ຕອນເຊົ້າ ເວລາ 9: 00 ໂມງ ຂອງວັນທີ 05 ທັນວາ 2019 ທີ່ໂຮງແຮມ ເສດຖາພາເລສ ນະຄອນຫລວງວຽງຈັນ ພະແນກ NIU, ກົມແຜນການ ແລະ ການຮ່ວມມື ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມ ທົບທວນຄືນການຈັດຕັ້ງປະຕິບັດຂອງ ໂຄງການເຊື່ອມໂຍງເສດຖະກິດ ອາຊຽນ ຂອງ ສປປ ລາວ ເພື່ອພັດທະນາດ້ານທຸລະກິດ ແລະ ການຄ້າ ແລະ ໂຄງການສົ່ງເສີມຄວາມສາມາດໃນການແຂ່ງຂັນ ພາຍໃຕ້ຂອບລິເລີ່ມການເຊື່ອມໂຍງອາຊຽນ(COMPETE ) ຄັ້ງທີ 9 ມີຜູ້ຕາງໜ້າຈາກລັດຖະບານ-ພາກທຸລະກິດຂອງລາວ ແລະ ຄູ່ຮ່ວມພັດທະນາເຂົ້າຮ່ວມປະມານ 40 ກວ່າທ່ານ.
ໃຫ້ກຽດເປັນປະທານ ໂດຍ ທ່ານ ພູວຽງ ພົງສາ ວ່າການແທນຫົວໜ້າກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ ໄດ້ກ່າວເປີດກອງປະຊຸມ ແລະ ນຳສະເໜີບົດ ໂດຍທ່ານ ດຣ Christina Seeberg-Elverfeldt, ຫົວໜ້າອົງການຮ່ວມມືການພັດທະນາ ຂອງເຢຍລະມັນ ປະຈຳລາວ ທັງເປັນຫົວໜ້າໂຄງການ RELATED ແລະ COMPETE ;ຈຸດປະສົງຂອງກອງປະຊຸມ ແມ່ນເພື່ອສະຫຼຸບຄວາມຄືບໜ້າການຈັດຕັ້ງປະຕິບັດໂຄງການ 6 ເດືອນຜ່ານມາ ຜ່ານແຜນວຽກບູລິມະສິດໃນຕໍ່ໜ້າ ຂອງໂຄງການ RELATED ແລະ COMPETE ໂຄງການດັ່ງກ່າວເລີ່ມຕົ້ນ ໄລຍະ I ປີ 2017 ແລະ ສືບຕໍ່ໄລຍະ II ປີ 2020 ກອງປະຊຸມທົບທວນຄັ້ງທີ 09 ປີ 2019, ຄາດວ່າໂຄງການຈະສືບຕໍ່ໄລຍະ III ປີ 2023 ເຊິ່ງບັນດາແຜນວຽກທີ່ຈະໄດ້ຮັບການເຫັນດີເປັນເອກະພາບໃນເບື້ອງຕົ້ນ ຈະຖືກນຳສະເໜີໃນກອງປະຊຸມຄະນະຊີ້ນຳແຜນງານຈັດຕັ້ງປະຕິບັດໂຄງການ (Program Executive Committee – PEC) ເພື່ອພິຈະລະນາ ແລະ ຮັບຮອງໃນຂັ້ນຕໍ່ໄປ.
ພ້ອມດຽວກັນນີ້, ກໍ່ໄດ້ມີພິທີເຊັນສັນຍາໃນໂຄງການ RELATED (ໄລຍະ II) ລະຫວ່າງ ອົງການຮ່ວມມືການພັດທະນາຂອງເຢຍລະມັນ ປະຈຳລາວ(GIZ) ແລະ ກະຊວງອຸດສາຫະກໍາ ແລະ ການຄ້າ (MOIC) ໂດຍຄູ່ຮ່ວມພັດທະນາຈະໃຫ້ທຶນເພີ່ມເຕີມ 2,5 ລ້ານຍູໂລ ຊຶ່ງໂຄງການດັ່ງກ່າວຈະສືບຕໍ່ຈັດຕັ້ງປະຕິບັດຈົນເຖິງເດືອນທັນວາ ປີ 2020.
ຂ່າວໂດຍ: ໄພຄຳອີ ວິໄລຄຳ
ສູນສະຕິ ແລະ ຂໍ້ມູນຂ່າວສານ
