ຕອນເຊົ້າ ເວລາ 11:30 ໂມງ ຂອງວັນທີ 11 ກັນຍາ 2020 ທີ່ຫ້ອງຮັບແຂກຊັ້ນ IV ກະຊວງອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Peter SZIJJARTO, ລັດຖະມົນຕີກະຊວງການຕ່າງປະເທດ ແລະ ການຄ້າ ແຫ່ງ ປະເທດ ຮົງກາລີ ພ້ອມດ້ວຍຄະນະ, ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງ ວັນທີ 11-12 ກັນຍາ 2020; ການພົບປະຄັ້ງນີ້ມີຜູ້ຕາງໜ້າສອງຝ່າຍເຂົ້າຮ່ວມປະມານ 25 ທ່ານ.
ໃນໂອກາດນີ້ ທ່ານ ນ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ສປປ ລາວ ໄດ້ສະແດງຄວາມຍິນດີຕ້ອນຮັບ ທ່ານ Peter SZIJJARTO ນໍາພາຄະນະທີມງານມາຢ້ຽມຢາມ ສປປ ລາວ; ໃນການມາຢ້ຽມຢາມຄັ້ງນີ້ ສອງຝ່າຍໄດ້ປຶກສາຫາລືຄວາມເຂົ້າໃຈຮ່ວມກັນ ເປັນການເສີມສ້າງສາຍພົວພັນຮ່ວມມືຊຶ່ງກັນ ແລະ ກັນ; ໃນໄລຍະຜ່ານມາທັງສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມືທີ່ດີ ລະຫວ່າງ ສປປ ລາວ – ຮົງກາລີ ພ້ອມທັງການສົ່ງເສີມການເພີ່ມຜະລິດຕະພາບ ອັນດີງາມໃນຂົງເຂດພາກລັດ ແລະ ພາກທຸລະກິດ ລະຫວ່າງ ສອງປະເທດ ໂດຍສະເພາະ ສິນຄ້າການນໍາເຂົ້າ-ສົ່ງອອກ ໃຫ້ມີການເພີ້ມຂຶ້ນໃນອະນາຄົດ; ທາງດ້ານອຸດສາຫະກຳ ແລະ ການຄ້າ ແລກປ່ຽນຂໍ້ມູນບັນດາຈຸນລະວິສາຫະກິດ, ວິສາຫະກິດຂະໜາດນ້ອຍກາງ – (MSMEs & SMEs) ຂອງສອງປະເທດ ເພື່ອໃຫ້ມີການຮ່ວມມືກັນຫລາຍຂຶ້ນ; ພ້ອມທັງ ປຶກສາຫາລືກ່ຽວກັບການຍົກລະດັບວິຊາການ ຂອງສອງປະເທດ ຮົງກາລີ-ສປປ ລາວ ແລະ ການມາເປີດສະຖານກົງສຸນ ຂອງສະຖານເອກອັກຄະລັດຖະທູດ ຮົງກາລີ ປະຈໍາ ບາງກອກ ປະເທດໄທ.
ຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີຕ້ອນຮັບ ແລະ ການໃຫ້ຄວາມຮ່ວມມືເປັນຢ່າງດີ ຂອງ ທ່ານ Peter SZIJJARTO, ລັດຖະມົນຕີກະຊວງການຕ່າງປະເທດ ແລະ ການຄ້າ ແຫ່ງ ປະເທດ ຮົງກາລີ, ຕໍ່ຈາກນັ້ນ ທ່ານ ລັດຖະມົນຕີ ແຫ່ງ ຮົງກາລີ, ກໍ່ສະແດງຄວາມຂອບໃຈມາຍັງ ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ສປປ ລາວ ທີ່ໃຫ້ການຕ້ອນຮັບຢ່າງອົບອຸ່ນດ້ວຍໄມຕີຈິດມິດຕະພາບ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
