ຕອນບ່າຍເວລາ 13: 30 ໂມງ ຂອງວັນທີ 2ມີນາ 2020 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ເປີດ ກອງປະຊຸມສຳມະນາວິຊາການ ຂອງອະນຸກຳມະການເນື້ອໃນເພື່ອກະກຽມກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ອຄ ຂຶ້ນ ໂດຍການເປັນ ປະທານ ຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ , ທ່ານ ສິລິສຳພັນ ວໍຣະຈິດ ຫົວໜ້າສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ ແລະ ເຂົ້າເປັນປະທານຮ່ວມຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ມີຜູ້ເຂົ້າຮ່ວມ ທ່ານຫົວໜ້າ- ຮອງຫົວໜ້າຫ້ອງການ, ຫົວໜ້າ- ຮອງຫົວໜ້າກົມ, ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ຫົວໜ້າ-ຮອງຫົວໜ້າພະແນກຈາກບັນດາກົມ, ຫ້ອງການ ແລະ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ຜູ້ຕາງໜ້າຈາກສະພາການຄ້າ ແລະ ອຸດສາຫະກຳແຫ່ງຊາດລາວ, ພະແນກອຸດສາຫະກໍາ ແລະ ການຄ້າ ນະຄອນຫຼວງ, ກົມເຕັກນິກ ແລະ ນະວັດຕະກໍາ ກະຊວງວິທະຍາສາດ ແລະ ເຕັກໂນໂລຊີ, ກະຊວງກະສິກໍາ ແລະ ປ່າໄມ້, ກະຊວງການເງິນ, ກະຊວງຖະແຫຼງຂ່າວ ແລະ ວັດທະນະທໍາ ແລະ ທ່ອງທ່ຽວ, ອົງການໄອຍະການປະຊາຊົນສູງສຸດ, ກົມຕໍາຫຼວດເສດຖະກິດ ກະຊວງປ້ອງກັນຄວາມສະຫງົບ, ສູນຄົ້ນຄວ້ານະໂຍບາຍການພັດທະນາ ກະຊວງແຜນການ ແລະ ການລົງທຶນ, ແລະ ຜູ້ຕາງໜ້າຈາກທະນາຄານ ແຫ່ງ ສປປ ລາວ ຈໍານວນຫຼາຍກວ່າ 75 ທ່ານ. ຈຸດປະສົງຂອງກອງປະຊຸມຄັ້ງນີ້ ເພື່ອກະກຽມກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ອຄ, ໂດຍຜັດປ່ຽນກັນ ຂຶ້ນ ສະເໜີບົດ ກ່ຽວກັບຜົນການຈັດຕັ້ງປະຕິບັດໃນໄລຍະຜ່ານມາ ແລະ ວາງທິດທາງແຜນການແກ້ໄຂປັບປຸງໃນ 5 ປີ ຕໍ່ໜ້າ ພາຍໃຕ້ 05 ຫົວຂໍ້ຄື:
1/ ການສົ່ງເສີມວິສາຫະກິດຂະໜາດນ້ອຍ ແລະ ກາງ; 2/ ການພັດທະນາການຄ້າ ແລະ ອຸດສາຫະກໍາປຸງແຕ່ງ ຂອງສປປ ລາວ ຕາມທິດເຕີບໂຕສີຂຽວ, ຍືນຍົງ ແລະ ໃນເງື່ອນໄຂການປະຕິວັດອຸດສາຫະກໍາ 4.0; 3/ ການຄຸ້ມຄອງວິສາຫະກິດຕາມແນວທາງ, ແຜນນະໂຍບາຍຂອງພັກ ແລະ ຕາມກົດໝາຍ ແລະ ນິຕິກໍາທີ່ກ່ຽວຂ້ອງຂອງລັດ; 4/ ການຊອກຕະຫຼາດພາຍໃນ ແລະ ຕ່າງປະເທດໃຫ້ສິນຄ້າຂອງລາວ ແລະ ການຈັດຕັ້ງແບ່ງງານພາຍໃນ ເພື່ອຂະຫຍາຍຖານການຜະລິດພາຍໃນ ແລະ ເພີ່ມການສົ່ງອອກ ໂດຍເນັ້ນສິນຄ້າກະສິກໍາ; 5/ ການປັບປຸງລະບົບ ແລະ ກົນໄກການຄຸ້ມຄອງມະຫາພາກ ຂອງກະຊວງ ອຄ ໂດຍຕິດພັນກັບການແບ່ງຂັ້ນຄຸ້ມຄອງກັບທ້ອງຖິ່ນ ແລະ ແບ່ງຂອດຄຸ້ມຄອງກັບກະຊວງ ຂະແໜງການອື່ນ;
