ຕອນເຊົ້າເວລາ 8:30 ໂມງ ຂອງວັນທີ 24 ທັນວາ 2019 ທີ່ຫ້ອງປະຊຸມໃຫຍ່ຊັ້ນ I ກະຊວງ ອຄ ໄດ້ເປີດກອງປະຊຸມເຜີຍແຜ່ ເຊື່ອມຊຶມມະຕິ ຂອງກົມການເມືອງສູນກາງພັກ, ຂໍ້ກໍານົດ ຂອງຄະນະເລຂາທິການ ສູນກາງພັກ, ຄໍາແນະນໍາ ຂອງຄະນະຈັດຕັ້ງສູນກາງພັກ ແລະ ສະຫຼຸບການຈັດຕັ້ງປະຕິບັດກົດລະບຽບພັກ ສະໄໝທີ X ແລະ ສັງລວມການປະກອບຄໍາເຫັນ ເພື່ອຈະປັບປຸງກົດລະບຽບພັກ ສະໄໝທີ X; ມີບັນດາທ່ານຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະ
ແນກ ຂອງບັນດາກົມ, ຫ້ອງການ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ສະພາການຄ້າ ແລະ ອຸດສາຫະກໍາແຫ່ງຊາດ, ບັນດາລັດວິສາຫະກິດ, ບໍລິສັດ ທີ່ຂຶ້ນກັບຄວາມຮັບຜິດຊອບຂອງກະຊວງ ອຄ ເຂົ້າຮ່ວມຮັບຟັງການເຜີຍແຜ່, ເຊື່ອມຊຶມນີ້ທັງໝົດ 150 ກວ່າທ່ານ.
ກອງປະຊຸມຄັ້ງນີ້ ໂດຍພາຍໃຕ້ການເປັນປະທານ ຂອງທ່ານ ບຸນມີ ມະນີວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໂດຍມີຈຸດປະສົງ ເພື່ອເຮັດໃຫ້ພະນັກງານ-ລັດຖະກອນ ທີ່ເປັນສະມາຊິກພັກ ຂອງກະຊວງ ອຄ ໄດ້ຮັບຮູ້ ແລະ ເຂົ້າໃຈ ບັນດາມະຕິ ຂໍ້ກໍານົດ ຄໍາແນະນໍາ ຂອງພັກ-ລັດ ໃຫ້ເລິກເຊິ່ງກວ່າເກົ່າ. ພ້ອມດຽວກັນນີ້, ທ່ານ ບຸນມີ ມະນີວົງ ກໍໄດ້ອ່ານຜ່ານເອກະສານມະຕິ ກອງປະຊຸມຄົບຄະນະ ຂອງຄະນະບໍລິຫານງານສູນກາງພັກຄັ້ງທີ 9 ສະໄໝທີ X, ມະຕິ ວ່າດ້ວຍການສ້າງແຜນບໍາລຸງພະນັກງານນໍາພາ-ຄຸ້ມຄອງ; ແລະ ທ່ານ ສີລິສໍາພັນ ວໍຣະຈິດ ຄະນະປະຈໍາພັກກະຊວງ , ຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ກໍຂຶ້ນເຜີຍແຜ່ມະຕິ ຂອງກົມການເມືອງສູນກາງພັກ ວ່າດ້ວຍລະບອບການຮໍ່າຮຽນທິດສະດີການເມືອງ, ຂໍ້ກໍານົດ ຂອງຄະນະເລຂາທິການສູນກາງພັກ ວ່າດ້ວຍການຢັ້ງຢືນລະດັບທິດສະດີການເມືອງ, ຄໍາແນະນໍາ ຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍລະບອບການຮໍ່າຮຽນທິດສະດີການເມືອງ, ການສ້າງແຜນກໍ່ສ້າງ-ບໍາລຸງພະນັກງານນໍາພາ-ຄຸ້ມຄອງ ແລະ ຂໍ້ກໍານົດຂອງຄະນະເລຂາທິການສູນກາງພັກ ວ່າດ້ວຍການຢັ້ງຢືນລະດັບທິດສະດີການເມືອງ;
ນອກຈາກນີ້, ທ່ານ ພອນສະຫວັນ ໄຊຊະນະ ຮອງຫົວໜ້າກົມ ອົງການຈັດຕັ້ງ ແລະ ລະບຽບພັກ, ຄະນະຈັດຕັ້ງສູນກາງພັກ ກໍ່ໄດ້ໃຫ້ກຽດເຂົ້າຮ່ວມ ແລະ ຕີລາຄາການປະກອບຄໍາເຫັນໃສ່ ບົດປະກອບຄໍາເຫັນ ຕໍ່ກົດລະບຽບຂອງສະມາຊິກພັກ ສະໄໝທີ X ຂອງກະຊວງ ອຄ; ພ້ອມທັງການປະກາດການແຕ່ງຕັ້ງຫົວໜ້າກົມ, ຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ຮອງຫົວໜ້າກົມ ຂອງກະຊວງ ອຄ ແລະ ຫົວໜ້າ-ຮອງຫົວໜ້າພະແນກ ອຄ ແຂວງຈໍານວນໜຶ່ງ.
ຕອນທ້າຍ ທ່ານ ບຸນມີ ມະນີວົງ ໄດ້ໃຫ້ການໂອ້ລົມທິດຊີ້ນໍາ ໃຫ້ແກ່ພະນັກງານ-ລັດຖະກອນ ທີ່ເປັນສະມາຊິກພັກ ໂດຍໃຫ້ກໍາແໜ້ນ ເນື້ອໃນຂອງມະຕິ ກອງປະຊຸມຄົບຄະນະ ຂອງຄະນະບໍລິຫານງານສູນກາງພັກຄັ້ງທີ 9 ສະໄໝທີ X ເພື່ອນໍາໄປຜັນຂະຫຍາຍ ການຈັດຕັ້ງປະຕິບັດໃນວຽກງານທີ່ຕົນຮັບຜິດຊອບໃຫ້ເກີດຜົນເປັນຈິງ.
ພາບ-ຂ່າວໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມຜຮ
