ວັນທີ 28 ພຶດສະພາ 2020 ທີ່ຜ່ານມານີ້, ພະແນກອຸດສາຫະກຳ ແລະ ການຄ້າ ແຂວງຜົ້ງສາລີ ທຳລາຍສິນຄ້າໝົດອາຍຸ, ລອກຮຽນແບບ, ປອມແປງ, ສິນຄ້າເກືອດຫ້າມ ແລະ ສິນຄ້າທີ່ລັກລອບນຳເຂົ້າ ບໍ່ຖືກຕ້ອງຕາມລະບຽບກົດໝາຍ ເຊິ່ງປະກອບມີ: ຈັກສະຕິນ ແລະ ອາໄລ່, ນ້ຳມັນເຄື່ອງ, ຈັກຫຼໍ່ທອງ, ເຄື່ອງຊັອດປາ, ຈານດາວທຽມ, ຢາສູບ, ເຄື່ອງສຳອາງ, ເຄື່ອງປຸງ ແລະ ເຄື່ອງແຫ້ງ ລວມມູນຄ່າ 84 ລ້ານກວ່າກີບ ໂດຍສິນຄ້າດັ່ງກ່າວ ແມ່ນເຈົ້າໜ້າທີ່ກວດກາການຄ້າ ສົມທົບກັບຂະແໜງການກ່ຽວຂ້ອງຂັ້ນແຂວງ, ຂັ້ນເມືອງ ໂດຍສະເພາະຫ້ອງການອຸດສາຫະກຳ ແລະ ການຄ້າເມືອງ ໃນການລົງຕິດຕາມກວດກາ.
ທ່ານ ບຸນລົມ ຫົງຄຳ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງຜົ້ງສາລີ ແຈ້ງໃຫ້ຮູ້ວ່າ: ເພື່ອປະຕິບັດຕາມກົດໝາຍວ່າດ້ວຍການປົກປ້ອງຜູ້ຊົມໃຊ້ ແລະ ດຳລັດວ່າດ້ວຍການກວດກາການຄ້າໃຫ້ເຂັ້ມງວດ ແລະ ສະກັດກັ້ນ ບັນດາຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງຕາມກົດໝາຍ ເພື່ອເຮັດໃຫ້ສັງຄົມມີຄວາມສະຫງົບ, ປະຊາຊົນໄດ້ບໍລິໂພກສິນຄ້າທີ່ມີຄຸນນະພາບ, ໄດ້ມາດຕະຖານ ແລະ ປອດໄພຕໍ່ສຸຂະພາບ. ພ້ອມທັງຮຽກຮ້ອງໃຫ້ບັນດາຜູ້ປະກອບການຖືສຳຄັນໃນການປະຕິບັດລະບຽບກົດໝາຍ ແລະ ກວດກາເບິ່ງສິນຄ້າກ່ອນທີ່ຈະນຳມາຈຳໜ່າຍ, ສ່ວນຜູ້ບໍລິໂພກ ກ່ອນຈະຊື້ສິນຄ້າກໍ່ຄວນກວດກາເບິ່ງ ວັນ,ເດືອນ,ປີ ຜະລິດ; ວັນເດືອນປີໝົດອາຍຸ ເພື່ອໃຫ້ໄດ້ສິນຄ້າທີ່ດີ ມີຄຸນນະພາບ.
ພາບ ແລະ ຂ່າວໂດຍ: ແສງວິລັດ ຍົດສະຫວັດ ພະແນກ ອຄ ແຂວງຜົ້ງສາລີ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກົມຜຮ
