ຕອນເຊົ້າ ເວລາ 9:00 ໂມງ ຂອງວັນທີ 26 ກັນຍາ 2019 ທີ່ຫ້ອງປະຊຸມໃຫຍ່ຊັ້ນ 1 ກະຊວງອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ເຕິ້ງ ໂບຊິ່ງ ( Deng Boqing ) ຮອງຫົວໜ້າອົງການຮ່ວມມືສາກົນ ເພື່ອພັດທະນາ ແຫ່ງຊາດຈີນ ພ້ອມດ້ວຍຄະນະ ແລະ ມີທ່ານ Jiang Zaidong, ຜູ້ຕາງໜ້າເອກອັກຄະລັດຖະທູດ ຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ເຂົ້າຮ່ວມ. ການພົບປະຄັ້ງນີ້ມີຜູ້ຕາງໜ້າຈາກ ສອງຝ່າຍເຂົ້າຮ່ວມປະມານ 40 ທ່ານ.
ໃນໂອກາດນີ້ ສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນບັນດາໂຄງໃຫຍ່ແຫ່ງຊາດຈີນ ທີ່ລົງທຶນພັດທະນາໂຄງລ່າງພື້ນຖານໃຫ້ແກ່ ສປປ ລາວ ເປັນຕົ້ນໂຄງການກໍ່ສ້າງທາງລົດໄຟ ລາວ-ຈີນ, ໂຄງການຊ່ວຍເຫຼືອລ້າ ແລະ ໂຄງການກູ້ຢືມໂດຍບໍ່ຫວັງຜົນກຳໄລ ແລະ ດອກເບ້ຍ ແລະ ການຊ່ວຍເຫຼືອບັນດາໂຄງການອື່ນໆທີ່ຜ່ານມາ.
ພ້ອມກັນນີ້ຍັງສືບຕໍ່ຊຸກຍູ້ 8 ໂຄງການໃຫຍ່ ທີ່ສະຫາຍເລຂາທິການໃຫຍ່ພັກຄອມມູນິດຈີນ ທ່ານ ສີ ຈິ້ນຜິງ ໄດ້ປະກາດ ໃຫ້ການຊ່ວຍເຫຼືອແກ່ລັດຖະບານລາວ, ທີ່ໄດ້ຈັດຕັ້ງປະຕິບັດການລົງສຳຫຼວດໂຄງການຈຳນວນໜຶ່ງ ຢູ່ແຂວງຫລວງພະບາງ ແລະ ນະຄອນຫລວງວຽງຈັນ ເປັນຕົ້ນການຖືກຜົນກະທົບເຂດໂຄງການແລວທາງລົດໄຟ ລາວ-ຈີນ ໂດຍທາງໂຄງການຈະຊົດເຊີຍຄ່າທີ່ດິນ ແລະ ເຮືອນຊານໃຫ້ແກ່ປະຊາຊົນ, ໂຄງການຮ່ວມມືສ້າງບ້ານຕົວແບບແກ້ໄຂຄວາມທຸກຍາກ ລາວ-ຈີນ ຢູ່ບ້ານຊຽງລ້ອມ ແລະ ບ້ານອູ້ ແຂວງຫຼວງພະບາງ, ກໍ່້ສ້າງໂຮງໝໍຫລວງພະບາງ.
ຢູ່ນະຄອນຫລວງວຽງຈັນ ມີໂຄງການປັບປຸງໂຮງໝໍມະໂຫສົດ, ໂຮງຮຽນເພຍວັດ ແລະ ໂຮງຮຽນເມືອງນາຊາຍທອງ, ປັບປຸງອາຄານຫ້ອງການສູນກາງ, ໂຄງການຮ່ວມມືເຕັກນິກໄລຍະ 3 ຫໍປະຊຸມແຫ່ງຊາດ ທັງສອງຝ່າຍໄດ້ທົບທວນຄືນ ແລະ ປຶກສາຫາລືໂຄງການຊ່ວຍເຫຼືອໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ; ຈາກນັ້ນສອງຝ່າຍກໍ່ໄດ້ມີການລົງນາມເອກະສານຮ່ວມມື ລະຫວ່າງ ຄະນະກຳມະການຮ່ວມມື ລາວ-ຈີນ ແລະ ອົງການ ຮ່ວມມືສາກົນ ເພື່ອພັດທະນາ ແຫ່ງຊາດຈີນ (CIDCA).
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
