ຕອນເຊົ້າ ເວລາ 10: 00 ໂມງ ຂອງວັນທີ 15 ມັງກອນ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ ດຳຣົງ ໃຄ່ຄວນ, ເອກອັກຄະຣາຊະທູດຜູ້ມີອໍານາດເຕັມ ແຫ່ງ ປະເທດໄທ ຊຶ່ງມີສໍານັກງານສະຖານທູດທີ່ຕັ້ງຢູ່ ສປປ ລາວ ໃນໂອກາດມາດຳລົງຕຳແໜ່ງ ການປະຕິບັດໜ້າທີ່ທາງການທູດ ປະຈໍາ ຢູ່ ສປປ ລາວ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 11 ກວ່າທ່ານ.
ໃນໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ດຳຣົງ ໃຄ່ຄວນ, ທີ່ມາຮັບໜ້າທີ່ທາງດ້ານການທູດ ລະຫວ່າງ ລາວ-ໄທ ຊຶ່ງສອງປະເທດໄດ້ມີມູນເຊື້ອອັນດີງາມ ມີສາຍພົວພັນຮ່ວມມືທີ່ດີ ແບບພິເສດບ້ານໃກ້-ເຮືອນຄຽງ ພາສາປາກເວົ້າຄ້າຍຄືກັນ ນັບທາງການຄ້າຂາຍໄປມາຫາສູ່ກັນ ນັບມື້ແໜ້ນແຟ້ນຍິ່ງຂຶ້ນ ທ່ານ ລັດຖະມົນຕີຂອງລາວ ກໍ່ໄດ້ຕີລາຄາສູງຕໍ່ການຊ່ວຍເຫຼືອໃນຫຼາຍດ້ານໃຫ້ແກ່ລາວ ເປັນຕົ້ນການຮ່ວມມືທາງດ້ານການເມືອງ, ຮີດຄອງປະເພນີ ແລະ ວັດທະນາທຳ, ການຄ້າຂາຍ, ການລົງທຶນໃນໂຄງການໃຫຍ່ຫຼາຍບ່ອນ ລະຫວ່າງ ລາວ-ໄທ ເປັນຕົ້ນຂົວຂ້າມແມ່ນ້ຳຂອງຫຼາຍແຫ່ງ ທີ່ອຳນວຍຄວາມສະດວກການໄປມາຫາສູ່ຄ້າຂາຍຮ່ວມກັນລຽບຕາມຊາຍແດນແມ່ນ້ຳຂອງ ລາວ-ໄທ ແລະ ໂຄງການແລກປ່ຽນອື່ນໆ ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ນອກນັ້ນຍັງເປັນຄູ່ຮ່ວມມືທີ່ດີ. ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍຮັກສາມູນເຊື້ອອັນດີງາມໃຫ້ດີຂຶ້ນ ແລະ ວຽກງານອື່ນໃນຕໍ່ໜ້າຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ ທ່ານ ດຳຣົງ ໃຄ່ຄວນ, ໄດ້ກ່າວວ່າ ຂ້າພະເຈົ້າຮູ້ສຶກພາກພູມໃຈ ທີ່ໄດ້ດໍາລົງຕໍາແໜ່ງເປັນ ເອກອັກຄະຣາຊະທູດ ແຫ່ງ ປະເທດໄທ ປະຈຳ ສປປ ລາວ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ກະຊວງອຸດສາຫະກຳຂອງລາວ ໃນຕໍ່ໜ້າໃຫ້ມີສາຍພົວພັນແໜ້ນແຟ້ນທີ່ດີກວ່າເກົ່າ, ອໍານວຍຄວາມສະດວກໃຫ້ແກ່ວຽກງານຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ຍັງອວຍພອນໃຫ້ທ່ານເອກອັກຄະຣາຊະທູດ ໃນຕໍ່ໜ້າຫວັງຍິ່ງວ່າທັງສອງປະເທດຈະເສີມສ້າງສາຍພົວພັນ ແລະ ການຮ່ວມມື ລະຫວ່າງ ສອງປະເທດ ລາວ-ໄທ ເປັນພີ່ນ້ອງບ້ານໃກ້-ເຮືອນຄຽງໄປມາຫາສູ່ກັນຄ້າຂາຍຮ່ວມກັນຫຼາຍຂຶ້ນໄປເລື້ອຍໆ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
