ໃນຕອນເຊົ້າຂອງວັນທີ 27 ສິງຫາ 2020, ທ່ານ ນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ນຳພາຄະນະຜູ້ແທນ ເຂົ້າຮ່ວມກອງປະຊຸມທາງໄກ (8th RCEP Ministerial Meeting) ບັນດາລັດຖະມົນຕີຂອງສັນຍາການຮ່ວມມືທາງເສດຖະກິດແບບຮອບດ້ານລະດັບພາກພື້ນ ຄັ້ງທີ 8 ທີ່ ກະຊວງອຸດສາຫະກໍາ ແລະ ການຄ້າ, ກອງປະຊຸມໄດ້ຈັດຂຶ້ນພາຍໃຕ້ການເປັນປະທານໂດຍພະນະທ່ານ Tran Tuan Anh, ລັດຖະມົນຕີກະຊວງອຸດສາຫະກຳ ແລະ ການຄ້າ, ສສ ຫວຽດນາມ ແລະ ທ່ານ Vangelis Vitalis, ຮອງລັດຖະມົນຕີກະຊວງການຄ້າ ແລະ ເສດຖະກິດຈາກ ນິວຊີແລນ, ເຊິ່ງເຂົ້າຮ່ວມກອງປະຊຸມ ລວມມີບັນດາລັດຖະມົນຕີກະຊວງການຄ້າປະເທດສະມາຊິກອາຊຽນ ແລະ ບັນດາປະເທດຄູ່ຮ່ວມ ເຊັ່ນ: ອົດສະຕຣາລີ, ຈີນ, ຍີ່ປຸ່ນ, ສ ເກົາຫລີ, ນິວຊີແລນ ແລະ ກອງເລຂາອາຊຽນ.
ກອງປະຊຸມໄດ້ປຶກສາຫາລື ແລະ ແລກປ່ຽນຄຳຄິດເຫັນ ຕໍ່ບັນຫາສະພາບທີ່ພົ້ນເດັ່ນໃນພາກພື້ນ ແລະ ສາກົນ ໂດຍສະເພາະ ບັນຫາສິ່ງທ້າທາຍ ອັນເນື່ອງມາຈາກການແຜ່ລະບາດໄປທົ່ວໂລກຂອງພະຍາດ COVID-19 ທີ່ໄດ້ສົ່ງຜົນກະທົບຕໍ່ການພັດທະນາເສດຖະກິດທັງທາງດ້ານການຄ້າ ແລະ ການລົງທຶນຕໍ່ບັນດາປະເທດສະມາຊິກ RCEP ທັງໃນພາກພື້ນ ແລະ ສາກົນໂດຍລວມ. ຕໍ່ສະພາບການນັ້ນ, ບັນດາລັດຖະມົນຕີ ອາເຊັບ ໄດ້ສະແດງຄວາມເປັນຫ່ວງ ແລະ ເຫັນວ່າ ສິ່ງທ້າທາຍທີ່ກ່າວມາຂ້າງເທິງນັ້ນ ແມ່ນໄດ້ຮຽກຮ້ອງໃຫ້ບັນດາປະເທດໃນຂົງເຂດພາກພື້ນ ແລະ ສາກົນເວົ້າລວມ, ເວົ້າສະເພາະກໍຄືບັນດາປະເທດທີ່ເຂົ້າຮ່ວມການເຈລະຈາໃນສັນຍາ RCEP, ຕ້ອງໄດ້ສືບຕໍ່ປະຕິບັດນະໂຍບາຍການເປີດຕະຫຼາດຂອງຕົນໃຫ້ໄດ້ຕາມເປົ້າໝາຍທີ່ວາງໄວ້ ໂດຍສະເພາະໃນປະເພດສິນຄ້າ ແລະ ການບໍລິການທີ່ສຳຄັນ, ເຊິ່ງສິ່ງທ້າທາຍດັ່ງກ່າວ ຍັງໄດ້ຮຽກຮ້ອງໃຫ້ມີການຍົກລະດັບກ່ຽວກັບຂອດການປະສານງານ ແລະ ການຮ່ວມມືເພື່ອຮັບມືກັບການແຜ່ລະບາດໄປທົ່ວໂລກຂອງພະຍາດ COVID-19.
ກອງປະຊຸມ ໄດ້ສະແດງຄວາມຊົມເຊີຍຕໍ່ຄວາມຄືບໜ້າຂອງການເຈລະຈາ ທ່າມກາງຂໍ້ຈຳກັດຈາກການແຜ່ລະບາດຂອງພະຍາດດັ່ງກ່າວຂ້າງເທິງ ພ້ອມທັງໄດ້ຮັບຊາບເຖິງຄວາມໝາຍໝັ້ນອັນສຳຄັນຂອງສັນຍາ RCEP ໂດຍສະເພາະການກະກຽມສຳລັບການລົງນາມໃນຂໍ້ຕົກລົງ RCEP ໃນກອງປະຊຸມສຸດຍອດບັນດາຜູ້ນຳ RCEP ຄັ້ງທີ 4 ໃນທ້າຍເດືອນ ພະຈິກ ປີ 2020 ທີ່ ສສ ຫວຽດນາມ ເພື່ອຈະເປັນການຊ່ວຍສ້າງເພີ່ມຄວາມເຊື່ອໝັ້ນໃຫ້ແກ່ການພັດທະນາທາງດ້ານເສດຖະກິດ, ການຄ້າ ແລະ ການລົງທຶນ ພ້ອມທັງເປັນການຮັກສາຄວາມໝັ້ນຄົງຂອງລະບົບຕ່ອງໂສ້ການສະໜອງໃນພາກພື້ນ ແລະ ໂລກ, ການສະໜັບສະໜູນຕໍ່ການເປີດກວ້າງໃນດ້ານຕ່າງໆ ແລະ ລະບົບການຄ້າຫຼາຍຝ່າຍ ເປັນຕົ້ນ. ພ້ອມດຽວກັນນີ້, ບັນດາລັດຖະມົນຕີ ຍັງໄດ້ຍົກໃຫ້ເຫັນເຖິງຄວາມສຳຄັນທີ່ສັນຍາ RCEP ສາມາດຊ່ວຍຊຸກຍູ້ໃນການຟື້ນຟູເສດຖະກິດ ພາຍຫຼັງການແຜ່ລະບາດຂອງພະຍາດ COVID-19 ກໍຄືການປະກອບສ່ວນອັນສໍາຄັນເຂົ້າໃນການຂະຫຍາຍຕົວຂອງເສດຖະກິດທັງໃນລະດັບພາກພື້ນ ແລະ ໂລກ.
ແຫຼ່ງຂ່າວ: ກົມນະໂຍບາຍການຄ້າຕ່າງປະເທດ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
