ຕອນເຊົ້າເວລາ 8: 30 ໂມງ ຂອງວັນທີ 28 ກຸມພາ 2020 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມໃຫຍ່ ຄັ້ງທີ V ຂອງໜ່ວຍພັກ ກົມຈັດຕັ້ງ ແລະ ພະນັກງານ ຂຶ້ນ ໂດຍການເປັນປະທານ ຂອງ ທ່ານ ນາງ ຈັນສຸກ ແສງພະຈັນ ເລຂາໜ່ວຍພັກ ແລະ ຫົວໜ້າ ກົມຈັດຕັ້ງ ແລະ ພະນັກງານ ແລະ ປະທານຮ່ວມ ຂອງ ທ່ານ ນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງອຸດສາຫະກຳ ແລະ ການຄ້າ ມີຜູ້ເຂົ້າຮ່ວມ ສະຫາຍເລຂາ, ຮອງເລຂາ ຂອງບັນດາກົມ, ຫ້ອງການ ແລະ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ສະມາຊິກພັກສົມບູນ ແລະ ສຳຮອງ ແລະ ສະມາຊິກພັກ (ພະນັກງານບໍານານ) ຂອງໜ່ວຍພັກ ກົມຈັດຕັ້ງ ແລະ ພະນັກງານ ພ້ອມທັງຕາງໜ້າໜ່ວຍພັກອ້ອມຂ້າງອົງຄະນະພັກກະຊວງ ອຄ ຕາງໜ້າພະແນກພັກ, ແລະ ສາມອົງການຈັດຕັ້ງມະຫາຊົນພາຍໃນກົມ ປະມານ 42 ກວ່າທ່ານ.
ກອງປະຊຸມຄັ້ງນີ້ ທ່ານ ນາງ ຈັນສຸກ ແສງພະຈັນ ເລຂາໜ່ວຍພັກ ແລະ ຫົວໜ້າ ກົມຈັດຕັ້ງ ແລະ ພະນັກງານ ໄດ້ຂຶ້ນອ່ານຜ່ານບົດລາຍງານການເມືອງ ແລະ ການເຄື່ອນໄຫວຂອງໜ່ວຍພັກໄລຍະ ຜ່ານມານັບແຕ່ 2017-2019 ແລະ ວາງທິດທາງລວມ ໜ້າທີ່ຕົ້ນຕໍໃນການນໍາພາໃນ ຕໍ່ໜ້າ (2020-2024) ຂອງໜ່ວຍພັກ ກົມຈັດຕັ້ງ ແລະ ພະນັກງານ ເຊິ່ງຈະເອົາໃຈໃສ່ປັບປຸງກໍ່ສ້າງ ແລະ ສຶກສາອົບຮົມທາງດ້ານການເມືອງແນວຄິດໃຫ້ແກ່ສະມາຊິກພັກ, ພະນັກງານຢ່າງເປັນປົກກະຕິ ເພື່ອໃຫ້ຮັບຮູ້ ແລະ ເຂົ້າໃຈຕໍ່ແນວທາງການເມືອງ ຍົກສູງຄວາມເປັນເອກະພາບກັບແນວທາງນະໂຍບາຍຂອງພັກໃຫ້ສະມາຊິກພັກ, ພະນັກງານມີທັດສະນະທີ່ຖືກຕ້ອງສອດຄ່ອງກັບແນວທາງປ່ຽນແປງໃໝ່ຂອງພັກ ປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ໃນຕໍ່ໜ້າ ໂດຍສະເພາະອຳນວຍຄວາມສະດວກໃຫ້ແກ່ຂະແໜງການຈັດຕັ້ງອຸດສາຫະກຳ ແລະ ການຄ້າ ໃນທົ່ວປະເທດ, ນອກນັ້ນ ມີ 4 ອົງການຈັດຕັ້ງຄື: ຂະແໜງພັກ, ກຳມະບານ, ຊາວໜຸ່ມ, ແມ່ຍິງ. ທົ່ວຂະແໜງອຸດສາຫະກຳແລະ ການຄ້າມີພະນັກງານລັດຖະກອນທັງໝົດ: 2702 ຄົນ, ຍິງ: 816 ຄົນ, ຂັ້ນກະຊວງມີພະນັກງານ 478 ຄົນ, ຍິງ 194 ຄົນ, ຂັ້ນແຂວງ ແລະ ນະຄອນຫຼວງມີ: 947 ຄົນ, ຍິງ 294 ຄົນ, ຂັ້ນເມືອງມີ: 1277 ຄົນ, ຍິງ 328 ຄົນ. ພາຍໃນກົມມີວຽກງານວິຊາສະເພາະເຊັ່ນ: ວຽກງານການຈັດຕັ້ງ, ວຽກງານສັງລວມ, ວຽກງານບຳລຸງ ແລະ ກໍ່ສ້າງພະນັກງານ, ວຽກງານນະໂຍບາຍ, ວຽກງານກວດກາ, ວຽກງານປ້ອງກັນຊາດ- ປ້ອງກັນຄວາມສະຫງົບ ເຊິ່ງໄດ້ເອົາໃຈໃສ່ຕັ້ງໜ້າປະຕິບັດວຽກງານໃຫ້ປະສົບຜົນສໍາເລັດ ແຕ່ຕົ້ນຕະຫຼອດປາຍຢ່າງສຸດໃຈ. ກອງປະຊຸມຄັ້ງນີ້ຍັງໄດ້ດໍາເນີນການປ່ອນບັດຄັດເລືອກເອົາຄະນະໜ່ວຍພັກ ກົມຈັດຕັ້ງ ແລະ ພະນັກງານ ຊຸດໃໝ່ ເຊິ່ງໄດ້ເລືອກເອົາ ສະຫາຍ ນາງ ຈັນສຸກ ແສງພະຈັນ ເປັນເລຂາໜ່ວຍພັກ, ສະຫາຍ ວັນໄຊ ແກ້ວຄຳພັນ ເປັນຮອງເລຂາ ແລະ ສະຫາຍ ນາງ ບັງອອນ ແກ້ວມະນີວົງ ເປັນຄະນະທັງເປັນຜູ້ກວດກາໜ່ວຍພັກ ຊຸດໃໝ່.
ຕອນທ້າຍສະຫາຍ ນາງ ເຂັມມະນີ ພົນເສນາ ໄດ້ໂອ້ລົມ ແລະ ສະແດງຄວາມຊົມເຊີຍຕໍ່ຜົນງານຂອງກົມຈັດຕັ້ງ ແລະ ພະນັກງານໃນໄລຍະ 5 ປີ ຜ່ານມາ ແລະ ໄດ້ເນັ້ນໜັກຄະນະໜ່ວຍພັກຊຸດໃໝ່ໃນ 5 ປີ ຕໍ່ໜ້າ ຕ້ອງເອົາໃຈໃສ່ສືບຕໍ່ເຕົ້າໂຮມຄວາມສາມັກຄີ ເພື່ອສ້າງໜ່ວຍພັກກາຍເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ພາຍໃນກົມຂອງຕົນ; ການປະຕິບັດແບບແຜນຕາມຫຼັກການພັກ ແລະ ສອດຄ່ອງກັບສະພາບຕົວຈິງ, ເປັນແບບຢ່າງໃຫ້ໜ່ວຍພັກອື່ນ ໃນການປະຕິບັດ 5 ຫຼັກການ 3 ທິດຊີ້ນໍາໃນການກໍ່ສ້າງພັກ 5 ບົດບາດຄຸ້ມຄອງມະຫາພາກ ແລະ 4 ຄາດໝາຍບຸກທະລຸ ໃຫ້ປະສົບຜົນສໍາເລັດຫຼາຍຂຶ້ນກວ່າເກົ່າ ໃນທົ່ວຂະແໜງອຸດສາຫະກຳ ແລະ ການຄ້າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
