ຕອນເຊົ້າຂອງວັນທີ 17 ກັນຍາ 2019 ເວລາ 9:30ໂມງ  ໄດ້ເປີດພິທີຖະແຫຼງຂ່າວຂຶ້ນ, ທີ່ຫ້ອງປະຊຸມຊັ້ນ 02, ກະຊວງອຸດສາຫະກໍາ ແລະ ການຄ້າ ໂດຍການເປັນປະທານ ຂອງທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ປອ ວຽງທອງ ຈັນລີວົງ ຜູ້ອຳນວຍການບໍລິສັດ ລ້ານຊ້າງມີເດຍ ຈຳກັດຜູ້ດຽວ ປະທານຮ່ວມ, ມີບັນດາແຂກທີ່ເຂົ້າຮ່ວມຈາກກະຊວງຖະແຫຼງຂ່າວ, ວັດທະນາທໍາ ແລະ ທ່ອງທ່ຽວ ຊຶ່ງຕາງໜ້າ ກົມສື່ມວນຊົນ, ກົມພິມຈຳໜ່າຍ,  ສະມາຄົມນັກຂ່າວ ; ບັນດາຫົວໜ້າກົມ, ຮອງຫົວໜ້າກົມ, ວິຊາການອ້ອມຂ້າງກະຊວງອຸດສາຫະກໍາ ແລະ ການຄ້າ ແລະ ບັນດານັກຂ່າວ ຈາກໜັງສືພິມວຽງຈັນໃໝ່, ວຽງຈັນທາມ, ປະຊາຊົນ, ປະ​ເທດ​ລາວ, ລາວ​ພັດທະນາ, ກອງທັບ, ປ້ອງ​ກັນ​ຄວາມ​ສະຫງົບ, ​ໂທລະພາບ​ແຫ່ງ​ຊາດ, ວິທະຍຸ​ກະຈາຍ

ສຽງແຫ່ງ​ຊາດ ກໍໄດ້ເຂົ້າຮ່ວມ.

          ຈຸດປະສົງຂອງພິທີຖະແຫຼງຂ່າວໃນຄັ້ງນີ້ ເພື່ອປັບປຸງຂະໜາດໜັງສືພິມເສດຖະກິດ-ການຄ້າ ເປັນໜ້ານ້ອຍຂະໜາດ (30×42 ຊມ) ໃຫ້ສະດວກໃນການອ່ານ ແລະ ທີ່ສໍາຄັນແມ່ນໄດ້ຫຼຸດຕົ້ນທຶນການຜະລິດໄດ້ເຖິງ 10 % ສ່ວນຄຸນນະພາບ, ຈໍານວນໜ້າ, ເນື້ອໃນຕ່າງໆ ແມ່ນຮັກສາໄວ້ດັ່ງເດີມຄືຜ່ານມາ;

​           ໜັງສືພິມເສດຖະກິດ – ການຄ້າ ຕາມການລາຍງານຂອງ ທ່ານ ປອ ວຽງທອງ ຈັນລີວົງ ຜູ້ອໍານວຍການບໍລິສັດ ລ້ານຊ້າງມີເດຍ ຈຳກັດຜູ້ດຽວ, ໄດ້ເລີ່​ມຈັດພິມຈຳໜ່າຍອອກເປັນ​ລາຍ​ສັບປະດາ​ ໃນ​ຕົ້ນ​ເດືອນ ຕຸລາ 2011 (ຂະໜາດໜ້ານ້ອຍ) ​ແລະ   ​ໄດ້​ພິມ​ເປັນ​ລາຍ​ວັນ​ ເລີ່​ມ​ແຕ່ວັນ​ທີ 15 ມັງກອນ 2013 ມີ​ທັງໝົດ 24 ໜ້າ ( ຂະໜາດໜ້າໃຫຍ່ສີ​ທັງໝົດ ) ຈົນມາເຖິງປັດຈຸບັນ, ໄປພ້ອມກັບການພັດທະນາສື່ອອນລາຍຂອງຕົນຂຶ້ນເປັນກ້າວໆ.

