ວັນທີ 24 ມິຖຸນາ 2020 ຜ່ານມາ, ຢູ່ເມືອງວັງວຽງ ແຂວງວຽງຈັນ ໄດ້ເປີດກອງປະຊຸມປຶກສາຫາລື ແລະ ແລກປ່ຽນຄໍາຄິດ ຄໍາເຫັນຕໍ່ໂຄງການ ສຶກສາການສົ່ງເສີມການປຸງແຕ່ງສິນຄ້າກະສິກໍາ ຕາມທິດສີຂຽວພາຍໃຕ້ມາດຕະຖານ GMP: ກໍລະນີສຶກສາໂຮງສີເຂົ້າ 5 ແຂວງ (ພາກເໜືອ, ພາກກາງ ແລະ ພາກໃຕ້) ໂດຍການເປັນປະທານ ຂອງທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ຊຶ່ງມີຜູ້ຕາງໜ້າຈາກ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ກົມອຸດສາຫະກໍາ ແລະ ຫັດຖະກໍາ, ກົມ SME, ກົມສົ່ງເສີມການຄ້າ ຂອງກະຊວງ ແລະ ຂະແໜງການກ່ຽວຂ້ອງ ເຂົ້າຮ່ວມ ຈໍານວນ 30 ກວ່າທ່ານ.
ໃນໂອກາດນີ້, ທ່ານຮອງລັດຖະມົນຕີ ໄດ້ກ່າວຕໍ່ກອງປະຊຸມວ່າ: ໃນໄລຍະຜ່ານມາ ກະຊວງອຸດສາຫະກໍາ ແລະ ການຄ້າ ໄດ້ມີການຄົ້ນຄວ້າເພື່ອຜັນຂະຫຍາຍຍຸດທະສາດການເຕີບໂຕສີຂຽວແຫ່ງຊາດ ຂອງ ສປປ ລາວ ເຖິງປີ 2030 ທີ່ຢູ່ໃນຄວາມຮັບຜິດຊອບຂອງຕົນ ໂດຍໄດ້ຮັບການຮ່ວມມືທີ່ດີຈາກຄະນະກອງເລຂາການເຕີບໂຕສີຂຽວແຫ່ງຊາດ ກໍ່ຄືບັນດາກົມວິຊາການທີ່ກ່ຽວຂ້ອງກັບການຈັດຕັ້ງປະຕິບັດພາຍໃນກະຊວງໄດ້ເປັນຢ່າງດີ. ຖ້າເວົ້າເຖິງມາດຕະຖານການຜະລິດທີ່ດີ ຫຼື Good Manufacturing Practice: GMP ແມ່ນຖືວ່າມີຄວາມສໍາຄັນຫຼາຍໃນລະບົບການຜະລິດ ທີ່ເຊື່ອມໂຍງກັບຕະຫຼາດສາກົນໃນປັດຈຸບັນພາຍໃຕ້ຍຸດທະສາດການເຕີບໂຕສີຂຽວ; ການໄດ້ຮັບມາດຕະຖານ GMP ຈະຊ່ວຍສ້າງຄວາມເຊື່ອໝັ້ນຕໍ່ຜູ້ຊື້ ແລະ ຍັງເປັນເງື່ອນໄຂທີ່ສໍາຄັນໃນການຢັ້ງຢືນຄຸນນະພາບດ້ານຄວາມສະອາດ ແລະ ຄວາມປອດໄພຂອງສິນຄ້າທີ່ສົ່ງອອກ ໂດຍສະເພາະແມ່ນສິນຄ້າກະສິກໍາສໍາເລັດຮູບ ແລະ ເຄິ່ງສໍາເລັດຮູບ.
ຕໍ່ກັບປະເທດລາວຂອງພວກເຮົາ ການໄດ້ຮັບຢັ້ງຢືນມາດຕະຖານ GMP ຂອງຫົວໜ່ວຍການຜະລິດ ແລະ ປຸງແຕ່ງກະສິກໍາແມ່ນຍັງມີໜ້ອຍຫຼາຍ; ສໍາລັບໂຮງສີເຂົ້າ ໃນປັດຈຸບັນມີພຽງ 3 ແຫ່ງ ທີ່ໄດ້ຮັບການຢັ້ງຢືນມາດຕະຖານ GMP (ໂຮງສີເຂົ້າ IDP-ຂ.ສະຫວັນນະເຂດ, ໂຮງສີເຂົ້າວານິດາ- ຂ.ຄໍາມ່ວນ ແລະ ໂຮງສີເຂົ້າແຈ້ງສະຫວ່າງ-ນະຄອນຫຼວງ); ໃນໄລຍະຜ່ານມາເຫັນວ່າໂຮງສີເຂົ້າ ທີ່ໄດ້ຮັບຢັ້ງຢືນມາດຕະຖານ GMP ສາມາດເຂົ້າຮ່ວມຕ່ອງໂສ້ການສະໜອງເຂົ້າພາຍໃຕ້ໂຄຕ້າ ທີ່ໄດ້ຮັບຈາກລັດຖະບານ ສປ ຈີນ. ດັ່ງນັ້ນ ການສົ່ງເສີມໃຫ້ຫົວໜ່ວຍການຜະລິດ ແລະ ປຸງແຕ່ງກະສິກໍາຂອງປະເທດໄດ້ຮັບມາດຕະຖານ GMP ນັ້ນຖືວ່າສໍາຄັນ ເພາະບໍ່ພຽງຈະຊ່ວຍຍົກມາດຕະຖານດ້ານຄຸນນະພາບຜະລິດຕະພັນຂອງປະເທດແລ້ວ ຍັງຊຸກຍູ້ໃຫ້ເກີດການຜະລິດສະອາດ ແລະ ຮັກສາສິ່ງແວດລ້ອມ ເຊິ່ງກໍຖືກຕ້ອງຕາມຍຸດທະສາດການພັດທະນາເສດຖະກິດຕາມທິດສີຂຽວ ແລະ ຍືນຍົງຂອງລັດຖະບານ.
ຕອນທ້າຍ ທ່ານ ສົມຈິດ ອິນທະມິດ ໄດ້ໃຫ້ການໂອ້ລົມທິດຊີ້ນໍາ ໃຫ້ແກ່ບັນດາທ່ານທີ່ເຂົ້າຮ່ວມກອງປະຊຸມຄັ້ງນີ້ວ່າ ຈະເປັນການຊ່ວຍໃຫ້ຄະນະຄົ້ນຄວ້າ ຂອງສະຖາບັນ ໄດ້ຮັບຂໍ້ມູນທີ່ເປັນປະໂຫຍດຫຼາຍຢ່າງ ໂດຍຜ່ານການປະກອບຄໍາຄິດເຫັນທາງດ້ານວິຊາການຢ່າງກົງໄປກົງມາປະກອບເຂົ້າໃນໂຄງການຄົ້ນຄວ້າຄັ້ງນີ້ ໃຫ້ເກີດປະສິດທິພາບສູງສຸດ.
ແຫຼ່ງຂ່າວ: ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ
ຮຽບຮຽງໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມຜຮ
