ຕອນບ່າຍ ເວລາ 14:00 ໂມງ ຂອງວັນທີ 08 ພະຈິກ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ບຸນມີ ມະນີວົງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ ນາງ Marinela Petkova , ເອກອັກຄະລັດຖະທູດ ແຫ່ງສາທາລະນະລັດ ບູນກາລີ ປະຈໍາ ສປປ ລາວ ຄົນໃໝ່ພ້ອມດ້ວຍທ່ານທີ່ປຶກສາທູດເສດຖະກິດການຄ້າ ເຊິ່ງມີສໍານັກງານສະຖານເອກອັກຄະລັດຖະທູດຕັ້ງຢູ່ ຮ່າໂນ້ຍ ສສ ຫວຽດນາມ ໃນໂອກາດມາຍື່ນສານຕາຕັ້ງຕໍ່ທ່ານປະທານປະເທດ ແຫ່ງ ສປປ ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 06 ທ່ານ.
ໂອກາດນີ້ ທ່ານ ບຸນມີ ມະນີວົງ ກໍ່ແດງຄວາມຍິນດີຕ້ອນຮັບ ທ່ານ ນາງ Marinela Petkova, ທີ່ໄດ້ມາດຳລົງຕຳແໜ່ງທາງການທູດ ຊຶ່ງຈະເຮັດໜ້າທີ່ດ້ານການທູດໃຫ້ແກ່ ສອງປະເທດລະຫວ່າງ ລາວ-ບູນກາລີ ທັງສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນຂະຫຍາຍສາຍພົວພັນທີ່ດີ ດ້ານການເມືອງ, ການຄ້າ, ການລົງທຶນ ແລະ ການສຶກສາຂອງລາວ. ນອກນັ້ນຍັງໄດ້ສະເໜີ ແຜນການຮ່ວມມືໃນຕໍ່ໜ້າໂດຍເນັ້ນໃສ່ ການລະດົມໃຫ້ນັກທຸລະກິດບູນກາລີ ມາສຶກສາຄວາມເປັນໄປໄດ້ດ້ານທຸລະກິດການຄ້າ ການລົງທຶນຢູ່ລາວ, ໃຫ້ນັກທຸລະກິດສອງປະເທດໄດ້ພົບປະ ຈັບຄູ່ທຸລະກິດຮ່ວມມືກັນ ມີການຊື້-ຂາຍສິນຄ້ານໍາກັນຫຼາຍຂຶ້ນ, ອີກຢ່າງໜຶ່ງການວາງສະແດງສິນຄ້ານໍາກັນກໍ່ຈະເຮັດໃຫ້ການຄ້າ, ການລົງທຶນລະຫວ່າງສອງປະເທດເພີ່ມຂຶ້ນ ແລະ ການໃຫ້ທຶນການສຶກສາແກ່ພະນັກງານ ຫຼື ນັກສຶກສາລາວໄປຮຽນຢູ່ປະເທດບູນກາລີຄືສະໄໝກ່ອນ ຫຼື ຈະສົ່ງອາຈານສອນຈາກປະເທດ ບູນກາລີມາສອນໃຫ້ກໍ່ໄດ້; ພ້ອມທັງສະເໜີ ໃຫ້ທ່ານທູດຊຸກຍູ້ສອງກະຊວງ ອຄ ລາວ-ບູນກາລີ ໄດ້ພົບປະ ແລກປ່ຽນຂໍ້ມູນຂ່າວສານຊຶ່ງກັນ ແລະ ກັນຫຼາຍຂຶ້ນ, ໃນນີ້ ທ່ານ ນາງ Marinela Petkova ເອກອັກຄະລັດຖະທູດ ໄດ້ໃຫ້ຄໍາໝັ້ນສັນຍາໃນຕໍ່ໜ້າຈະສືບຕໍ່ໃຫ້ການຮ່ວມມື, ການແລກປ່ຽນຂໍ້ມູນຂ່າວສານ ຊຶ່ງກັນ ແລະ ກັນໃຫ້ຫຼາຍຂຶ້ນ ໂດຍສະເພາະຂະແໜງກະສິກໍາ ແລະ ທ່ອງທ່ຽວຂອງ ສປປ ລາວ.
ໃນຕອນທ້າຍ ທ່ານ ບຸນມີ ມະນີວົງ ສະແດງຄວາມຍິນດີ ຕໍ່ທ່ານ ເອກອັກຄະລັດຖະທູດ ແຫ່ງສາທາລະນະລັດ ບູນກາລີ ທີ່ຈະໃຫ້ການຮ່ວມມື ແລະ ພັດທະນາຂະແໜງການກະສິກໍາ ແລະ ທ່ອງທ່ຽວຂອງລາວ ໃຫ້ຂະຫຍາຍຕົວ ແລະ ອວຍພອນໄຊໃຫ້ມີສຸຂະພາບແຂງແຮງ, ເຮັດສໍາເລັດໃນໜ້າທີ່ຂອງທ່ານ ແລະ ທ່ານ ເອກອັກຄະລັດຖະທູດ ກໍ່ສະແດງຄວາມຂອບໃຈ ມາຍັງທ່ານຮອງລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບ ພ້ອມທັງມອບເຄື່ອງທີ່ລະນຶກໃຫ້ແກ່ທ່ານ ຮອງລັດຖະມົນຕີ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
