ໃນລະຫວ່າງວັນທີ 30-31 ມັງກອນ 2020 ນີ້, ທີ່ຫ້ອງປະຊຸມຂອງພະແນກ ອຸດສາຫະກໍາ ແລະ ການຄ້າ ແຂວງຜົ້ງສາລີ ໄດ້ຈັດ ກອງປະຊຸມປະເມີນແຜນກໍານົດພະນັກງານ – ນໍາພາຄຸ້ມຄອງ 2017 -2020 ຂຶ້ນຢ່າງເປັນທາງການໂດຍພາຍໃຕ້ການເປັນປະທານ ຂອງ ທ່ານ ທະນູຄໍາ ປິດຈະວົງ ຫົວໜ້າພະແນກອຸດສາຫະກໍາ ແລະ ການຄ້າແຂວງ ແລະ ປະທານຮ່ວມ ທ່ານ ວັນໄຊ ແກ້ວຄໍາພັນ ຮອງຫົວໜ້າ ກົມຈັດຕັ້ງ ແລະ ພະນັກງານ ກະຊວງ ອຸດສາຫະກໍາ ແລະ ການຄ້າ, ເຂົ້າຮ່ວມ ມີບັນດາທ່ານ ຜູ້ຕາງໜ້າຈາກຄະນະຈັດຕັ້ງແຂວງ, ພະແນກພາຍໃນແຂວງ, ຄະນະພະແນກອຸດສາຫະກໍາ ແລະ ການຄ້າ, ຄະນະທີມງານຈາກກະຊວງ, ຫົວໜ້າ – ຮອງຫົວໜ້າ ຫ້ອງການ ອຸດສາຫະກໍາ ແລະ ການຄ້າເມືອງ, ຫົວໜ້າ- ຮອງຫົວໜ້າຂະແໜງ ພ້ອມດ້ວຍພະນັກງານລັດຖະກອນ ພະແນກອຸດສາຫະກໍາ ແລະ ການຄ້າ​ແຂວງເຂົ້າຮ່ວມທັງໝົດ 44 ທ່ານ, ຍິງ 20 ທ່ານ.

         ໃນໂອກາດດັ່ງກ່າວ, ທ່ານ ທະນູຄໍາ ປິດຈະວົງ ຫົວໜ້າພະແນກອຸດສາຫະກໍາ ແລະ ການຄ້າແຂວງ ກໍ່ໄດ້ກ່າວສະແດງການຕ້ອນຮັບທ່ານ ວັນໄຊ ແກ້ວຄໍາພັນ ຮອງຫົວໜ້າ ກົມຈັດຕັ້ງ ແລະ ພະນັກງານ ກະຊວງ ອຸດສາຫະກໍາ ແລະ ການຄ້າ ພ້ອມດ້ວຍທີມງານ ແລະ ໄດ້ລາຍງານຫຍໍ້ສະພາບລວມກ່ຽວກັບວຽກງານ ແຜນກໍານົດພະນັກງານ-ນໍາພາຄຸ້ມຄອງ ຂອງພະແນກອຸດສາຫະກໍາ ແລະ ການຄ້າແຂວງຜົ້ງສາລີ ແຕ່ປີ 2017 – 2020 ທີ່ທາງພະແນກ ອຄ, ກົມຈັດຕັ້ງ ແລະ ພະນັກງານ ແລະ ຂະແໜງການກ່ຽວຂ້ອງຂັ້ນແຂວງ ໄດ້ກໍານົດໄວ້; ເຊິ່ງມາຮອດປັດຈຸບັນທົ່ວແຂວງມີ ພະນັກງານທັງໝົດ 100 ທ່ານ, ຍິງ 32 ທ່ານ (ທຽບໃສ່ປີ 2017 ເພີ່ມຂຶ້ນ 5 ທ່ານ), ຂັ້ນພະແນກມີ 44 ທ່ານ (ທຽບໃສ່ປີ 2017 ເພີ່ມຂຶ້ນ 2 ທ່ານ), ຍິງ 16 ທ່ານ ກວມ 44% ຂອງພະນັກງານຂະແໜງ ອຸດສາຫະກໍາ ແລະ ການຄ້າທົ່ວແຂວງ, ໄດ້ປັບປຸງກົງຈັກການຈັດຕັ້ງຂອງພະແນກ ໃຫ້ເໝາະສົມກັບຈໍານວນ ແລະ ຄວາມຮູ້ຄວາມສາມາດ ຂອງພະນັກງານ – ລັດຖະກອນ ບົນພື້ນຖານແມ່ນຕາມແຜນກໍານົດພະນັກງານ-ນໍາພາຄຸ້ມຄອງ ຂອງພະແນກທີ່ໄດ້ກໍານົດໄວ້ 2017 -2020 ໃນນີ້: ເລື່ອນຕໍາແໜ່ງເປັນຫົວໜ້າພະແນກ 1 ທ່ານ, ຮອງຫົວໜ້າພະແນກ 1 ທ່ານ, ຫົວໜ້າຂະແໜງ 5 ທ່ານ, ຍິງ 2 ທ່ານ, ຮອງຂະແໜງ 12 ທ່ານ, ຍິງ 3 ທ່ານ, ສັບປ່ຽນບ່ອນປະຈໍາການ ຫົວໜ້າຂະແໜງ 3 ທ່ານ, ຮອງຫົວໜ້າຂະແໜງຍິງ 2 ທ່ານ, ລົບລ້າງໜ່ວຍງານຂອງພະແນກ 5 ໜ່ວຍງານ, ຮັບພະນັກງານຍົກຍ້າຍມາຈາກພາກສ່ວນອື່ນ 3 ທ່ານ, ຍິງ 2 ທ່ານ, ຍົກຍ້າຍມາຈາກຫ້ອງການອຸດສາຫະກໍາ ແລະ ການຄ້າເມືອງ 1 ທ່ານ, ພະແນກຍົກຍ້າຍໄປປະຈໍາການຢູ່ຫ້ອງການອຸດສາຫະກໍາ ແລະ ການຄ້າເມືອງ 1 ທ່ານ, ອອກຮັບເບ້ຍບໍານານ 1 ທ່ານ ແລະ ເສຍຊີວິດ 1 ທ່ານ.

