ຕອນເຊົ້າເວລາ 9:00 ໂມງ ຂອງວັນທີ 03 ກັນຍາ 2020 ທີ່ສະຖາບັນ ຄົ້ນຄວ້າເສດຖະກິດອຸດສາຫະກຳ ແລະ ການຄ້າ ກະຊວງອຸດສາຫະກຳ ແລະ ການຄ້າ ໄດ້ຈັດພິທີສະຫຼຸບການຈັດຕັ້ງປະຕິບັດວຽກງານການຮຽນການສອນປະຈຳສົກຮຽນ 2019-2020 ແລະ ວາງທິດທາງແຜນການ ໃນສົກຮຽນ 2020-2021 ຂອງວິທະຍາໄລການຄ້າ ມີຜູ້ເຂົ້າຮ່ວມ ທ່ານຫົວໜ້າຫ້ອງການ ແລະ ຕາງໜ້າບັນດາກົມ, ພະແນກ ແລະ ນັກສຶກສາ ທັງໝົດປະມານ 150 ກວ່າທ່ານ.
ພິທີສະຫຼູບສົກຮຽນຄັ້ງນີ້ ເປັນກຽດເຂົ້າຮ່ວມ ໂດຍທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ແລະ ທ່ານ ສິງຄຳ ຄຳພອນ ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ ແລະ ທັງເປັນອຳນວຍການໂຮງຮຽນວິທະຍາໄລການຄ້າ ຂຶ້ນອ່ານບົດສະຫຼູບປິດສົກຮຽນ 2019-2020 ແລະ ວາງແຜນການທິດທາງຕໍ່ໜ້າສົກຮຽນ 2020-2021 ມີດັ່ງນີ້:
- ຫຼັກສູດການຮຽນ 3 ປີ ຊັ້ນສູງ ມີ 6 ພາກຮຽນ.
- ມີຄູອາຈານສອນທັງໝົດ 33 ທ່ານ ອາຈານຮັບເຊີນ 7 ທ່ານ.
- ມີນັກສຶກສາ ປີ 1-3 ທັງໝົດ 224 ຄົນ, ນັກສຶກສາ ປີ1= 55 ຄົນ, ປີ2= 75 ຄົນ, ປີ3= 94 ຄົນ.
- ນັກສຶກສາທີ່ຈົບໃນສົກຮຽນ 2019-2020 ມີ 94 ຄົນ.
ການເຄື່ອນໄຫວຈັດຕັ້ງປະຕິບັດວຽກງານຜ່ານມາແມ່ນໄດ້ຈັດຕັ້ງຜັນຂະຫຍາຍຕາມຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຕາມພະລະບົດບາດ ສສອຄ ເປັນພື້ນຖານ ແລະ ໄດ້ຮັບການຊີ້ນຳຢ່າງໃກ້ສິດຈາກຄະນະນຳ ສສອຄໂດຍການມີສ່ວນຮ່ວມຂອງພະນັກງານ ຄູອາຈານ ທີ່ເປັນພະນັກງານສັງກັດຢູ່ໃນ ສສອຄ ທັງໝົດ ຈຶ່ງເກີດໃຫ້ມີຜົນສຳເລັດເປັນແຕ່ລະໄລຍະ.
ແຜນການເຄື່ອນໄຫວໃນຕໍ່ໜ້າສົກຮຽນ 2020-2021 ສືບຕໍ່ປັບປຸງວາງແຜນການຮຽນການສອນໃຫ້ດີກວ່າເກົ່າ; ຕິດຕາມ, ກວດກາປະເມີນຜົນການຈັດຕັ້ງປະຕິບັດໃນແຕ່ລະໄລຍະ, ເພີ່ມທະວີການແກ້ໄຂບາງຂໍ້ຄົງຄ້າງທີ່ເປັນດ້ານອ່ອນ ແລະ ເສີມຂະຫຍາຍດ້ານດີທີ່ເປັນພື້ນຖານໃຫ້ຫຼາຍຂຶ້ນ; ເອົາໃຈໃສ່ຍົກລະດັບຄວາມຮູ້ຄວາມສາມາດ ຂອງຄູອາຈານໃຫ້ມີຄຸນນະພາບ ແລະ ເປັນເຈົ້າການໃນການ ຮັບຜິດຊອບຕໍ່ ການສອນ, ປັບປຸງຫຼັກສູດທີ່ໄດ້ຈັດຕັ້ງປະຕິບັດຕົວຈິງ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ.
ຕອນທ້າຍ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ໃຫ້ການໂອ້ລົມ ຊີ້ທິດເຍືອງທາງ ແກ່ຄູ, ອາຈານ ແລະ ນັກສຶກສາ ເຫັນໄດ້ພາລະບົດບາດການຮຽນການສອນໃນໄລຍະຜ່ານມາ ແລະ ທິດທາງໃນຕໍ່ໜ້າ ຮຽກຮ້ອງໃຫ້ທຸກຄົນເອົາໃຈໃສ່ ຕໍ່ການສຶກສາຢູ່ໃນວິທະຍາໄລການຄ້າແຫ່ງນີ້ ເສີມຂະຫຍາຍຄວາມເຂັ້ມແຂງ ແລະ ມີປະສິດທິພາບສູງ ໃນການສຶກສາຕໍ່ໜ້າ ເຮັດໃຫ້ດີຂຶ້ນກວ່າເກົ່າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
