ເພື່ອເປັນການຈັດຕັ້ງຜັນຂະຫຍາຍກົດໝາຍ ວ່າດ້ວຍການແຂ່ງຂັນທາງທຸລະກິດ ສະບັບເລກທີ 60/ສພຊ, ລົງວັນທີ 14 ກໍລະກົດ 2015. ໃນໄລຍະຜ່ານມາ ກົມການຄ້າພາຍໃນ ໄດ້ຄົ້ນຄວ້າຜັນຂະຫຍາຍໂຄງປະກອບການຈັດຕັ້ງຂອງວຽກງານແຂ່ງຂັນທາງທຸລະກິດ ຊຶ່ງປະກອບມີ ຄະນະກຳມະການຄວບຄຸມການແຂ່ງຂັນທາງທຸລະກິດ (ຄຂທ) ແລະ ກອງເລຂາ ຄຂທ (ຫ້ອງການກອງເລຂາ ຄຂທ), ແຕ່ໃນຄັ້ງນີ້ແມ່ນຜັນຂະຫຍາຍ ມາດຕາ 52 ເຈົ້າໜ້າທີ່ກວດກາການແຂ່ງຂັນທາງທຸລະກິດ ຊຶ່ງຢູ່ພາຍໃຕ້ຫ້ອງການກອງເລຂາ ຄຂທ  ໂດຍໄດ້ຮັບທິດຊີ້ນຳຈາກຄະນະນຳກະຊວງ ອຸດສາຫະກຳ ແລະ ການຄ້າ ຈຶ່ງໄດ້ແຕ່ງຕັ້ງຄະນະຮັບຜິດຊອບສ້າງຮ່າງນິຕິກຳໃຕ້ກົດໝາຍ ວ່າດ້ວຍການແຂ່ງຂັນທາງທຸລະກິດ ໂດຍຜັນຂະຫຍາຍມາດຕາ 52 ຂອງກົດໝາຍດັ່ງກ່າວ ແລະ ຄະນະດັ່ງກ່າວ ໄດ້ເລີ່ມຄົ້ນຄວ້າບັນດານິຕິກຳທີ່ກ່ຽວຂ້ອງ ແລະ ສຶກສາບົດຮຽນຈາກອົງການແຂ່ງຂັນທາງທຸລະກິດ ຂອງບັນດາປະເທດສະມາຊິກອາຊຽນ ແລະ ສາກົນ ເພື່ອມາຮ່າງເປັນຂໍ້ຕົກລົງ ວ່າດ້ວຍເຈົ້າໜ້າທີ່ກວດກາການແຂ່ງຂັນທາງທຸລະກິດ (ຈກຂຂທ).

        ກອງປະຊຸມຄັ້ງປະຖົມມະລຶກ ຂອງຄະນະຮັບຜິດຊອບຮ່າງນິຕິກຳໃຕ້ກົດໝາຍ ວ່າດ້ວຍການແຂ່ງຂັນທາງທຸລະກິດ ເພື່ອຜັນຂະຫຍາຍມາດຕາ 52 ຂອງກົດໝາຍດັ່ງກ່າວ ໂດຍໄດ້ຈັດຂຶ້ນວັນທີ 10 ກັນຍາ 2019, ທີ່ກະຊວງອຸດສາຫະກຳ ແລະ ການຄ້າ ໂດຍການເປັນປະທານຂອງທ່ານ ວາລະໄຊ ເລັ່ງສະຫວັດ, ກົມການຄ້າພາຍໃນ ຊຶ່ງມີຜູ້ເຂົ້າຮ່ວມຈາກຜູ້ທີ່ຖືກແຕ່ງຕັ້ງໃນຄະນະຮັບຜິດຊອບສ້າງຮ່າງນິຕິກຳດັ່ງກ່າວ ທີ່ຢູ່ພາຍໃນກະຊວງອຸດສາຫະກຳ ແລະ ການຄ້າ.

        ຈຸດປະສົງຂອງກອງປະຊຸມແມ່ນເປັນການພົບປະ ແລະ ແລກປ່ຽນຄວາມຄິດເຫັນ ລະຫວ່າງຄະນະຮັບຜິດຊອບສ້າງນິຕິກຳໃຕ້ກົດໝາຍ ວ່າດ້ວຍການແຂ່ງຂັນທາງທຸລະກິດ ຢ່າງເປັນທາງການ, ພ້ອມທັງຄົ້ນຄວ້າປະກອບຄຳເຫັນໃສ່ຮ່າງຂໍ້ຕົົກລົງ ວ່າດ້ວຍເຈົ້າໜ້າທີ່ກວດກາການແຂ່ງຂັນທາງທຸລະກິດ ແລະ ແຜນການຈັດຕັ້ງປະຕິບັດຜັນຂະຫຍາຍນິຕິກຳໃຕ້ກົດໝາຍ ວ່າດ້ວຍການແຂ່ງຂັນທາງທຸລະກິດຕາມມາດຕາ 52 ວ່າດ້ວຍເຈົ້າໜ້າທີ່ກວດກາການແຂ່ງຂັນທາງທຸລະກິດ ນັບແຕ່ເດືອນກັນຍາ ຫາ ເດືອນທັນວາ 2019 ເພື່ອໃຫ້ສາມາດປະກາດໃຊ້ໃນທ້າຍປີນີ້ ຫຼືື ຕົ້ນປີ 2020.

