ຕອນເຊົ້າເວລາ 9:00 ໂມງ ຂອງວັນທີ 07 ພະຈິກ 2019 ທີ່ຫ້ອງປະຊຸມໃຫຍ່ຊັ້ນ I ກະຊວງ ອຄ ໄດ້ເປີດກອງປະຊຸມເຜີຍແຜ່ ຄໍາສັ່ງຂອງກະຊວງປ້ອງກັນຄວາມສະຫງົບ, ວ່າດ້ວຍການນໍາໃຊ້ສື່ສັງຄົມອອນລາຍໃນໝູ່ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ແລະ ມີບັນດາທ່ານ ຮອງຫົວໜ້າກົມ, ຫົວໜ້າ-ຮອງພະແນກ ຂອງບັນດາກົມ, ຫ້ອງການ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ບັນດາລັດວິສາຫະກິດ, ບໍລິສັດ ທີ່ຂຶ້ນກັບຄວາມຮັບຜິດຊອບຂອງກະຊວງ ອຄ ເຂົ້າຮ່ວມຮັບຟັງການເຜີຍແຜ່, ເຊື່ອມຊຶມໂຄສະນາ, ສຶກສາອົບຮົມການເມືອງແນວຄິດນີ້ທັງໝົດ 60 ກວ່າທ່ານ.
ກອງປະຊຸມຄັ້ງນີ້ ໂດຍພາຍໃຕ້ການເປັນປະທານ ຂອງທ່ານ ບຸນມີ ມະນີວົງ ຮອງເລຂາພັກກະຊວງ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ຫົວໜ້າຄະນະປ້ອງກັນພາຍໃນ ໂດຍມີຈຸດປະສົງ ເພື່ອເຮັດໃຫ້ພະນັກງານ-ລັດຖະກອນ ຂອງກະຊວງ ອຄ ໄດ້ຮັບຮູ້ ແລະ ເຂົ້າໃຈ , ດ້ານດີ ແລະ ສິ່ງຫຍໍ້ທໍ້ ຕໍ່ກັບການນໍາໃຊ້ສື່ສັງຄົມອອນລາຍ, ໃນສະພາບການຂອງໂລກ ແລະ ພາຍໃນປະເທດເຮົາ ຊຶ່ງຍາມໃດພວກປໍລະປັກ, ບໍ່ຫວັງດີ, ກໍ່ຍັງຫວັງມ້າງເພລະບອບໃໝ່ຂອງພວກເຮົາ, ພວກເຂົາໂຄສະນາບິດເບືອນຄວາມເປັນຈິງຂອງການນໍາເຮົາ.
ພ້ອມທັງການຂຶ້ນສະເໜີອ່ານຜ່ານເອກະສານຄໍາສັ່ງ ຂອງກະຊວງປ້ອງກັນຄວາມສະຫງົບ ວ່າດ້ວຍການນໍາໃຊ້ສື່ສັງຄົມອອນລາຍ ສະບັບເລກທີ 583/ປກສ ລົງວັນທີ 03/03/2019 ກ່ຽວກັບການນໍາໃຊ້ສື່ສັງຄົມອອນລາຍ ຢ່າງມີສະຕິຕໍ່ກັບພະນັກງານ-ສະມາຊິກພັກ, ລັດຖະກອນຂອງ ຫ້ອງການ, ບັນດາກົມ, ສະຖາບັນ, ບໍລິສັດ ແລະ ລັດວິສາຫະກິດ ທີ່ຂຶ້ນກັບກະຊວງອຸດສາຫະກໍາ ແລະ ການຄ້າ.
ຕອນທ້າຍ ທ່ານ ບຸນມີ ມະນີວົງ ຮອງເລຂາພັກກະຊວງ, ຮອງລັດຖະມົນຕີ ກະຊວງ ອຄ ໄດ້ໃຫ້ການໂອ້ລົມທິດຊີ້ນໍາ ໃຫ້ແກ່ພະນັກງານທົ່ວກະຊວງ ອຄ ໂດຍນໍາເອົາເນື້ອໃນການປ້ອງກັນເວນຍາມຕາມສະຖານທີ່ໃນຂອບເຂດຄວາມຮັບຜິດຊອບຂອງຕົນ ເພື່ອຄວາມເປັນລະບຽບຮຽບຮ້ອຍຢ່າງໜັກແໜ້ນ, ຮັບປະກັນຄວາມສະຫງົບປອດໄພໃຫ້ໄດ້ 100%, ຮັບປະກັນບໍ່ໃຫ້ມີ ລະເບີດແຕກ ຫຼື ສຽງດັງຄ້າຍຄືລະເບີດ, ກໍ່ເຫດອາລະວາດ, ຂີ້ລັກງັດແງະ, ຄົນບໍ່ຫວັງດີມ້າງເພທໍາລາຍ ແລະ ຮັບປະກັນບໍ່ໃຫ້ມີວັດຖຸຂອງສ່ວນລວມກໍ່ຄືຊັບສິນ ຂອງພະນັກງານພາຍໃນກະຊວງ ອຄ ແລະ ກົມກອງຕ່າງໆໃນຂອບເຂດຂອງຕົນຮັບຜິດຊອບຖືກເສຍຫາຍ ເນື່ອງໃນໂອກາດການຈັດຕັ້ງສະເຫຼີມສະຫຼອງວັນບຸນປະເພນີມະນັດສະການພະທາດຫຼວງ ແລະ ບຸນວັນຊາດທີ 2 ທັນວາ ທີ່ຈະໝູນວຽນມາເຖິງນີ້.
ພາບ-ຂ່າວໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມຜຮ
