ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະລົງຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ ໃນວັນທີ 21 ພະຈິກ 2019 ຜ່ານມາ ໃຫ້ກຽດຕ້ອນຮັບໂດຍທ່ານ ທະນູຄຳ ປີດຈະວົງ ຫົວໜ້າພະແນກອຸດສາຫະກຳ ແລະ ການຄ້າ ແຂວງຜົ້ງສາລີ, ມີ ບັນດາ​ທ່ານຮອງຫົວໜ້າພະແນກ, ຫົວໜ້າ ຂະແໜງ, ຮອງຫົວໜ້າຂະແໜງ ແລະ ຫົວໜ້າຫ້ອງການອຸດສາຫະກຳ ແລະ ການຄ້າ ບັນດາເມືອງ ​ເຂົ້າຮ່ວມ ຈໍານວນ 37 ທ່ານ ຍິງ 11 ທ່ານ.

        ໃນໂອກາດດັ່ງກ່າວ, ທ່ານຮອງລັດຖະມົນຕີ ໄດ້ຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາວຽກງານອຸດສາຫະກຳ ແລະ ການຄ້າຂອງແຂວງຜົ້ງສາລີ ໃນ 9 ເດືອນປີ 2019 ຜ່ານມາ.   ໂດຍສະເພາະວຽກງານ ການປະຕິບັດການແຈ້ງຂຶ້ນທະບຽນວິສາຫະກິດ 113 ຫົວໜ່ວຍ ມີທຶນຈົດທະບຽນທັງໝົດ 89,75 ຕື້ກີບ ແລະ 967.742 ໂດລາ, ດັດແກ້ເພີ່ມທຶນເພີ່ມກິດຈະການ 34 ຫົວໜ່ວຍ, ທຶນຈົດທະບຽນ 9,13 ຕື້ກີບ ແລະ 992.885 ໂດລາ, ລົບລ້າງທະບຽນວິສາຫະກິດຊົ່ວຄາວ 1 ຫົວໜ່ວຍ, ທຶນຈົດທະບຽນ 596 ລ້ານກີບ. ການຜະລິດ ແລະ ຈໍາໜ່າຍ ມູນຄ່າທັງໝົດ 311,14 ຕື້ກີບ, ໃນນີ້ ມູນຄ່າການຜະລິດ 135,28 ຕື້ກີບ ແລະ ມູນຄ່າການຈໍາໜ່າຍ 175,86 ຕື້ກີບ. ການຈໍລະຈອນສິນຄ້າຊື້ເຂົ້າ – ຂາຍອອກ ​ແລະ ​ເກັບ​ຊື້​ຜະລິດ​ຕະພັນ​ພາຍ​ໃນ ລວມມູນຄ່າ: 750,98 ຕື້ກີບ ໃນນັ້ນ ການ​ຈໍ​ລະ​ຈອນຊື້ເຂົ້າ 303,29 ຕື້ກີບ ແລະ ມູນຄ່າຂາຍອອກ 340,43 ຕື້ກີບ. ມູນຄ່າການນໍາເຂົ້າ ແລະ ສົ່ງອອກ ລວມ​ທັງ​ໝົດ​ 320,66 ຕື້ກີບ, ໃນນັ້ນ ມູນຄ່າການນໍາເຂົ້າ 181,15 ຕື້ກີບ ແລະ ມູນຄ່າການສົ່ງອອກ 139,51 ຕື້ກີບ ປັດຈຸບັນທົ່ວແຂວງຜົ້ງສາລີ ມີຈໍານວນສິນຄ້າ ໂອດັອບ ແຫ່ງຊາດ “ໜຶ່ງເມືອງ ໜຶ່ງຜະລິດຕະພັນ” ທັງໝົດ 8 ລາຍການ ຄື: ເມືອງຜົ້ງສາລີ 4 ລາຍການ, ເມືອງບຸນໃຕ້ 1 ລາຍການ, ເມືອງຂວາ 1 ລາຍການ, ເມືອງໃໝ່ 1 ລາຍການ ແລະ ເມືອງຍອດອູ 1 ລາຍການ.

         ພ້ອມດຽວກັນນີ້, ທ່ານຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ກໍ່ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳ ຕໍ່ຄະນະນຳພະແນກອຸດສາຫະກຳ ແລະ ການຄ້າ, ຫ້ອງການອຸດສາຫະກຳ ແລະ ການຄ້າເມືອງ ເປັນຕົ້ນແມ່ນການເຮັດໃຫ້ສັງຄົມ ມີຄວາມສະຫງົບໃນການຊົມໃຊ້ສິນຄ້າ, ການຜະລິດພາຍ​ໃນ, ການສົ່ງເສີມການຜະລິດສິນຄ້າໂອດ໋ອບ ຕ້ອງແນະນຳໃຫ້ມີ ວັນເດືອນປີ ການຜະລິດ ແລະ ສ້າງກິດຈະກຳສົ່ງເສີມຜະລິດຕະພັນຕ່າງໆ ເຊັ່ນ: ການສ້າງເທດສະການ ດື່ມຊາ ຢູ່ນະຄອນຫຼວງວຽງຈັນ ແລະ ທ່ານ ຍັງໄດ້ເນັ້ນໜັກໃຫ້ພະແນກອຸດສາຫະກຳ ແລະ ການຄ້າ ສົມທົບກັບສະພາການຄ້າ ແລະ ອຸດສາຫະກຳ ແຂວງຜົ້ງສາລີ ເພື່ອຈັດໃຫ້ການນຳແຂວງ ໄດ້ໂອ້ລົມພົບປະກັບນັກທຸລະກິດ ເພື່ອຊ່ວຍກະຕຸກຊຸກຍູ້ໃນການຜະລິດ, ການຄ້າ ແລະ ການບໍລິການ ເປັນເວທີພົບປະກັນ ສະໜັບສະໜູນ ໃຫ້ມີການຈັດຕັ້ງກຸ່ມ, ສະມາຄົມເຄື່ອນໄຫວແຂງແຮງຂຶ້ນ.

ຂ່າວ-ພາບໂດຍ: ແສງວິລັດ ຍົດສະຫວັດ

ຮຽບຮຽງໂດຍ: ນ ຖື ແຫວນວົງສົດ