        ຮ່າງຂໍ້ຕົກລົງສະບັບນີ້ ມີຄວາມໝາຍສຳຄັນ ແລະ ຈຳເປັນ ຊຶ່ງໄດ້ກຳນົດທີ່ຕັ້ງ, ພາລະບົດບາດ, ໂຄງປະກອບການຈັດຕັ້ງ, ເງື່ອນໄຂມາດຖານ, ສິດ ແລະ ໜ້າທີ່, ຂັ້ນຕອນການກວດກາ ແລະ ມາດຕະການກ່ຽວກັບການເຈົ້າໜ້າທີ່ກວດກາການແຂ່ງຂັນທາງທຸລະກິດ ເພື່ອສະກັດກັ້ນບັນດາພຶດຕິກຳການດຳເນີນທຸລະກິດທີ່ລະເມີດລະບຽບ ແລະ ກົດໝາຍວ່າດ້ວຍການແຂ່ງຂັນທາງທຸລະກິດ ເປັນຕົ້ນການຈຳກັດການແຂ່ງຂັນທາງທຸລະກິດ ແລະ ການແຂ່ງຂັນທີ່ບໍ່ເປັນທຳ ແນໃສ່ຊຸກຍູ້, ສົ່ງເສີມ ແລະ ປົກປ້ອງການດຳເນີນທຸລະກິດທີ່ເປັນທຳ, ເຄື່ອນໄຫວໃຫ້ຖືກຕ້ອງ, ສອດຄ່ອງກັບລະບຽບກົດໝາຍໃຫ້ໄປຕາມກົນໄກຂອງເສດຖະກິດຕະຫຼາດ ທີ່ມີການດັດສົມຂອງລັດ, ສົ່ງເສີມການຜະລິດສິນຄ້າ ແລະ ບໍລິການ, ທັງເປັນການປະກອບສ່ວນເຂົ້າການພັດທະນາເສດຖະກິດ ແລະ ປົກປ້ອງສິດຜົນປະໂຫຍດຂອງຜູ້ຊົມໃຊ້.

        ນອກນັ້ນ, ໃນຮ່າງຂໍ້ຕົກລົງ ຍັງໄດ້ກຳນົດພາລະບົດບາດເຈົ້າໜ້າທີ່ກວດກາການແຂ່ງຂັນທາງທຸລະກິດ ແມ່ນເຮັດໜ້າທີ່ແກ້ໄຂຂໍ້ຂັດແຍ່ງ ກ່ຽວກັບວຽກງານການແຂ່ງຂັນທາງທຸລະກິດ ແລະ ຈັດຕັ້ງປະຕິບັດລະບຽບການ ແລະ ກົດໝາຍ ວ່າດ້ວຍການແຂ່ງຂັນທາງທຸລະກິດ, ຊຸກຍູ້, ສົ່ງເສີມ ໃຫ້ບັນດາຫົວໜ່ວຍທຸລະກິດ ໃຫ້ມີຄວາມຕື່ນຕົວເຄົາລົບ ແລະ ປະຕິບັດລະບຽບກົດໝາຍ ຢ່າງເຂັ້ມງວດ, ປະສານສົມທົບກັບຂະແໜງການທີ່ກ່ຽວຂ້ອງຢ່າງແໜ້ນແຟ້ນ ເພື່ອຄຸ້ມຄອງການແຂ່ງຂັນທາງທຸລະກິດໃຫ້ມີຄວາມເປັນທຳ ແລະ ຖືກຕ້ອງ; ເຮັດໜ້າທີ່ແກ້ໄຂຂໍ້ຂັດແຍ່ງ ກ່ຽວກັບວຽກງານການແຂ່ງຂັນທາງທຸລະກິດ ແລະ ຈັດຕັ້ງປະຕິບັດລະບຽບການ ແລະ ກົດໝາຍ ວ່າດ້ວຍການແຂ່ງຂັນທາງທຸລະກິດ.

ຂ່າວ-ພາບໂດຍ: ທ ທັດດາວວີ ສີກະເສີມຄ່ຽມ ພະແນກຄຸ້ມຄອງການແຂ່ງຂັນທຸລະກິດ ກຄພນ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