ຕອນເຊົ້າ ເວລາ 9: 00 ໂມງ ຂອງວັນທີ 12 ທັນວາ 2019 ທີ່ໂຮງແຮມ ຄລາວພລາຊາ ຊັ້ນ II ນະຄອນຫລວງວຽງຈັນ, ພະແນກຄຸ້ມຄອງການຈັດຕັ້ງປະຕິບັດໂຄງການຊ່ວຍເຫຼືອຂອງຕ່າງປະເທດ, ກົມແຜນການ ແລະ ການຮ່ວມມື ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມຄະນະກຳມະການຊີ້ນຳແຜນງານຈັດຕັ້ງປະຕິບັດໂຄງການປະຈຳປີ 2019 ເພື່ອສະຫຼຸບທົບທວນຄືນການຈັດຕັ້ງປະຕິບັດຂອງ ໂຄງການເຊື່ອມໂຍງເສດຖະກິດ ແລະ ສົ່ງເສີມຄວາມສາມາດໃນການແຂ່ງຂັນດ້ານການຄ້າ,ມີຜູ້ຕາງໜ້າຈາກກົມທີ່ກ່ຽວຂ້ອງອ້ອມຂ້າງ ກະຊວງ ອຸດສາຫະກຳ ແລະ ການຄ້າ ແລະ ສະພາອຸດສາຫະກໍາ ແລະ ການຄ້າ ແຫ່ງຊາດລາວ ເຂົ້າຮ່ວມປະມານ 75 ກວ່າທ່ານ.
ໃຫ້ກຽດເປັນປະທານ ໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງ ອຸດສາຫະກຳ ແລະ ການຄ້າໄດ້ກ່າວເປີດກອງປະຊຸມ ແລະ ທ່ານ ພູວຽງ ພົງສາ ວ່າການແທນຫົວໜ້າກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ ນຳສະເໜີບົດໂຄງການທີ່ໄດ້ຈັດຕັ້ງປະຕິບັດຜ່ານມາ ພ້ອມທັງສະຫຼຸບລາຍງານຄວາມຄືບໜ້າ ແລະ ຄວາມອາດສາມາດໃນການແຂ່ງຂັນ ໃນ ສປປ ລາວ (LCT), ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜືອ
ມີແຂວງຜົ້ງສາລີ, ແຂວງອຸດົມໄຊ, ແຂວງຫຼວງນ້ຳທາ (ECL-EIF Tier II), ໂຄງການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ( SME-A2F) ສຳລັບປີ 2019 ແລະ ທິດທາງແຜນວຽກສຳລັບປີ 2020 ຂອງບັນດາໂຄງການທີ່ຢູ່ພາຍໃຕ້ການຊີ້ນຳ ຂອງຄະນະກຳມະການຊີ້ນຳແຜນງານຈັດຕັ້ງປະຕິບັດໂຄງການ (PEC).
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
