ວັນທີ 24 ກັນຍາ 2019 ທີ່ຜ່ານມາ ກົມທະບຽນ ແລະ ຄຸ້ມຄອງວິສາຫະກິດ ກະຊວງອຸດສາຫະກຳ ແລະ ການຄ້າ ຮ່ວມກັບ ການນຳແຂວງ ແລະ ພະແນກອຸດສາຫະກຳ ແລະ ການຄ້າ ແຂວງຜົ້ງສາລີ ໂດຍໄດ້ຮັບການສະໜັບສະໜູນຈາກ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກ ແລະ ສົ່ງເສີມຄວາມຍືນຍົງໃນການປະສານງານລະຫວ່າງພາກລັດ-ທຸລະກິດ ຢູ່ 3 ແຂວງພາກເໜືອຂອງ ສປປ ລາວ (ECL) ໄດ້ຈັດກອງປະຊຸມເຜີຍແຜ່ ການເລີ່ມຕົ້ນທຸລະກິດ ແລະ ການປະກອບທຸລະກິດ ຕາມຄຳສັ່ງ ນາຍົກລັດຖະມົນຕີ ສະບັບເລກທີ 02/ນຍ, ລົງວັນທີ 1 ກຸມພາ 2018 ວ່າດ້ວຍການປັບປຸງລະບຽບການ ແລະ ກົນໄກປະສານງານ ໃນການດຳເນີນທຸລະກິດຢູ່ ສປປ ລາວ ແລະ ຂໍ້ຕົກລົງ ລັດຖະມົນຕີກະຊວງອຸດສາຫະກຳ ແລະ ການຄ້າ ສະບັບເລກທີ 0023/ອຄ.ກທຄວ, ລົງວັນທີ 9 ມັງກອນ 2019 ວ່າດ້ວຍການຂຶ້ນທະບຽນວິສາຫະກິດ ທີ່ຫ້ອງວ່າການປົກຄອງແຂວງ ຜົ້ງສາລີ ໂດຍເປັນປະທານຮ່ວມຂອງທ່ານ ປອ ສົມພວງ ພຽນພິນິດ ຫົວໜ້າກົມທະບຽນ ແລະ ຄຸ້ມຄອງວິສາຫະກິດ ກະຊວງອຸດສາຫະກຳ ແລະ ການຄ້າ ແລະ ທ່ານ ຄຳເຫຼັກ ໃຈອີສານ ຄະນະປະຈຳພັກແຂວງ ຫົວໜ້າພະແນກແຜນການ ແລະ ການລົງທຶນ ແຂວງຜົ້ງສາລີ ມີຮອງຫົວໜ້າກົມ, ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ, ມີບັນດາຮອງເຈົ້າເມືອງ, ຫົວໜ້າ- ຮອງຫົວໜ້າຫ້ອງການອຸດສາຫະກຳ ແລະ ການຄ້າ 7 ເມືອງ, ພ້ອມດ້ວຍພະນັກງານວິຊາການ ແລະ ຕົວແທນຈາກສະພາການຄ້າ ແລະ ອຸດສາຫະກຳແຂວງຜົ້ງສາລີເຂົ້າຮ່ວມ.
ເພື່ອເຮັດໃຫ້ວຽກງານການບໍລິການ, ການຄຸ້ມຄອງ, ຊຸກຍູ້ສົ່ງເສີມຫົວໜ່ວຍທຸລະກິດຢູ່ແຂວງຜົ້ງສາລີ ໃຫ້ມີຄວາມສະດວກ, ກະທັດຮັດ, ວ່ອງໄວ, ໂປ່ງໃສ ແນໃສ່ຂະຫຍາຍຫົວໜ່ວຍທຸລະກິດໃຫ້ເພີ່ມຂຶ້ນທາງດ້ານຈຳນວນ ແລະ ຄຸນນະພາບ ກອງປະຊຸມໄດ້ແນະນຳຂັ້ນຂອດການຈັດຕັ້ງປະຕິບັດວຽກງານເລີ່ມຕົ້ນທຸລະກິດ, ສ້າງຄວາມເຂົ້າໃຈ, ຄວາມຖືກຕ້ອງ, ສອດຄ່ອງ ໄປໃນທິດທາງດຽວກັນ ແລະ ມີຄວາມເປັນເອກະພາບກັນໃນທົ່ວປະເທດ. ພັກ ແລະ ລັດຖະບານ ໄດ້ໃຫ້ຄວາມສຳຄັນເປັນຢ່າງຍິ່ງ ເຊິ່ງການດຳເນີນທຸລະກິດທີ່ດີ ເປັນປັດໄຈພື້ນຖານໃນການສ້າງປະຊາກອນທຸລະກິດໃຫ້ເຕີບໃຫຍ່ ເຂັ້ມແຂງ ດຶງດູດການລົງທຶນ ເຂົ້າໃນການພັດທະນາເສດຖະກິດຂອງປະເທດ ໃຫ້ມີຄວາມເຂັ້ມແຂງ ຍືນຍົງ, ດ້ວຍຄວາມມຸ່ງໝັ້ນໃນການສ້າງບາດກ້າວບຸກທະລຸ ທັບມ້າງສິ່ງອັດຕັນ ຂັ້ນຂອດທີ່ເປັນອຸປະສັກກີດຂວາງ ກົດໜ່ວງ ສ້າງຄວາມລຳຄານແກ່ການປະກອບອາຊີບຂອງປະຊາຊົນບັນດາເຜົ່າ ແນໃສ່ພັດທະນາເສດຖະກິດໃຫ້ມີບາດກ້າວໃໝ່ ທີ່ເປັນຮູບປະທຳຢ່າງແທ້ຈິງ, ລັດຖະບານຈຶ່ງໄດ້ອອກຄຳສັ່ງ ເພື່ອປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດຢູ່ລາວ ທີ່ປະກອບດ້ວຍ 10 ຕົວຊີ້ວັດ (ຕາມມາດຕະຖານສາກົນ) ໃຫ້ດີຂຶ້ນ ເພື່ອສ້າງຄວາມສະດວກໃນການດຳເນີນທຸລະກິດຂອງປະເທດເຮົາ ໃຫ້ສາມາດເລື່ອນລະດັບຈາກ 3 ຕົວເລກໃນປັດຈຸບັນມາຢູ່ອັນດັບ 2 ຕົວເລກ ໜຶ່ງໃນ 10 ຕົວຊີ້ວັດທີ່ລະບຸໃນຄຳສັ່ງ ຂອງນາຍົກລັດຖະມົນຕີ ມີຕົວຊີ້ວັດກ່ຽວກັບ “ການເລີ່ມຕົ້ນທຸລະກິດ” ເຊິ່ງການຂຶ້ນທະບຽນວິສາຫະກິດເປັນຂອດສຳຄັນໜຶ່ງ ຂອງຕົວຊີ້ວັດດັ່ງກ່າວ.
ໃນໄລຍະຜ່ານມາ ກະຊວງອຸດສາຫະກຳ ແລະ ການຄ້າ ໃນຖານະຂະແໜງການທີ່ໄດ້ຮັບມອບໝາຍ ໃຫ້ເປັນໃຈກາງຮັບຜິດຊອບປະສານງານ ແລະ ປັບປຸງລະບຽບການກ່ຽວກັບຕົວຊີ້ວັດ “ການເລີ່ມຕົ້ນທຸລະກິດ” ໄດ້ໃຊ້ຄວາມພະຍາຍາມ ເພື່ອໃຫ້ຕົວຊີ້ວັດນີ້ມີການປ່ຽນແປງທີ່ດີຂຶ້ນ ເລີ່ມແຕ່ວັນທີ 1 ກຸມພາ 2019 ເປັນຕົ້ນມາ ໄດ້ຈັດຕັ້ງປະຕິບັດການແຈ້ງຂຶ້ນທະບຽນວິສາຫະກິດລະບົບໃໝ່ ເຊິ່ງມີການປ່ຽນແປງ ຄື: ການຍົກເລີກແບບພິມທີ່ຕັ້ງສຳນັກງານ ແບບພິມກົດລະບຽບຂອງບໍລິສັດ ຈາກສຳນວນຄຳຮ້ອງ ລົບລ້າງໃບອະນຸຍາດຜະລິດປ້າຍ ໃບອະນຸຍາດຄວັດຕາປະທັບ ເຈົ້າໜ້າທີ່ ປກສ ໄດ້ກະຈາຍໜ່ວຍຄວັດຕາປະທັບລົງທ້ອງຖິ່ນ ເຈົ້າໜ້າທີ່ ປກສ ໄດ້ລົບລ້າງການລົງທະບຽນນຳໃຊ້ຕາປະທັບ ການແຈ້ງຂຶ້ນທະບຽນວິສາຫະກິດ ໄດ້ອອກເລກປະຈຳຕົວຜູ້ເສຍອາກອນພ້ອມ ທັງໝົດນີ້ມັນຈະຊ່ວຍເຮັດໃຫ້ເວລາສັ້ນລົງ ແລະ ຕົ້ນທຶນການເລີ່ມຕົ້ນທຸລະກິດຫຼຸດຄ່າໃຊ້ຈ່າຍ.
ຂ່າວ-ພາບ: ແສງວິລັດ ຍົດສະຫວັດ ພະແນກ ອຄ ແຂວງຜົ້ງສາລີ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ, ກ ຜຮ
