ – ຮອງຫົວໜ້າພະແນກ ກະຊວງອຸດສາຫະກໍາ ແລະ ການຄ້າ, ຫົວໜ້າກົມພາສີ ກະຊວງການເງິນ, ຫົວໜ້າກົມຄື້ນຄວາມຖີ່ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະ ຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ພ້ອມດ້ວຍວິຊາການຈຳນວນໜຶ່ງທີ່ກ່ຽວຂ້ອງເຂົ້າຮ່ວມ; ນອກຈາກນັ້ນ
ສົມຈິດ ອິນທະມິດ ຮອງລັດຖະມົນຕີ ກໍ່ໄດ້ໃຫ້ສຳພາດຕໍ່ນັກຂ່າວໂທລະພາບແຫ່ງຊາດລາວ ແລະ ສື່ມວນຊົນ ໃນການມາທຳລາຍເຄື່ອງຮັບສັນຍານໂທລະພາບຄັ້ງນີ້ ເປັນສິນຄ້ານຳເຂົ້າມາທີ່ບໍ່ຖືກຕ້ອງຕາມລະບຽບກົດໝາຍ ຂອງ ສປປ ລາວ ໂດຍພໍ່ຄ້າ-ແມ່ຄ້າ ລັກລອບນຳເຂົ້າມາ ບໍ່ໄດ້ຜ່ານລິຂະສິດຂອງບໍລິສັດທີ່ນຳເຂົ້າ. ພ້ອມດຽວກັນນີ້, ສິນຄ້າອື່ນໆ ກໍເຊັ່ນກັນ ຖ້າເຈົ້າໜ້າທີ່ລັດຫາກພົບເຫັນ ການກະທໍາຜິດ ກໍຈະນໍາມາທຳລາຍ ເພື່ອຄວາມເປັນລະບຽບຮຽບຮ້ອຍ ແລະ ເປັນທຳຂອງສັງຄົມ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