              ຕະຫຼອດເກືອບ 7 ປີ ທີ່ພິມໜ້າຂະໜາດໃຫຍ່ໜັງສືພິມເສດຖະກິດ-ການຄ້າ ສາມາດຕອບສະໜອງໄດ້ຂໍ້ມູນຂ່າວທີ່ວ່ອງໄວ, ມີຄຸນນະພາບ ໃຫ້ແກ່ສັງຄົມ ຈົນໄດ້ຮັບການຍ້ອງຍໍຈາກການນໍາພັກ-ລັດ ໃນລະດັບຕ່າງໆ. ນອກນັ້ນກໍ່ໄດ້ຮັບການສະໜັບສະໜູນອູ້ມຊູເປັນຢ່າງດີຈາກທ່ານຜູ້ອ່ານ, ບໍລິສັດຫ້າງຮ້ານຕ່າງໆ ຕະຫຼອດມາຈົນໜັງສືພິມເສດຖະ ກິດ-ການຄ້າ ສາມາດເຕີບໃຫຍ່ຂະຫຍາຍຕົວ ແລະ ພັດທະນາມາຮອດທຸກວັນນີ້. ດັ່ງທີ່ພວກເຮົາຮັບຮູ້ແລ້ວວ່າ ໂລກໄດ້ກ້າວເຂົ້າສູ່ຍຸກດີຈີຕອລ ສື່ມວນຊົນແບບດັ່ງເດີມຈຳເປັນຕ້ອງໄດ້ມີການປັບຕົວເພື່ອພັດທະນາໃຫ້ຍືນຍົງ ແລະ ເຂັ້ມແຂງຍິ່ງຂຶ້ນ ໂດຍການໝູນໃຊ້ລະບົບດິຈິຕອລ.

          ດັ່ງນັ້ນ, ການປັບປຸງໜ້າໜັງສືພິມຄັ້ງນີ້ ເປົ້າໝາຍຫລັກກໍ່ແມ່ນການປັບໂຄງສ້າງໜັງສືພິມເສດຖະກິດ-ການຄ້າ ເຂົ້າສູ່ລະບົບດິຈິຕອລ ເຮັດໃຫ້ຂໍ້ມູນ-ຂ່າວສານສາມາດເຂົ້າເຖິງຜູ້ອ່ານຜູ້ຊົມໄດ້ຢ່າງກວ້າງຂວາງ ທັງມີປະສິດທິຜົນຫຼາຍຂຶ້ນ ເຊິ່ງກໍເປັນການຕອບສະໜອງແນວທາງຂອງພັກ ແລະ ລັດຖະບານ ໃນການກະຈາຍຂໍ້ມູນ-ຂ່າວສານທີ່ຖືກຕ້ອງ ເຂົ້າເຖິງສັງຄົມຢ່າງທົ່ວເຖິງ, ຕອບຕ້ານຖ້ອຍທໍານອງໃສ່ຮ້າຍປ້າຍສີຂອງກຸ່ມຄົນບໍ່ດີໄດ້ຢ່າງທັນການ.

          ພ້ອມດຽວກັນນີ້, ທ່ານ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ທີ່ເປັນຜູ້ຊີ້ນຳໂດຍກົງຕໍ່ໜັງສືພິມເສດຖະກິດ ການຄ້າ ເຫັນວ່າການປັບປຸງຄັ້ງນີ້ ເປັນການປັບປຸງທີ່ສອດຄ່ອງກັບຍຸກສະໄໝ ແລະ ຍຸດທະສາດການພັດທະນາ ຂອງລັດຖະບານໃນການຫັນໄປສູ່ດິຈິຕອລ.

ຮຽບຮຽງໂດຍ: ພູຄໍາ ຫລວງສຸພົນ ກົມແຜນການ ແລະ ການຮ່ວມມື