ໃນລະຫວ່າງວັນທີ 8 – 9 ກັນຍາ 2019, ທ່ານ Rodrigo Malmierca Diaz, ລັດຖະມົນຕີ ກະຊວງການຄ້າ ແລະ ການລົງທຶນຕ່າງປະເທດ ຂອງ ສ ກູບາ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ພົບປະກັບຂະແໜງການກ່ຽວຂ້ອງຂອງ ສປປ ລາວ ໂດຍການຮັບຕ້ອນຂອງທ່ານ ສົມຈິດ ອິນທະມິດ, ຮອງລັດຖະມົນຕີ ທັງເປັນຜູ້ຮັກສາການລັດຖະມົນຕີ ຂອງກະຊວງອຸດສາຫະກຳ ແລະ ການຄ້າ.
ຈຸດປະສົງຂອງການຢ້ຽມຢາມຄັ້ງນີ້ ແມ່ນເພື່ອຮັດແໜ້ນສາຍພົວພັນຂອງສອງລັດຖະບານ ແລະ ຜັນຂະຫຍາຍຜົນການຢ້ຽມຢາມການນຳຂັ້ນສູງຂອງທັງສອງຝ່າຍໃນທ້າຍປີ 2018 ແລະ ຕົ້ນປີ 2019 ທີ່ການນຳຂັ້ນສູງຂອງ ສປປ ລາວ ໄດ້ເດີນທາງໄປຢ້ຽມຢາມ ສ ກູບາ ທີ່ທັງສອງຝ່າຍໄດ້ເປັນເອກະພາບກັນໃນການສົ່ງເສີມການພົບປະແລກປ່ຽນຂອງຂະແໜງການກ່ຽວຂ້ອງ.
ການຢ້ຽມຢາມຄັ້ງນີ້ ຖືໄດ້ວ່າເປັນຄັ້ງທຳອິດທີ່ຂະແໜງການກ່ຽວຂ້ອງຂອງ ສ ກູບາ ໄດ້ນຳພາຄະນະມາພົບປະກັບຂະແໜງການກ່ຽວຂ້ອງຂອງ ສປປ ລາວ ເພື່ອຊຸກຍູ້ແລກປ່ຽນຂໍ້ມູນຂ່າວສານເຊິ່ງກັນ ແລະ ກັນ ເພື່ອກ້າວໄປເຖິງການຊອກຊ່ອງທາງໃນການແລກປ່ຽນສິນຄ້າ ແລະ ການລົງທຶນ.
ພ້ອມດຽວກັນນີ້, ຄະນະຍັງໄດ້ພົບປະກັບສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ນັກທຸລະກິດລາວຈຳນວນຫນຶ່ງ ເພື່ອສຶກສາ ແລະ ແລກປ່ຽນບົດຮຽນໃນການດຳເນີນທຸລະກິດຢູ່ ສປປ ລາວ ລວມທັງຊຸກຍູ້ນັກທຸລະກິດລາວ ໄປສຶກສາຄວາມເປັນໄປໄດ້ໃນການລົງທຶນຢູ່ ສກູບາ. ນອກຈາກນີ້, ທາງຄະນະຍັງ ໄດ້ໄປຢ້ຽມຢາມຖານການຜະລິດກະສິກຳ ແລະ ການບໍລິການ ຂອງພາກເອກະຊົນ ທີ່ນະຄອນຫລວງວຽງຈັນ.
ແຫຼ່ງຂໍ້ມູນໂດຍ: ພະແນກຮ່ວມມືເສດຖະກິດການຄ້າ, ກົມແຜນການ ແລະ ການຮ່ວມມື
ຮຽບຮຽງໂດຍ: ພູຄໍາ ຫລວງສຸພົນ ສູນສະຖິຕິ ແລະ ຂໍ້ມູນຂ່າວສານ, ກົມແຜນການ ແລະ ການຮ່ວມມື
