ຕອນເຊົ້າ 9: 00 ໂມງ ຂອງວັນທີ 29 ມິຖຸນາ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບ ຂອງທີມງານ ຊຶ່ງນໍາພາໂດຍ ທ່ານ ອຸເດດ ສຸວັນນະວົງ ປະທານ ສຄອຊ ແຫ່ງ ສປປ ລາວ ແລະ ທ່ານ ຫວງ ຢ້ຽນເຕີ ປະທານສະພາການຄ້າຈີນ ປະຈຳລາວ ພ້ອມທັງອຳນວຍການໃຫຍ່ບໍລິສັດ China Power, ເນື່ອງໃນໂອກາດເຂົ້າລາຍງານ ແລະ ປຶກສາຫາລືວຽກງານຊຸກຍູ້ສົ່ງເສີມການຮ່ວມມືທາງດ້ານທຸລະກິດ ລາວ-ຈີນ ປະຈຳ ສຄອຊ ມີຜູ້ຕາງໜ້າເຂົ້າຮ່ວມຈາກບັນດາຕົວແທນໃຫຍ່ຂອງ ປະທານ ບໍລິສັດ ດາຕ້າຄອມ, ຮອງປະທານ K&C Group ປະທານ ສະພາການຄ້າ ຊາວຈີນຕ່າງດ້າວ ປະຈຳລາວ, ປະທານ ບໍລິສັດຄຳໄພຊະນະ ແລະ ຜູ້ອຳນວຍການລັດວິສາຫະກິດ ພັດທະນາກະສິກຳ ແລະ ອຸດສາຫະກຳ ແລະ ຜູ້ອຳນວຍການ ສະຫວັນປາຊີຟິກ ລວມສອງຝ່າຍ ປະມານ 20 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕໍ່ທ່ານ ອຸເດດ ສຸວັນນະວົງ ປະທານ ສຄອຊ ແລະ ທ່ານ ຫວງ ຢ້ຽນເຕີ ປະທານສະພາການຄ້າຈີນ ປະຈຳລາວ ພ້ອມທັງອຳນວຍການໃຫຍ່ບໍລິສັດ China Power, ໃນການເຂົ້າປຶກສາຫາລືທາງເລືອກໜຶ່ງຂອງ ສະພາການຄ້າອຸດສາຫະກຳແຫ່ງຊາດລາວ ໃນການປະຕິບັດວຽກງານຊຸກຍູ້ສົ່ງເສີມການຮ່ວມມືທາງທຸລະກິດ ລະຫວ່າງຕົວແທນນັກທຸລະກິດ ລາວ-ຈີນ ໃຫ້ນັບມື້ນັບຂະຫຍາຍຕົວ ມີປະສິດທິຜົນ, ຕ່າງຝ່າຍຕ່າງໄດ້ຮັບຜົນປະໂຫຍດ ແລະເປັນການປະກອບສ່ວນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ.
ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຂອບໃຈຕໍ່ ທ່ານ ທ່ານ ອຸເດດ ສຸວັນນະວົງ ປະທານ ສຄອຊ ແລະ ທ່ານ ຫວງ ຢ້ຽນເຕີ ປະທານສະພາການຄ້າຈີນ ປະຈຳລາວ ພ້ອມທັງອຳນວຍການໃຫຍ່ບໍລິສັດ China Power ແລະ ປະທານບໍລິສັດ ທີ່ໄດ້ນຳພາທີມງານເຂົ້າມາປຶກສາຫາລືສິ່ງ ທີ່ມີຜົນປະໂຫຍດໃນການພັດທະນາ ແລະ ການຮ່ວມມື ໃຫ້ແກ່ ສປປ ລາວ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່ານສານ