ແນໃສ່ອຳນວຍຄວາມສະດວກທາງດ້ານການຄ້າ ແລະ ກຳນົດທິດທາງທີ່ຊັດເຈນ ເພື່ອໃຫ້ໄດ້ຮັບການຈັດຕັ້ງປະຕິບັດ ແລະ ຜັນຂະຫຍາຍ ວຽກງານທົ່ວຂະແໜງອຸດສາຫະກຳ ແລະ ການຄ້າ ໃຫ້ມີຂອດແຜນວຽກ, ແຜນງານ ປະສານສົມທົບກັບຂະແໜງການທີ່ກ່ຽວຂ້ອງ ທີ່ຕິດພັນກັບການຜະລິດສິນຄ້າພາຍໃນເປັນຕົ້ນດ້ານກະສິກຳ ແລະ ອຸດສາຫະກຳ ໃຫ້ໄດ້ມາດຖານແກ່ ຜູ້ບໍລິໂພກພາຍໃນ ແລະ ຕ່າງປະເທດ ພ້ອມທັງເປັນການຊອກຕະຫຼາດຂະຫຍາຍຈຸດວາງຂາຍສິນຄ້າ ດ້ານກະສິກໍາ ສ້າງຜູ້ປະກອບການ ແລະ ບໍລິການສິນຄ້າທີ່ໄດ້ມາດຖານສາກົນ, ສ້າງໃຫ້ເປັນຕະຫຼາດທີ່ນັດພົບ ເພື່ອບໍລິການຜູ້ຊົມໃຊ້ທັງພາຍໃນ ແລະ ຕ່າງປະເທດ ທັງເປັນຕະຫຼາດທ່ອງທ່ຽວ, ການໂຄສະນາສິນຄ້າກະສິກໍາ ແລະ ອຸດສາຫະກໍາ ແລະ ເປັນການເປີດກວ້າງສິນຄ້າພາຍໃນອອກສູ່ຕ່າງປະເທດ. ນອກຈາກນັ້ນຂະແໜງອຸດສາຫະກຳ ແລະ ການຄ້າຕ້ອງໄດ້ປັບປຸງນິຕິກຳພາຍໃນໃຫ້ມັນສອດຄ່ອງກັບນະໂຍບາຍ ຜູ້ຈະມາລົງທຶນພາຍໃນ ແລະ ຕ່າງປະເທດ.
ກອງປະຊຸມສຳມະນາວິຊາການຄັ້ງນີ້ ດໍາເນີນເປັນເວລາ 2 ມື້ເຄິ່ງ ນັບແຕ່ວັນ 2-4 ມີນາ ຊຶ່ງແຕ່ລະກົມ ໄດ້ຜັດປ່ຽນກັນຂຶ້ນສະເໜີບົດ ແລະ ປະກອບຄໍາຄິດເຫັນ ທັງເປັນການແລກປ່ຽນບົດຮຽນເຊິ່ງກັນ ແລະ ກັນ ເພື່ອຊອກທາງແກ້ໄຂ ດ້ານອຸດສາຫະກໍາ ແລະ ການຄ້າທີ່ພົບຂໍ້ຫຍຸ້ງຍາກ ແລະ ວາງທິດທາງແກ້ໄຂໃນຕໍ່ໜ້າໃຫ້ດີຂຶ້ນກວ່າເກົ່າ.
ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ໃຫ້ທິດຊີ້ນຳຕໍ່ກອງປະຊຸມໃຫ້ບັນດາກົມ, ຫ້ອງການ ແລະ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ທີ່ກ່ຽວຂ້ອງຈົ່ງເອົາໃຈໃສ່ຕິດຕາມແກ້ໄຂວຽກງານ ທີ່ໄດ້ຈັດຕັ້ງປະຕິບັດຜ່ານມາ ທີ່ເຫັນວ່າບໍ່ທັນເຮັດໄດ້ດີ ຄວນປັບປຸງຂອດວຽກງານ ທີ່ຄົງຄ້າງ ແລະ ໃນຕໍ່ໜ້າຈົ່ງພ້ອມກັນຫາວິທີແກ້ໄຂທົ່ວຂະແໜງອຸດສາຫະກໍາ ແລະ ການຄ້າ 5 ປີ ຕໍ່ໜ້າ ໃຫ້ຈັດຕັ້ງປະຕິບັດວຽກງານຕາມ 5 ພາລະບົດບາດຄຸ້ມຄອງມະຫາພາກ, ບຸກທະລຸການປະສານງານ ເຮັດໃຫ້ດີຂຶ້ນກວ່າເກົ່າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
