ຕອນບ່າຍ ເວລາ 1: 30 ໂມງ ຂອງວັນທີ 4 ກຸມພາ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າພົບປະຂອງ ທ່ານ Colin Crosby, ຮອງເອກອັກຄະລັດຖະທູດ ແຫ່ງ ສະຫະລັດ ອາເມລິກາ ປະຈຳ ສປປ ລາວ ພ້ອມທີມງານບໍລິສັດຕ່າງປະເທດ ທີ່ມາລົງທຶນໃນລາວ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 25 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Colin Crosby, ທີ່ໄດ້ນຳພາທີມງານ 12 ບໍລິສັດ ຕ່າງປະເທດ ເຂົ້າມາພົບປະ ປຶກສາຫາລືກ່ຽວກັບດ້ານການຄ້າກະສິກຳ ຂອງສະຫະລັດ ແລະ ການສະເໜີ ຂອງທ່ານ Colin Crosby ຕໍ່ ຂ້າພະເຈົ້າໄດ້ ຮັບຊາບໃນການຈັດຕັ້ງປະຕິບັດ ໃນໄລຍະຜ່ານມາ ມີດ້ານດີ ແລະ ຂໍ້ຫຍຸ້ງຍາກຄົງຄ້າງໃນການດຳເນີນທຸລະກິດຢູ່ ສປປ ລາວ. ນອກຈາກນັ້ນຍັງໄດ້ປຶກສາຫາລື ຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາຫຼາຍດ້ານ ເພື່ອປະກອບສ່ວນ ຊອກຫາ ທາງອອກໃຫ້ແກ່ການພັດທະນາພື້ນຖານໂຄງລ່າງ ຂອງ ສປປ ລາວ, ພ້ອມທັງຍັງເປັນຄູ່ຄ້າ ຄູ່ຮ່ວມພັດທະນານຳກັນ ໃນການສົ່ງເສີມດ້ານກະສິກຳຂອງລາວ ລະຫວ່າງ ບໍລິສັດຕ່າງປະເທດທີ່ມາລົງທຶນໃນລາວ ແລະ ເຈົ້າໜ້າທີ່ຂອງລັດ ທັງເປັນການຊຸກຍູ້ອຳນວຍຄວາມສະດວກ ການຜະລິດກະສິກຳເປັນສິນຄ້າ ເພື່ອການ ສົ່ງອອກ ຂອງ ສປປ ລາວ. ພ້ອມດຽວກັນນີ້, ທ່ານລັດຖະມົນຕີ ໄດ້ມີຂໍ້ສະເໜີໃນຕໍ່ໜ້າໃຫ້ມີການຄ້າຮ່ວມກັນຫຼາຍຂຶ້ນທັງສອງຝ່າຍ; ສືບຕໍ່ຮ່ວມມືພັດທະນາເສດຖະກິດ , ການຜະລິດສິນຄ້າຂອງລາວ ແລະ ວຽກງານອື່ນໆ ໃນຕໍ່ໜ້າໃຫ້ດີຂຶ້ນກວ່າເກົ່າ.
ທ່ານ Colin Crosby ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈ ທີ່ໄດ້ພາທີມງານບໍລິສັດຕ່າງປະເທດ ທີ່ມາລົງທຶນຢູ່ໃນລາວ ເຂົ້າພົບປະປຶກສາຫາລື ສິ່ງທີ່ເປັນປະໂຫຍດໃຫ້ແກ່ລາວ ແລະ ສະແດງຄວາມຂອບໃຈມາຍັງທ່ານລັດຖະມົນຕີ ທີ່ອໍານວຍຄວາມສະດວກໃຫ້ແກ່ທີມງານຂ້າພະເຈົ້າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
