ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ທັງເປັນລັດຖະມົນຕີເສດຖະກິດອາຊຽນຂອງ ສປປ ລາວ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມທາງໄກລັດຖະມົນຕີເສດຖະກິດອາຊຽນ ຄັ້ງທີ 52 ແລະ ກອງປະຊຸມອື່ນໆທີ່ກ່ຽວຂ້ອງ ທີ່ກະຊວງອຸດສາຫະກຳ ແລະ ການຄ້າ, ສປປ ລາວ ຊຶ່ງເລີ່ມແຕ່ວັນທີ 24 ສິງຫາ 2020 ແລະ ກອງປະຊຸມຈະສືບຕໍ່ດໍາເນີນໄປຈົນເຖິງວັນທີ 29 ສິງຫາ 2020. ໃນຄັ້ງນີ້ຈະມີກອງປະຊຸມທັງໝົດປະມານ 21 ກອງປະຊຸມ ຊຶ່ງປະກອບດ້ວຍກອງປະຊຸມສະພາເຂດການຄ້າເສລີອາຊຽນ ຄັ້ງທີ 4, ກອງປະຊຸມສະພາເຂດການລົງທຶນອາຊຽນ ຄັ້ງທີ 23, ກອງປະຊຸມລັດຖະມົນຕີເສດຖະກິດອາຊຽນຄັ້ງທີ 52, ກອງປະຊຸມລັດຖະມົນຕີຄູ່ຮ່ວມມືເສດຖະກິດຮອບດ້ານລະດັບພາກພື້ນ (RCEP), ກອງປະຊຸມປຶກສາຫາລືລະຫວ່າງລັດຖະມົນຕີເສດຖະກິດອາຊຽນ ແລະ ຄູ່ຮ່ວມເຈລະຈາ ເຊັ່ນ, ສປ ຈີນ, ສ. ເກົາຫຼີ, ຍີ່ປຸ່ນ, ຮົງກົງ, ອິນເດຍ, ອົດສະຕາລີ-ນິວຊີແລນ, ອີຢູ,ການາດາ, ລັດເຊຍ, ອາເມລິກາ. ນອກນັ້ນ, ຍັງມີກອງປະຊຸມລະຫວ່າງລັດຖະມົນຕີເສດຖະກິດອາຊຽນ ກັບ ສະພາທີ່ປຶກສາທຸລະກິດອາຊຽນ ແລະ ອື່ນໆ.
ກອງປະຊຸມຄັ້ງນີ້ ໄດ້ດຳເນີນພາຍໃຕ້ການເປັນປະທານຂອງ ທ່ານ ເຈິນ ຕ໋ວນ ແອັງ, ລັດຖະມົນຕີກະຊວງອຸດສາຫະກຳ ແລະ ການຄ້າ, ສສ.ຫວຽດນາມ ໃນຖານະປະທານໝູນວຽນອາຊຽນ ໃນປີ 2020. ກອງປະຊຸມໄດ້ແລກປ່ຽນທັດສະນະກ່ຽວກັບສະພາບການດ້ານເສດຖະກິດໃນພາກພື້ນ ແລະ ສາກົນ ໂດຍສະເພາະຄວາມຄືບໜ້າຂອງການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ 2025 ແລະ ໄດ້ສຸມໃສ່ການປຶກສາຫາລືກ່ຽວກັບສະພາບການແຜ່ລະບາດຂອງພະຍາດໂຄວິດ-19 ທີ່ຍັງສືບຕໍ່ຂະຫຍາຍຕົວໃນວົງກວ້າງ ແລະ ສົ່ງຜົນກະທົບຢ່າງຮ້າຍແຮງຕໍ່ເສດຖະກິດ-ສັງຄົມຂອງຫຼາຍປະເທດລວມທັງພາກພື້ນອາຊຽນ. ບັນດາລັດຖະມົນຕີເສດຖະກິດອາຊຽນໄດ້ໃຫ້ຄວາມສຳຄັນໃນການປຶກສາຫາລືກ່ຽວກັບການສືບຕໍ່ຮັກສາການເປີດຕະຫຼາດການຄ້າ ແລະ ການລົງທຶນໃນພາກພື້ນ ເພື່ອຮັບປະກັບຄວາມຕໍ່ເນື່ອງຂອງຕ່ອງໂສ້ການສະໜອງ ໂດຍສະເພາະສິນຄ້າທີ່ຈໍາເປັນເຊັ່ນ: ອາຫານ, ຢາປົວພະຍາດ ແລະ ອຸປະກອນການແພດ ແລະ ບໍ່ສ້າງບັນດາມາດຕະການທີ່ເປັນອຸປະສັກຕໍ່ການຄ້າ-ການລົງທຶນ ຊຶ່ງບັນດາມາດຕະການເຫຼົ່ານີ້ແມ່ນຮຽກຮ້ອງໃຫ້ມີການຮ່ວມມື ແລະ ເປັນເຈົ້າການຮ່ວມກັນທຸກພາກສ່ວນ ທັງພາກລັດ ແລະ ພາກທຸລະກິດ ເພື່ອພ້ອມກັນຮັບມືກັບສະພາບວິກິດການໃນປະຈຸບັນ.
ໃນກອງປະຊຸມຄັ້ງນີ້ ລັດຖະມົນຕີເສດຖະກິດອາຊຽນຈະໄດ້ຮັບຮອງເອົາ 9 ເອກະສານ ເປັນຕົ້ນແຜນວຽກບູລິມະສິດພາຍໃຕ້ເສົາຄໍ້າເສດຖະກິດທີ່ສະເໜີໂດຍຫວຽດນາມໃນນາມປະທານອາຊຽນປີ 2020, ແຜນປະຕິບັດງານອາຊຽນ +3 ວ່າດ້ວຍການຫຼຸດຜ່ອນຜົນກະທົບທາງດ້ານເສດຖະກິດຈາກການລະບາດຂອງພະຍາດ COVID-19 ແລະ ບົດລາຍງານການທົບທວນສະພາບການລົງທຶນໃນອາຊຽນ ປີ 2020.
ພິເສດ ໃນຖານະປະທານໝູນວຽນກອງປະຊຸມລັດຖະມົນຕີເສດຖະກິດ CLMV ປີ 2020 ທ່ານ ນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ນໍາພາກອງປະຊຸມລັດຖະມົນຕີເສດຖະກິດປະເທດກໍາປູເຈຍ-ສປປ ລາວ-ມຽນມາ-ຫວຽດນາມ (CLMV) ຄັ້ງທີ 12 ສໍາເລັດລົງຢ່າງຈົບງາມ ໃນວັນທີ 24 ສິງຫາ 2020 ທີ່ຜ່ານມາ. ໃນກອງປະຊຸມດັ່ງກ່າວໄດ້ຮັບຮອງເອົາບັນດາແຜນວຽກພາຍໃຕ້ແຜນປະຕິບັດງານ CLMV ປີ 2021-2022 ແລະ ໄດ້ມອບໃຫ້ເຈົ້າໜ້າທີ່ກ່ຽວຂ້ອງສືບຕໍ່ສ້າງແຜນວຽກເພື່ອຜັນຂະຫຍາຍຂອບວຽກເພື່ອການພັດທະນາປະເທດ CLMV ໃນຕໍ່ໜ້າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