          ຈຸດປະສົງຂອງການເປີດກອງປະຊຸມຄັ້ງນີ້: ແມ່ນເພື່ອປະເມີນຄືນແຜນ 2017-2020 ແລະ ທາບທາມສ້າງແຜນກໍານົດພະນັກງານ-ນໍາພາຄຸ້ມຄອງ ເພື່ອຈະກໍານົດຊອກຫາເປົ້າໝາຍ ພະນັກງານທີ່ມີມາດຕະຖານຄົບຖ້ວນ ແລະ ມີເງື່ອນໄຂ ເພື່ອເປັນພື້ນຖານໃຫ້ແກ່ການບໍາລຸງສ້າງ ແລະ ສັບຊ້ອນຈັດວາງບັນຈຸເຂົ້າໃນຕໍາແໜ່ງນໍາພາ-ຄຸ້ມຄອງຂອງພະແນກອຸດສາຫະກຳ ແລະ ການຄ້າ ແຂວງຜົ້ງສາລີ ໃນຊຸມປີຕໍ່ໜ້າ ແລະ ຍາວນານ. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍ່ໄດ້ປະກອບຄໍາຄິດຄໍາເຫັນແລກປ່ຽນ ຕໍ່ກັບການຈັດຕັ້ງປະຕິບັດແຜນກໍານົດພະນັກງານ – ນໍາພາຄຸ້ມຄອງຜ່ານມາ, ວຽກງານຈັດຕັ້ງ-ພະນັກງານ, ແຜນພັດທະນາຊັບພະຍາກອນມະນຸດ ແລະ ແຜນກໍານົດຕໍາແໜ່ງງານ ບົນພື້ນຖານເພື່ອຄວາມເປັນເອກະພາບລະຫວ່າງສາຍຕັ້ງ – ສາຍຂວາງ, ຂັ້ນທ້ອງຖິ່ນ ແລະ ຂັ້ນກະຊວງ ໃຫ້ມີການປະສານສົມທົບຢ່າງກົມກຽວ ແລະ ໄດ້ດໍາເນີນປະເມີນແຜນກໍານົດພະນັກງານ-ນໍາພາຄຸ້ມຄອງຖືກຕ້ອງຕາມແບບຟອມ ແລະ ຂັ້ນຕອນຂອງການປະເມີນ.

ພາບ: ແສງວິລັດ ຍົດສະຫວັດ ພນ ອຄ ຜົ້ງສາລີ

ຂ່າວ: ນ. ວຽງສຸກ ໄຊຍະສິງ ພນ ອຄ ຜົ້ງສາລີ

ຮຽບຮຽງໂດຍ: ນ ຖື ແຫວນວົງສົດ ກຜຮ